19/08/2026
πππππππππππππ πππππ |
Banta ng Baha
Halos dalawang linggo nang umuulan na dulot ng mga bagyo at habagat. Hanggang ngayon ay baha parin sa ibang mga barangay sa bayan ng San Luis at karatig lugar nito.
Madalas nating makikita ang mga taong lumulusong, nagtatampisaw, at naglalaro sa tubig baha. Hindi naman natin sila masisisi dahil minsan, wala silang ibang pagpipilian kundi lumusong upang makapaghanapbuhay. Ang iba naman, gaya ng mga bata, ay nag lalaro dahil maaring hindi nila batid ang panganib na maaaring dulot ng tubig baha.
Ngunit sa likod ng tila ordinaryong tubig baha, may panganib na hindi nakikita ng ating mga mata.
Leptospirosis - impeksiyon na dulot ng bakterya leptospira na kadalasang nakukuha sa ihi ng mga infected na daga at iba pang mga hayop.
Kapag ang ihi ng isang infected na hayop ay humalo sa tubig baha, maari itong magdala ng leptospira bacteria na maaaring makapasok sa katawan sa pamamagitan ng mga sugat o gasgas sa balat.
Ayon sa Department of Health (DOH),
ang mga sintomas ng leptospirosis ay karaniwang lumalabas sa loob ng pito hanggang labing-apat na araw matapos malantad sa baha o putik, ngunit maaari itong lumitaw anumang oras mula dalawa hanggang tatlumpung araw.
Ngunit ano-ano nga ba ang mga sintomas na maaring maranasan ng isang tao na mayroong leptospirosis?
Ang mga sintomas nito ay ang, pagkaranas ng mataas na lagnat, panginginig, paninilaw ng balat, pananakit ng ulo, pagsusuka, pananakit ng tiyan at pag tatae, pagkakaroon ng mga pantal, pananakit ng kalamnan, hirap sa pag ihi, at pamumula ng mata
Kung ikaw ay lumusong sa baha, may sugat man o wala, mahalagang agad na maghugas gamit ang malinis na tubig at sabon at ugaliing panatilihing malinis ang katawan at iwasan ang lumusong muli sa baha.
Kung ikaw ay nalantad na sa baha at may nararamdamang kakaiba, agad na kumonsulta sa
health center, o doktor upang masuri at mabigyan ng angkop na paggamot.
Ang pag iwas sa paglusong, pag tatampisaw, at pag lalaro sa kontaminadong tubig, o tubig baha ay isa sa mga simpleng paraan upang mabawasan ang panganib ng leptospirosis.
Ang leptospirosis ay sadyang nakakabahala, kaya panatilihin ang kalinisan ng katawan at kapaligiran, mag-ingat sa bawat hakbang upang sakit ay maiwasan at kalusugan ay mapangalagaan.
Via Scarlet Yabut, Jhedreel Turla | Panimanman
