JCLLC Rosales Mission

10/05/2026

25/02/2026

Daily Morning Manna | Genesis 21:1-21

"Huwag kang matakot. Naririnig ng Diyos ang iyak ng iyong anak."

Sa mga panahong tayo’y nabibigatan sa mga problema at pasakit, tila ba imposible nang matapos ang ating pinagdaraanan. May mga pagkakataong buwan o taon na tayong tumatawag sa Diyos, ngunit parang wala pa ring pagbabago. Dahil dito, unti-unti tayong pinanghihinaan ng loob at nawawalan ng pag-asa.

Ngunit huwag tayong matakot. Sapagkat may Diyos na nakaririnig ng ating mga daing at nakaaalam ng ating mga luha. Tinupad ng Diyos ang Kanyang pangako kina Abraham at Sarah, kahit tila imposible ito sa paningin ng tao. Dinigin din Niya ang pag-iyak ni Hagar sa ilang at nagkaloob Siya ng tulong at pag-asa.

Ang Diyos na kumilos noon ay Siya ring Diyos na kikilos sa ating buhay ngayon. Sapagkat nangako Siya na hindi Niya tayo iiwan ni pababayaan man. Maaaring hindi pa natin nakikita ang Kanyang ginagawa, ngunit makatitiyak tayo na Siya’y patuloy na kumikilos sa likod ng ating mga sitwasyon.

Maaaring hindi pa ipinagkakaloob ng Diyos ang ating ipinapanalangin dahil hindi pa ito ang pinakamabuti para sa atin. Maaaring may inihahanda Siyang mas higit at mas mainam kaysa sa ating hinihiling. Kaya’t kailangan nating magtiwala sa Kanya at patuloy na lumakad sa landas na Kanyang inihanda.

Sapagkat ang Diyos ay may mabuting plano para sa ating buhay. At sa tamang panahon, makikita natin ang katuparan ng Kanyang mga pangako.

24/02/2026

Daily Morning Manna | Genesis 20:1-18

Huwag mong hayaang ang takot ang humawak ng manibela ng buhay mo.

May mga pagkakataon na dahil sa takot, nakakagawa tayo ng desisyong akala natin ay para sa proteksyon, pero sa huli ay nagdudulot ng problema. Pinapalabo ng takot ang isip at pinapahina ang pananampalataya. Gayunpaman, kahit nagkukulang ang tao, hindi nagkukulang ang Diyos. Siya ang kumikilos upang ituwid ang mali at pigilan ang mas malaking pinsala.

Kaya sa araw araw, bantayan ang puso laban sa takot. Ipanalangin muna ang mga desisyon bago kumilos. Kung nagkamali, aminin at ayusin agad. Piliin ang magtiwala at maging tapat, dahil doon mas malinaw ang paggabay ng Diyos.

Huwag hayaang ang takot ang magdikta ng iyong desisyon. Magtiwala sa Diyos, at hayaang Siya ang magtuwid ng iyong landas.

23/02/2026

Daily Morning Manna | Genesis 19:12-21

Hindi lahat ng pag alis ay pagkawala. Minsan, ito ay pagliligtas.

May mga pagkakataon na malinaw ang Kanyang direksyon. May mga sitwasyon at ugnayang hindi na naaayon sa Kanyang kalooban. Kapag paulit ulit na ang paalala, marapat lamang na tumugon nang may buong pagtitiwala. Ang paulit ulit na babala ay hindi para takutin ka, kundi para ingatan ka.

Hindi sapat ang bahagyang paglayo kung ang puso ay nananatiling nakakapit sa nakaraan. Ang tunay na pagsunod ay maagap at ganap. May mga bagay na kailangang bitawan upang marating ang mas ligtas at mas maayos na landas na inihahanda ng Diyos.

Sa araw na ito, pagnilayan kung may mga bagay ka nang dapat bitawan. Ang landas na itinuturo ng Diyos ay higit na ligtas kaysa sa anumang nakasanayan.

Ang kaligtasan ay nasa buong pagsunod. Kapag iniligtas ka ng Diyos, huwag ka nang lumingon pa.