11/07/2026
SUKOT HAN KURYENTE HA EASTERN VISAYAS, GURUGUTI UNTA KUN NAPUPULSAN HAN REHIYON AN TONGONAN GEOTHERMAL POWER PLANT
Ginkwestiyon han Leyte III Electric Cooperative an baliktad nga sistema han industriya han enerhiya kun diin an Sinirangan Bisayas nga sentro hiton usa ha gidadakui nga geothermal power plant ha kalibutan in padayon nga nag-aantos hin mahal nga sukot hit kuryente.
Sumala kan Leyeco II General Manager Dr. Allan Laniba, maabot ha 700 megawatt nga malimpyo nga kuryente an akos nga ig-produce han Tongonan Geothermal Power Plant ha Ormoc City, pero tungod han pribatisasyon ha ilarom han EPIRA Law, diri ini direkta nga napupulsan han mga taga-rehiyon.
Pag-isplikar ni Laniba, tungod kay pribado nga sektor an nagtatag-iya hini nga planta, iginpapadara ini ngadto ha Luzon, samtang an mga kooperatiba ha Eastern Visayas in napipiritan nga kumuha hin supply tikang ha mga hagrayo nga planta sugad han coal-fired power-plant ha Bataan ngan Pangasinan.
Tungod han hirayo nga gintikangan han supply, gin-aabaga han mga konsumidor an hitaas nga sukot ha line loss, labot la ha congestion cost ha kada nagkakakada hin traffic ha linya han transmission.
Ginduon gihap han opisyal nga subay han Natural Resources Law, an mga host community dapat an siyahan nga nagpupulos han natural nga karikuhan han ira tuna. #
Ini nga notisya in durot ha iyo han:
Gene Peliño | Hulyo 10, 2026
