Lakas ng Kabataang Dita

02/06/2026

“Siguradong Serbisyo, Hindi Baka Sakali”
(tagline na real talk)
ni: James Manalili Ronquillo

Kapag dumating ang panahon ng pagpili ng mga lider, mahalagang tanungin ninyo ang inyong sarili: Sino ang nagpakita? Sino ang nagtrabaho? At sino ang may konkretong nagawa para sa komunidad?

Sa loob ng nakalipas na mga taon, hindi ninyo kailangang umasa sa mga pangako lamang dahil naramdaman ninyo ang mga programang direktang inihatid sa inyong mga tahanan at komunidad.

Sa pamamagitan ng Serbisyo Karavan, mahigit dalawang taon kayong nakatanggap ng mga aklat, food packs, at mga programang nagtuturo ng tamang kagawian para sa inyong mga anak. Bawat buwan, 50 hanggang 100 kabataan ang direktang nakikinabang sa programang ito.

Sa Salamat Lolo, Salamat Lola, hindi na kailangang hintayin ng inyong mga nakatatanda ang unang Lunes ng buwan upang makahingi ng tulong para sa kanilang maintenance medicine. Ginawa itong araw-araw upang mas mabilis at mas maginhawa ninyong makuha ang serbisyong kailangan ninyo.

Sa pamamagitan ng RideMed, hindi na kailangang bumiyahe pa ng inyong mga lolo at lola para kumuha ng gamot. Ang serbisyo mismo ang lumalapit sa kanila at naghahatid ng kinakailangang tulong hanggang sa kanilang tahanan.

Sa Programang E.A.T. (Edukasyon + Almusal = Tagumpay), mahigit 200 mag-aaral ang nakakatanggap ng mainit at masustansyang almusal tuwing Martes sa pakikipagtulungan sa Dita Integrated School. Dahil alam nating ang batang busog ay mas handang matuto at mangarap.

Sa SK Educational Assistance Program, 500 mag-aaral mula pre-school hanggang kolehiyo ang nabibigyan ng tulong-pinansyal na nagkakahalaga ng ₱1,000 hanggang ₱3,000 upang makatulong sa kanilang pag-aaral.

Sa Pamaskong Handog, 500 pamilyang Ditañano ang nakatatanggap ng grocery packs bilang dagdag na suporta sa panahon ng Kapaskuhan.

Sa 10 Most Outstanding Students of Dita, kinikilala at pinararangalan ang sampung natatanging mag-aaral ng barangay. Bawat isa ay tumatanggap ng ₱10,000 bilang gantimpala sa kanilang sipag at tagumpay.

Sa Dita Sports, mahigit 1,600 atleta na ang nakapaglaro at nakinabang sa mga libreng liga at palaro sa basketball at volleyball sa loob ng tatlong taon.

Bilang kinatawan sa Sangguniang Barangay, si Chairwoman Pia Atutubo ay nagsilbing boses ng kabataan at katuwang sa paggawa ng mga polisiya para sa barangay. Sa kanyang panunungkulan, 27 resolusyon ang kanyang naipasa na nakinabang hindi lamang ang kabataan kundi ang buong komunidad.

At higit sa lahat, nakita ninyo siya mula pa noong unang araw ng kanyang panunungkulan. Hindi lamang kapag may programa. Hindi lamang kapag may selebrasyon. At lalong hindi lamang kapag malapit na ang halalan.

Sa loob ng halos tatlong taon, ipinakita niya ang kanyang mga ideya, suhestyon, at malasakit para sa barangay. Hindi para sa pansariling interes. Hindi para sa pagpapasikat. Kundi para sa mas maraming Ditañanong nangangailangan ng serbisyo.

Sa huli, nasa inyong mga kamay ang pasya.

Kapag ang hinahanap ninyo ay lider na subok na sa trabaho, may malinaw na direksyon, at may konkretong nagawa para sa komunidad, hindi ninyo kailangang manghula.

May nagawa na. May napatunayan na.

Siguradong Serbisyo. Hindi Baka Sakali.🫰🏻🩷

01/06/2026

🏀 𝐃𝐈𝐓𝐀 𝐒𝐏𝐎𝐑𝐓𝐒 𝟐𝟎𝟐𝟔 | 𝐁𝐚𝐬𝐤𝐞𝐭𝐛𝐚𝐥𝐥 🩷

Matagumpay na naisagawa ang Basketball ng Dita Sports 2026 matapos ang sunod-sunod na laban at pagpapakita ng husay, lakas, at pagkakaisa ng bawat koponan.

Mula sa maayos na preparasyon hanggang sa pagbubukas ng liga, naging kapana-panabik ang bawat laro na tunay na sinuportahan ng mga manonood at manlalaro ng Barangay Dita.

🏆 𝟏𝟗𝐔 𝐂𝐚𝐭𝐞𝐠𝐨𝐫𝐲
Itinanghal na kampeon ang 𝗖𝗮𝗿𝗹𝘁𝗼𝗻 matapos talunin ang 𝗩𝗶𝗹𝗹𝗮 𝗔𝗻𝘁𝗵𝘂𝗿𝗶𝘂𝗺, na siyang nagwagi bilang first runner-up.

🏅 𝐌𝐲𝐭𝐡𝐢𝐜𝐚𝐥 𝟓
• #21 Bunquin
• #11 Ramirez
• #73 Corpuz
• #7 Jancorda
• #3 Lawas

🎖️ 𝐌𝐨𝐬𝐭 𝐕𝐚𝐥𝐮𝐚𝐛𝐥𝐞 𝐏𝐥𝐚𝐲𝐞𝐫
#3 David Joshua Lawas ng Carlton with 21 Points, 6 Rebounds, 4 Assists, and 3 Steals.

🏆 𝟐𝟗𝐔 𝐂𝐚𝐭𝐞𝐠𝐨𝐫𝐲
Nasungkit ng 𝗣𝘂𝗿𝗼𝗸 𝟱 ang kampeonato laban sa 𝗣𝗮𝗻𝗼𝗿𝗮𝗺𝗮 matapos ang mainit na bakbakan sa finals.

🏅 𝐌𝐲𝐭𝐡𝐢𝐜𝐚𝐥 𝟓
• #12 Ador
• #25 De Borja
• #88 Bascruz
• #87 Nebre
• #26 Lavado

🎖️ 𝐌𝐨𝐬𝐭 𝐕𝐚𝐥𝐮𝐚𝐛𝐥𝐞 𝐏𝐥𝐚𝐲𝐞𝐫
#25 Christopher Art De Borja ng Purok 5 with 22 Points, 6 Rebounds, 4 Assists, and 4 Steals.

🏆 𝟑𝟗𝐔 𝐂𝐚𝐭𝐞𝐠𝐨𝐫𝐲
Pinatunayan ng 𝗖𝗲𝗻𝘁𝗿𝗼 𝗦𝗮𝗻𝗟𝗼 ang kanilang husay matapos maiuwi ang titulo laban sa 𝗦𝗮𝗻𝘁𝗮 𝗥𝗼𝘀𝗮 𝗛𝗼𝗺𝗲𝘀.

🏅 𝐌𝐲𝐭𝐡𝐢𝐜𝐚𝐥 𝟓
• #29 Parale
• #30 Centeno
• #14 Peña
• #59 Peña
• #42 Begaso

🎖️ 𝐌𝐨𝐬𝐭 𝐕𝐚𝐥𝐮𝐚𝐛𝐥𝐞 𝐏𝐥𝐚𝐲𝐞𝐫
#14 Norbie Peña ng Centro SanLo with 18 Points, 7 Rebounds, and 5 Assists.

🏆 𝟒𝟎𝐀 𝐂𝐚𝐭𝐞𝐠𝐨𝐫𝐲
Nagkampeon naman ang 𝗣𝗮𝗻𝗼𝗿𝗮𝗺𝗮 matapos talunin ang 𝗣𝘂𝗿𝗼𝗸 𝟱 sa isa pang dikit na laban.

🏅 𝐌𝐲𝐭𝐡𝐢𝐜𝐚𝐥 𝟓
• #59 Carta
• #4 Oares
• #28 Flores
• #3 Digma
• #7 Guerta

🎖️ 𝐌𝐨𝐬𝐭 𝐕𝐚𝐥𝐮𝐚𝐛𝐥𝐞 𝐏𝐥𝐚𝐲𝐞𝐫
#4 Joel Oares ng Panorama with 28 Points, 6 Rebounds, and 3 Assists.

Binabati namin ang Sangguniang Kabataan ng Barangay Dita sa pangunguna ni Chairwoman Pia Atutubo, maging ang mga committee, officials, players, volunteers, at supporters na naging bahagi ng matagumpay na Basketball ng Dita Sports 2026.

Isang tagumpay na tunay na maipagmamalaki dahil ipinakita ng bawat isa ang kahalagahan ng sportsmanship, pagkakaisa, at ang lakas ng bawat kabataang ditañano.

𝙏𝙪𝙣𝙖𝙮 𝙣𝙖 𝙠𝙖𝙮𝙤 𝙖𝙮 𝙢𝙖𝙞𝙥𝙖𝙜𝙢𝙖𝙢𝙖𝙡𝙖𝙠𝙞 🫰🏻🩷

📷: Chairwoman Pia Atutubo | Dita Sports

31/05/2026

🏐 𝐃𝐈𝐓𝐀 𝐒𝐏𝐎𝐑𝐓𝐒 𝟐𝟎𝟐𝟔 | 𝐕𝐨𝐥𝐥𝐞𝐲𝐛𝐚𝐥𝐥 🩷

Matagumpay na naisagawa ang Volleyball ng Dita Sports 2026 matapos ang matitinding laban at pagpapakita ng husay, teamwork, at pagkakaisa ng bawat koponan.

Mula sa maayos na preparasyon hanggang sa pagbubukas ng liga, naging puno ng sigawan, suporta, at saya ang bawat laban na tunay na nagpatingkad sa galing ng mga atletang ditañano.

🏆 𝐖𝐨𝐦𝐞𝐧𝐬 𝐂𝐚𝐭𝐞𝐠𝐨𝐫𝐲
Wagi ang 𝗣𝘂𝗿𝗼𝗸 𝟱 laban sa 𝟭𝗖 𝗔𝗻𝗻𝗲𝘅 matapos ang ipinakitang galing at teamwork nitong finals.

🏅 𝐌𝐲𝐭𝐡𝐢𝐜𝐚𝐥 𝟔
• #1 Luna
• #7 Delos Santos
• #2 Cabacog
• #14 De Guzman
• #19 Nalidan
• #14 Carta

🎖️ 𝐌𝐨𝐬𝐭 𝐕𝐚𝐥𝐮𝐚𝐛𝐥𝐞 𝐏𝐥𝐚𝐲𝐞𝐫
#12 Kathleen Macavinta ng Purok 5 with 17 Attacks and 10 Exec. Receive.

🏆 𝐌𝐞𝐧𝐬 𝐂𝐚𝐭𝐞𝐠𝐨𝐫𝐲
Pinakita naman ng 𝗣𝘂𝗿𝗼𝗸 𝟮 ang kanilang lakas at husay matapos talunin ang 𝗣𝗮𝗻𝗼𝗿𝗮𝗺𝗮 sa isang matinding laban.

🏅 𝐌𝐲𝐭𝐡𝐢𝐜𝐚𝐥 𝟔
• #5 Madrid
• #1 Delos Santos
• #15 Torreda
• #25 De Borja
• #19 Basco
• #11 Rubin

🎖️ 𝐌𝐨𝐬𝐭 𝐕𝐚𝐥𝐮𝐚𝐛𝐥𝐞 𝐏𝐥𝐚𝐲𝐞𝐫
#12 Raizel Nuñez ng Purok 2 with 17 Attacks, 5 Blocks, and 2 Service Ace.

Binabati namin ang Sangguniang Kabataan ng Barangay Dita sa pangunguna ni Chairwoman Pia Atutubo, maging ang mga committee, officials, players, volunteers, at supporters na naging bahagi ng matagumpay na Volleyball ng Dita Sports 2026.

Isang tagumpay na tunay na maipagmamalaki dahil ipinakita ng bawat isa ang kahalagahan ng sportsmanship, pagkakaisa, at ang lakas ng bawat kabataang ditañano.

𝙏𝙪𝙣𝙖𝙮 𝙣𝙖 𝙠𝙖𝙮𝙤 𝙖𝙮 𝙢𝙖𝙞𝙥𝙖𝙜𝙢𝙖𝙢𝙖𝙡𝙖𝙠𝙞 🫰🏻🩷

📷: Chairwoman Pia Atutubo | Dita Sports

30/05/2026

May 30, 2026 | Basic First Aid & Evacuation Drill Management ⛑️🩺🩹

Dumalo ang Lakas ng Kabataang Dita President, Cellinedy Batitis, at Sergeant-at-Arms, Alliyah Pangilinan. Kasama rin namin ang Sulong Kabataan sa pangunguna ni Chairman Marlo Barqueros at ng kaniyang mga kagawad na sina Lenard Batitis, MJ Digma, at Karl Ramos.

Dito ay tinalakay at pinag-usapan kung paano kami magiging handa at makakatulong, at maging ang kaalaman patungkol sa paunang lunas sa panahon ng sakuna, kalamidad, at aksidente. Ipinakita rin dito ang kahalagahan ng kaalaman ng isang tao sa mga ganitong uri ng sitwasyon.

Lubos ang aming pasasalamat kay Chairwoman Pia Atutubo sa pagbibigay ng oportunidad na makalahok sa seminar at training na ito. Ganoon din kina Mayor Arlene B. Arcillas, Vice Mayor Arnold B. Arcillas, at SK Federation President Patrick Ivhan De Guzman sa patuloy na suporta.

Sa Public Order and Safety Office ng Santa Rosa, at sa mga speaker mula sa Philippine Red Cross Laguna Chapter - Kyla Mae Estanislao, Billie Donabel Mañalac, Warren Mallari, Winil Costa, at Melvin Pujanes - maraming salamat sa isang makabuluhang aral at training.

Para sa mas maipagmamalaking Ditañanos! Sulong 🫰🏻🩷

30/05/2026

ATM | Basic First Aid & Evacuation Drill Management🩹⛑️

Magandang umaga, Barangay Dita!

Ang Sulong Kabataan sa pangunguna ni Chairman Marlo Barqueros at Lakas ng Kabataang Dita (LaKaD) sa pangunguna ng kanilang pangulo, Cellinedy Batitis ay sa kasalukuyang dumadalo sa Basic First Aid Seminar na hatid ng SK federation at City Youth Development Office.

Dagdag kaalaman para sa mas maipagmamalaking Batang Dita.

23/05/2026

TIGNAN | Ngayong araw, dumalo ang Lakas ng Kabataang Dita kasama ang Sulong Kabataan sa isang programang “DAGITAB: Punla ng Pagbabago.”

Maraming salamat sa mga bumubuo ng programang ito, KBK (Kabataan ng Bagong Kongreso), Congressman Roy M. Gonzales, Mayor Arlene B. Arcillas, Vice Mayor Arnold B. Arcillas, at sa lahat ng mga nasa likod nito. Lubos din ang aming pasasalamat sa naging dahilan kung bakit kami ay nakibahagi dito, Chairwoman Pia Atutubo.

Binabati rin namin ang lahat ng mga organisasyon mula sa Lingap: Kilos Kabataang Pulonians, Olympus Development Council, Libertas Debate Society, Junior City Officials Batch Echo, at Supreme Innovators’ Guide for Mathematics Advancement. At mula naman sa Sigla: ARISE, Barkada Kontra Droga (Sinalhan Chapter), The PUP-SRC Student Council, AWS Learning Club, at Kilos Lagunense.

Tunay na ang kabataan ang pag-asa ng bayan. Mula sa mga programa at inisyatiba, tunay na may malaking ambag tayo sa ating lipunan. Dalangin namin ang isang kabataang nagkakaisa, sama-sama, para sa pagbabago.

23/05/2026

Bakit Pia? (Part 4)
ni: James Manalili Ronquillo

“Bata pa ‘yan.”

Ilang beses na ba nating narinig ang linyang ito tuwing may kabataang nangangarap tumindig, magsalita at mamuno?

Para sa iba, ito ay simpleng obserbasyon. Para sa iba, ito ay pagdududa. Ngunit para kay Pia Atutubo at sa kabataang Ditañano, ito ay naging isang hamon.

Isang hamon kay Pia upang patunayan na ang murang edad ay hindi hadlang sa maayos, matino at may malasakit na pamumuno.

At higit sa lahat, isang hamon ito sa buong kabataan na patunayan na kaya nilang tumayo sa likod ng isang lider na may malinaw na prinsipyo, tunay na malasakit at tapang na gawin ang trabahong matagal nang hinihintay ng mamamayan.

Sapagkat ang laban na ito ay hindi lamang tungkol kay Pia. Hindi ito simpleng usapin ng isang pangalan o personalidad. Ito ay laban ng isang henerasyon na matagal nang minamaliit, pinapatahimik at sinasabihang “hintayin muna ang tamang panahon.”

Ngunit paano darating ang tamang panahon kung ang kabataan mismo ay hindi kikilos upang likhain ito?

Hindi sapat na purihin lamang ang kabataang lider kapag may tagumpay. Kailangan silang samahan. Kailangan silang suportahan. Kailangan silang ipaglaban habang sila ay tumitindig laban sa lumang kultura ng pulitika na mas pinipili ang ingay kaysa trabaho, at personalidad kaysa prinsipyo.

Kapag sinasabi nilang “Bata pa ‘yan,” sana ang sagot ng kabataan ay hindi katahimikan.

Kundi pagkilos.

Pagkakaisa.

At paninindigan.

Dahil ang tagumpay ni Pia ay hindi lamang personal na tagumpay. Hindi lamang ito panalo ng iisang sektor o grupo ng kabataan. Ito ay generational victory. Tagumpay ito ng bawat ordinaryong mamamayan na matagal nang naghahanap ng bagong mukha ng pamumuno. Tagumpay ito ng mga magulang na nangangarap ng mas maayos na kinabukasan para sa kanilang mga anak. Tagumpay ito ng mga manggagawa, estudyante, senior citizens, homeowners, at bawat Ditañanong naniniwalang may mas maayos pang paraan ng paglilingkod.

Kapag nagtagumpay ang isang kabataang lider na may prinsipyo, ang tunay na nananalo ay ang buong komunidad.

Dahil ang kabataan ay hindi lamang kinabukasan ng bayan. Kapag handang tumindig, maglingkod at mamuno nang may dangal, sila rin ang kasalukuyan nito.

19/05/2026

Bakit Pia (Part 3)
ni: James Manalili Ronquillo

Sa gitna ng maiingay na banggaan ng mga pangalan, impluwensya, at magkakampihang grupo sa pulitika, namumukod-tangi si Pia Atutubo sa isang uri ng lideratong hindi kailangang sumigaw upang mapakinggan.

Bata siya ngunit hindi padalos-dalos. Tahimik ngunit hindi mahina. Kalmado ngunit matatag.

Habang ang iba ay abala sa pag-uunahan sa eksena at pagpapalakas ng kani-kanilang kampo, pinili ni Pia ang mas mahirap ngunit mas makabuluhang landas: ang magtrabaho nang tahimik, direkta, at may malinaw na layunin. Hindi siya nakisabay sa politika ng bangayan at personalan. Sa halip, inilaan niya ang kanyang panahon sa pagbuo ng mga programang may konkretong epekto sa kabataan at komunidad.

Ang kanyang liderato ay parang tahimik na apoy, hindi magulo, ngunit patuloy na nagbibigay liwanag at direksyon.

Sa panahon kung saan maraming lider ang sinusukat sa ingay at drama, ipinapakita ni Pia na may lakas sa pagiging mahinahon. Na ang tunay na kumpiyansa ay hindi kailangang ipagsigawan. At na ang kabataang lider na may malinaw na prinsipyo ay kayang tumindig nang may dignidad kahit napapalibutan ng banggaan ng mga makapangyarihang apelyido at political clans.

Nasa likod niya ang maraming tahimik na nagmamasid na taumbayan, mga taong sawa na sa lumang uri ng pulitika at naghahanap ng lider na tunay na may malasakit, direksyon, at kakayahang maglingkod. Nasa balikat niya ang pangarap ng maraming Ditañano. At nasa harapan niya ang malawak na oportunidad na pandayin ang kinabukasan ng barangay sa pamamagitan ng isang pamumunong may puso, prinsipyo, at pananagutan.

Si Pia ay larawan ng bagong henerasyon ng pamumuno. Youthful ngunit disiplinado, quiet but deeply effective, calm yet unwavering in conviction.

19/05/2026

𝑩𝒂𝒕𝒂𝒏𝒈 𝑹𝒐𝒔𝒆𝒗𝒊𝒍𝒍𝒆 𝒔𝒂 𝑲𝑨𝑳𝒀𝑬-𝑳𝒀𝑴𝑷𝑰𝑪𝑺 🤼🥇

16/05/2026

Bakit Pia? (Part 2)
ni: James Manalili Ronquillo

Habang abala ang ilan sa pakikipag-girian sa pwestuhan para sa darating na BSKE ngayong Nobyembre 2026, may isang kabataang piniling ilaan ang oras hindi sa pagpapapogi sa politika, kundi sa tunay na paglilingkod sa mamamayan.

Tahimik ngunit tuloy-tuloy na nagsisikap si Pia Atutubo upang mailapit ang serbisyo sa bawat Ditañano. Higit sa pakikipagkamay at pagpapakilala, kaniyang isinasabuhay ang tunay na diwa ng pagiging lingkod-bayan, matino, may husay, at may malasakit.

Batid niya na ang tungkuling kaniyang sinumpaan ay hindi simpleng titulo lamang. Ito ay kaakibat ng trabaho, sakripisyo, at pananagutan. Kailanman ay hindi niya ginawang luho ang biyaya ng kaniyang posisyon, ni hindi siya nagpalunod sa rumaragasang agos ng kapangyarihan. Sa halip, pinili niyang ituon ang kaniyang panahon at lakas sa mga programang may konkretong pakinabang sa komunidad.

Sa pamamagitan ng serbisyong nakabatay sa aksyon at hindi sa ingay, patuloy niyang pinatutunayan na ang tunay na lider ay hindi nasusukat sa dami ng tarpulin o pagpaparamdam tuwing eleksyon, kundi sa kakayahang tumindig, kumilos, at magbigay ng solusyon sa araw-araw na pangangailangan ng mamamayan.

Hindi man siya ang pinakamalakas ang boses sa larangan ng politika, malinaw namang umaalingawngaw ang kaniyang mga gawa. Sa bawat programang inilulunsad, sa bawat kabataang naaabot, at sa bawat pamilyang natutulungan, unti-unti niyang binubuo ang isang uri ng pamumunong hindi nakasandal sa popularidad kundi sa kredibilidad at tiwala ng tao.

Sa panahong maraming pulitiko ang abala sa pagpapakitang-tao, pinipili ni Pia na magtrabaho kahit walang kamera. Sapagkat para sa kaniya, ang tunay na serbisyo ay hindi proyekto ng ambisyon kundi pagtugon sa pangangailangan ng mamamayan. Sa panahong maingay ang politika, nananatiling malinaw ang kaniyang direksyon. Maglingkod nang tapat, may dangal, at may paninindigan.