12/06/2026
Salute sa inyo mga KUYA 🫡🫡🫡
LALAKING NAGTANGKANG MAGPAKAMAT*Y, NASAGIP NG TEU PERSONNEL SA SANTIAGO CITY
SANTIAGO CITY– Matagumpay na nailigtas ng mga tauhan ng Traffic Enforcement Unit (TEU) ng Santiago City Police Office ang isang lalaki matapos umanong magtangkang magpakamatay sa Barangay Malvar, Santiago City, madaling-araw ng Hunyo 12.
Ayon sa ulat, bandang alas-12:10 ng madaling-araw habang nagsasagawa ng police visibility at regular na pagpapatrolya sina PMSg Redentor Cairel at PCpl John Paul Sudario, lumapit sa kanila ang isang concerned citizen upang humingi ng agarang tulong para sa kanyang kapatid na umano’y nasa kritikal na kalagayan at nagbabantang kitilin ang sariling buhay.
Agad na rumesponde ang mga pulis sa lugar at nadatnan ang lalaki na may hawak na patalim at nasa balisang kalagayan. Sa halip na gumamit ng puwersa, mahinahon at propesyonal na kinausap ng mga pulis ang indibidwal upang mapakalma ito.
Sa pamamagitan ng maayos na negosasyon at pakikipag-usap, matagumpay na nabawi ng mga awtoridad ang hawak na patalim ng lalaki nang walang sinuman ang nasugatan.
Matapos ang insidente, isinailalim ang lalaki sa pangangalaga ng kanyang pamilya.
Nagbigay rin ng payo at gabay ang mga pulis sa mga kaanak nito hinggil sa wastong pag-aalaga at masusing pagbabantay upang maiwasan ang kahalintulad na pangyayari sa hinaharap.
Binigyang-diin ni PMAJ Melchor A. Aggabao Jr., Acting Chief ng Traffic Enforcement Unit, ang kahalagahan ng agarang pagtugon sa mga sitwasyong may kaugnayan sa mental health. Hinikayat niya ang publiko na maging bukas sa pakikinig at pag-unawa sa mga pinagdaraanang emosyonal na hamon ng kanilang mga mahal sa buhay.
Aniya, nananatiling handa ang hanay ng kapulisan na tumulong hindi lamang sa pagpapanatili ng kaayusan at seguridad kundi maging sa pagbibigay ng suporta sa mga mamamayang dumaraan sa mabibigat na pagsubok sa buhay.
Patuloy ring nananawagan ang pulisya sa publiko na huwag mag-atubiling humingi ng tulong mula sa kanilang pamilya, kaibigan, o mga awtoridad kapag nakararanas ng matinding emosyonal na suliranin, bilang bahagi ng pagsusulong ng kamalayan at pangangalaga sa kalusugang pangkaisipan.
