Ang Linangan sa Imahen, Retorika, at Anyo (LIRA) ay samahan ng mga makatang nagsusulat sa Filipino. Itinatag noong 1985 ng Pambansang Alagad ng Sining para sa Panitikan Virgilio S. Almario (aka Rio Alma), nagsilbi itong matagumpay na linangan ng di iilang batikang makata, tulad nina Victor Emmanuel Carmelo Nadera, Romulo Baquiran Jr., Michael M. Coroza, Roberto Añonuevo, Rebecca Añonuevo, Jerry G
racio, at Edgar Calabia Samar. Noong 2011, kinilala ito bilang isa sa Ten Accomplished Youth Organizations (TAYO) para sa mga gawain ng paglilingkod sa ngalan ng tula ng mga makatang-boluntaryo nito. Ilan sa mga layunin ng LIRA ang palusugin at pagyamanin ang panulaang Filipino sa pamamagitan ng pag-aaral ng tradisyonal at modernistang tula, magbigay ng mga palihan at panayam, mag-organisa ng iba’t ibang okasyong pampanitikan at tumulong sa pagpapalimbag ng mga koleksiyon ng tula ng mga kabataang makata. Taon-taon, nagdadaos ang LIRA ng palihan at klinikang pampanulaan mula Hunyo hanggang Disyembre. Nagsisilbing tagapanayam at umuupo sa workshop ang mga kilala at premyadong makata at manunulat. Isang bahagi lamang ang klinika ng programang naglalayong maghasa ng mga makata-boluntaryong magiging bahagi ng iba pang paglilingkod ng LIRA. Ang isa pa ay ang Sining ng Tugma at Sukat (STS), isang karaban ng pagtuturo sa iba’t ibang panig ng bansa ng tula, panitikan, at pagiging makabayan. Buwanan ding tinutupad ng LIRA ang LIRAhan sa Conspiracy Bar, isang tanghal-tulang napapaloob sa napagkakasunduang tema. Ang mga nagsisipagtapos at nagiging kasapi ng LIRA ay nakikilahok sa mga gawaing ito ng pagpapaunlad sa panulaang Filipino. FACEBOOK: facebook.com/PalihangLIRA
INSTAGRAM:
TWITTER:
EMAIL: [email protected]
