12/02/2024
BOHOL CAPITOL SCANDAL
'Wake-up call" alang kang Gob. Aris, gipalanog sa iyang political supporter
TAGBILARAN CITY - Kanhi student leader ug kandidato pagka-konsehal sa dakbayan sa Tagbilaran Ronie Orillosa, niawhag kang Gob. Aris Aumentado nga ipakita ang iyang liderato ug dili padaug sa iyang mga alipores nga iyang gitawag og "7-member league of governors" sa Kapitolyo.
Wa hinoon niya hinganli kinsa ang buot niyang ipasabot.
Sa usa ka presscon uban sa Bohol media, si Orillosa, niingon kon di maminaw ang gobernador, hayan mangita ang iyang grupo og laing lider nga suportahan unya sa 2025.
Si Orillosa usa sa mga lider sa mga batan-on nga nagpaluyo sa kampaniya ni kanhi Pres. Duterte sa 2016 ug VP Sara Duterte ug kang Aumentado niadtong 2022 pinaagi sa Kilusang Pagbabago (KP). Niadtong 2022, nipapili siya isip konsehal sa siyudad ubos sa grupo ni kanhi Mayor Dan Lim, apan napildi.
Sa maigusong pamahayag, gisaway ni Orillosa ang iyang gihulagway nga lapad nga kurapsiyon sa Kapitolyo nga gibuhat sa iyang (gobernador) mga "alipores". Lakip sa iyang gisaway ang pagkuyanap pagbalik sa iligal nga drugas ug ang kamahal sa presyo sa mga palaliton.
"Ang Bohol karon gitawag na og dollar-rate province". Unsa may gihimo ni Aster Caberte nga gikan man siya sa DTI?"
Gipangutana kon duna ba siyay nahibaw-an nga mga kaso sa kurapsiyon, siya niingon "ato ra nang ipahibaw sa umaabot nga panahon".
Niingon siya ang pamunoan ni Aumentado walay direksiyon. Ipakita nga ikaw maoy tinuod nga gobernador ug dili kanang 7 ka mga sakop sa "league of governors" nga maoy nagbuot sa mga kalihukan sa Kapitolyo.
Dili na kini madala og sayaw-sayaw. Dili na kini madala og sayaw-sayaw og cha-cha.
Kon dili mahimo ang pagwagtang sa iyang mga alipores, then, panahon na tingali nga mangita mig laing supprtahan sa sunod eleksyon
Gipangutana kon kinsa angay nga moatbang kang Aumentado, siya nitubag, "naay daghan. Naa si kanhi VGov. Relampagos, naa si Kong. Tutor ug naa si kanhi Mayor Baba Yap.
Gipangutana usab og kinsay nagpaluyo kaniya, si Orillosa niingon, "ako kining kauglingong paningkamot. Tungod kay nalooy ko sa mga Bol-anon. Naguol ko".
Makapildi ba kang Aris kining mga isyu batok kaniya, si Orillosa nitubag, "kon wala lay hulgaay, bisan sa Kapitolyo, mapildi Gob. Aris.
Ang kabug-at sa gibuhiang mga pamahayag ni Orillosa nakapakurat sa mga sakop sa media.
Lakip si Chairman Norris Oculam sa Abaka, nga tupad ni Orillosa sa presidential table nakalitan ug daling nipaklaro nga pagka karon, dili siya sakop sa mga economic advisers ni Gob. Aumentado.
Hinoon, nipasalig si Oculam nga iyang paninguhaon nga iyang ipaabot ngadto sa gobernador ang mga punto ni Orillosa ug magka-istorya ang duruha.
(Makita sa hulagway si Ronie Orillosa nga nagtindog)
