29/03/2026
Sa Ebanghelyo ngayong Lunes Santo, ipinapaalala sa atin ang kahalagahan ng tunay at wagas na pagmamahal.
Sa mundong madalas inuuna ang praktikal at pansarili, hinahamon tayo na piliin ang pagmamahal kaysa sa pag-aalinlangan, at ang kabutihan kaysa sa pagkamakasarili. Ipinapaalala rin ni Hesus na may mga pagkakataon na ang pagmamahal ay hindi kailangang ipaliwanag—kundi ipakita.
Ngayong Semana Santa, nawa’y matutunan nating magmahal nang higit, magbigay nang buong puso, at ilaan ang ating sarili sa Diyos.
Ngayon, Tayo’y mag nilay sa Salitang ng Diyos.
Ang Mabuting Balita ng Panginoon ayon kay San Juan 12, 1-11
Anim na araw bago mag-Paskuwa, si Hesus ay dumating sa Betania, sa bayan ni Lazaro na kanyang muling binuhay. Ipinaghanda siya roon ng hapunan; naglingkod si Marta, at si Lazaro’y isa sa mga kasalo ni Hesus. Kumuha si Maria ng mamahaling pabango, isang libra ng dalisay na nardo, at ibinuhos sa mga paa ni Hesus. Pagkatapos, pinunasan ng kanyang buhok. At humalimuyak sa buong bahay ang pabango. Si Judas Iscariote, ang alagad na magkakanulo kay Hesus, ay nagsabi, “Bakit hindi ipinagbili ang pabango at ibinigay sa mga dukha ang pinagbilhan? Maaaring umabot sa tatlong daang denaryo ang halaga niyan.” Hindi dahil sa siya’y may malasakit sa mga dukha kaya niya sinabi iyon, kundi dahil sa siya’y magnanakaw. Siya ang nag-iingat ng kanilang salapi at kinukupit niya ito. Sumagot si Hesus, “Ano’t siya’y ginugulo ninyo? Pabayaan ninyong ilaan niya ito para sa paglilibing sa akin. Habang panaho’y kasama ninyo ang mga dukha, ngunit ako’y hindi ninyo kasama sa habang panahon.”
Nabalitaan ng maraming Judio na si Hesus ay nasa Betania kaya’t pumaroon sila, hindi lamang dahil sa kanya, kundi para makita si Lazaro na kanyang muling binuhay. Kaya’t binalak ng mga punong saserdote na ipapatay rin si Lazaro, sapagkat dahil sa kanya’y maraming Judio ang humihiwalay na sa kanila at nananalig kay Hesus.
Ang Mabuting Balita ng Panginoon.
