TABAK PHL

22/05/2026

20/05/2026

Ang Tunay na Alyansa ng Bayan Alay sa Katutubo (TABAK) ay mariing naninindigan na dapat litisin at panagutin si Vice President Sara Duterte, matapos na na-impeach ng Kongreso, at agarang arestuhin si Senador Ronald “Bato” dela Rosa. Ang kanilang naging papel sa pagpapatuloy ng militarisasyon, red-tagging, at pang-aabuso sa karapatang pantao ng mga Katutubo, magsasaka, kababaihan, at kabataan ay malinaw na ebidensya ng kanilang pananagutan sa mamamayang Pilipino. Ang kanilang pananatiling malaya ay pagpapatunay ng pag-iral ng “impunity” o ng sistema ng kawalang pananagutan at hustisya sa bansa. Si Pangulong Ferdinand “Bongbong” Marcos Jr. naman ay hindi rin ligtas at dapat singilin at panagutin. Ang taumbayan ay hindi mananahimik habang ang mga korap at berdugong mga lider na ito ay patuloy na nagtatago sa likod ng kapangyarihan.

Sa panahon ng pamumuno ni Sara Duterte bilang Secretary ng Department of Education, hindi lamang mga g**o at kabataan ang ni-redtag, kundi maging ang mga Lumad schools na matagal nang nagbibigay ng edukasyon sa mga Katutubo ay sapilitang pinasara, na nagresulta sa libo-libong kabataang Lumad na nawalan ng karapatan sa edukasyon. Ang pananahimik ni Sara at pakikipagsabwatan sa militar upang gipitin ang mga Katutubo ay malinaw na pagbalewala sa karapatan ng mamamayan sa Mindanao. Ang impeachment kay Sara at kasunod na conviction ng Senado ay pagbibigay hustisya para sa mga komunidad na pilit na pinapatahimik, at ng sambayanang lumalaban sa umiiral na kultura ng kawalang pananagutan sa bansa.

Samantala, si Bato dela Rosa ay dapat managot sa kanyang papel sa libo-libong extrajudicial killings sa tabing ng war on drugs. Ito ay malinaw na bahagi ng mas malawak na kampanya ng militarisasyon at kriminalisasyon na pinagtatanggol ni Bato, na noon ay hepe ng PNP at ngayo’y senador ng bansa. Ang kanyang proteksyon mula sa mga kapwa pulitiko ay hindi dapat maging hadlang sa pag-usad ng hustisya. Nararapat lamang na arestuhin siya sa salang “crimes against humanity” at litisin siya sa International Criminal Court.

Ang panawagang Sara Panagutin, Bato Arestuhin ay laban ng malawak na sambayanan upang igiit ang karapatang mamuhay nang malaya, ligtas, at may dignidad. Ang conviction kay Sara Duterte at ang pag-aresto kay Bato dela Rosa ay mahalagang hakbang upang ipakita na walang opisyal ang nakatataas sa batas. Ito ay panimulang hakbang upang wakasan ang kawalan ng pananagutan sa mga krimen laban sa mamamayan.

Muli, pinagtitibay ng TABAK ang panawagan na panagutin at i-convict si Sara Duterte, arestuhin si Bato, wakasan ang impunidad, at itaguyod ang karapatan ng mamamayan. Ang laban na ito ay laban ng sambayanan, laban ng mga Katutubo, laban ng mga magsasaka, laban ng kababaihan at kabataan, laban ng lahat ng inaapi at pinipilit na pinatatahimik. Hindi titigil ang mamamayan hanggang makamit ang hustisya at tunay na demokrasya. #

20/05/2026

This year marks the 9th anniversary of the bombing of Marawi City by the Philippine military. Many question why tourism and the construction of another military camp were prioritized in the city’s reconstruction.

Hear more during the webinar this Friday May 22 commemorating the 9th anniversary of the declaration of Martial Law in Mindanao.

Register: https://forms.gle/PWk9NWKi8timbf9n9

17/05/2026

Ang Tunay na Alyansa ng Bayan Alay sa Katutubo (TABAK) ay taas-kamaong nagpapaabot ng pagbati at pakikiisa sa mga Dumagat na magsasaka na sina Avelardo “Dandoy” Avellaneda at Rocky Torres, na sa wakas ay nakalaya matapos ang halos walong taon ng pagkakakulong dahil sa mga gawa-gawang kaso. Ang kanilang paglaya ay hindi lamang tagumpay ng dalawang indibidwal, kundi tagumpay ng sama-samang lakas ng mga Katutubo, magsasaka, at mamamayan na patuloy na lumalaban sa pang-aabuso ng estado.

Ang kaso nina Dandoy at Rocky ay malinaw na patunay ng matagal nang kalakaran ng militarisasyon at kriminalisasyon laban sa mga Katutubo. Sa halip na kilalanin ang kanilang karapatan sa lupang ninuno at kabuhayan, sila ay tinarget ng gawa-gawang kasong murder at illegal possession of fi****ms and explosives, tinortyur, at pagkakakulong. Ang ganitong kalakaran ay hindi hiwalay na insidente, kundi bahagi ng mas malawak na estratehiya ng estado upang supilin ang mga komunidad na tumututol sa mapanirang proyekto ng pagmimina, dam, at iba pang neoliberal na interes.

Kasabay ng pagbati sa kanilang paglaya, nananawagan ang TABAK na palakasin ang kampanyang “Sabukan On! Palayain ang Lahat ng Katutubo, Moro, at Advocates na Bilanggong Pulitikal!”. Ang tagumpay nina Rocky at Dandoy ay dapat magsilbing inspirasyon upang ipagpatuloy ang panawagan para sa kalayaan ng lahat ng bilanggong pulitikal na biktima ng gawa-gawang kaso, militarisasyon, at pang-aabuso ng estado. Higit pa rito, dapat panagutin ang 2nd Infantry Division ng Armed Forces of the Phillipines sa iligal na pag-aresto, tortyur, at halos walong taon ng pagkakakulong na kanilang dinanas. Ang pananagutan ay mahalagang hakbang upang matiyak na hindi na mauulit ang ganitong uri ng pang-aabuso laban sa mga Katutubo at magsasaka.

Ang TABAK ay naninindigan para sa kalayaan at hustisya. Ang paglaya nina Avelardo “Dandoy” Avellaneda at Rocky Torres ay tagumpay ng buong sambayanan na patuloy na lumalaban para sa lupa, karapatan, at kalayaan. #

11/05/2026

Para kila Alyssa, Errol, Maureen, Lyle, Kai, at sa buong Toboso 19,

Taas-kamaong pagpupugay sa inyong giting at katapangan!
Kasing bigat ng Sierra Madre ang inyong sakripisyo para sa mamamayang pilit na binubura ng estado. Hindi ito ang wakas.

Magpapatuloy ang ating laban, hanggang sa tagumpay!
Mabuhay ang lahat ng martir ng sambayanan!
Hustisya sa Toboso 19! Hustisya sa Negros 19!

------

Sabi nila, “bakit sila naroon sa Negros?”
“Anong ginagawa nila doon?”
Estudyante, mamamahayag, organisador, aktibista
Pero parang ang mas dapat itanong
“Anong mayroon sa Negros?”

Isang malawak na kabukiran,
mayamang kabundukan,
Sa ilalim ng init na umaalingasaw sa mga sakahan,
Hindi ulan, Kundi bala ang humahalik sa lupa.

Hindi man madalas nakikita sa Facebook reels,
Sa instagram o Tiktok, ang ganitong mga realidad
Subalit, mulat na niyayakap ng mga kabataang
Puspusang inaaral ang lipunan

Iniwan ang sariling interes at karangyaan,
Upang ganap na paglingkuran ang sambayanan,
sa piling ng masa sa kanayunan,
Batid man ang kaakibat na panganib
Sa uring magsasaka, sila ay umanib

“Anong mayroon sa Negros?”
Tubuhan.
Magsasaka.
Militar.

“Anong mayroon sa Negros?”
Pang-aabuso.
Pangangamkam.
Pagsasamantala.

At hangga’t nananatili ang mga ito sa Negros,
Sa napakaraming komunidad sa ating bansa,
Naroon ang isang Alyssa,
Ang isang Errol, Maureen, RJ, Lyle, Kai

Silang mga ‘di pangkaraniwan,
Na nakikiisa. Nakikipamuhay. Nakikibaka.
Hanggang sa kanilang huling hininga.

03/05/2026

Noong nakaraang Mayo Uno, ating binigyang-pugay ang ika-123 taon ng mahabang kasaysayan ng pakikibaka ng uring manggagawa para sa makatarungang sahod, disenteng kabuhayan, at makatao at disenteng pamumuhay. Nakiisa ang Tunay na Alyansa ng Bayan Alay sa Katutubo (TABAK) sa isinagawang kilos-protesta kasama ang malawak na hanay ng mga manggagawa at mamamayang Pilipino sa Araw ng mga Manggagawa.

Habang patuloy ang paglala ng krisis, lalong pinapasan ng masa ang bigat ng mga pang-araw-araw na suliranin. Sa pagtindi ng pandaigdigang digmaan, partikular ang agresyon ng US-Israel, patuloy na nayayanig ang ating ekonomiya. Dahil dito, walang habas ang pagsirit ng presyo ng langis na siyang direktang nagdudulot ng pagtaas ng mga pangunahing bilihin at serbisyo. Damang-dama ito sa sikmura ng pangkaraniwang mamamayan na lalong naghihikahos at nalulugmok sa kahirapan.

Sa kabila nito, nananatiling kakarampot ang sahod ng milyun-milyong manggagawa. Malayong-malayo ito sa pagtamasa ng mga batayang pangangailangan, gayundin sa disente at makataong pamumuhay. Patuloy ang ating pangangalampag sa mga espasyo sa lansangan man o sa bulwagan ng parliyamento para itaguyod ang ating mga panawagan:

✅ P1,200 nakabubuhay na sahod para sa lahat ng manggagawa!
✅ Ibasura ang VAT at excise tax sa langis at mga pangunahing bilihin!
✅Tiyakin ang regular, disente, at ligtas na trabaho!
✅Panagutin ang LAHAT ng sangkot sa pagpapahirap sa sambayanan
✅Wakasan ang giyereng agresyon ng US-Israel!

Pilit mang buwagin ang hanay ng mamamayang nakikibaka, hindi kailanman matitinag at magagapi ang silakbo ng galit ng mamamayang uhaw sa panlipunang hustisya. Ang mga advocates na kaisa sa hanay ng mga magsasaka, Katutubo, Moro, manggagawa, at iba pang aping sektor ng lipunan ay titindig upang wakasan ang lahat ng uri ng pagsasamantala!

Mabuhay ang uring manggagawa! Imperyalismo Ibagsak!

30/04/2026

Ngayong araw, Abril 30, 2026, nagprotesta ang mga Katutubo, advocates, at kaanak ng Desaparecidos na sina Dexter Capuyan at Gene Roz Jamil "Bazoo" de Jesus sa harap ng pambansang himpilan ng Armed Forces of the Philippines, Quezon City.

Si Dexter ay isang Bontoc-Ibaloi-Kankanaey at si Bazoo naman ay isang Indigenous Peoples' rights advocate. Pareho silang dinukot ng mga ahente ng Criminal Investigation and Detection Group (CIDG) ng Philippine National Police (PNP) noong Abril 28, 2023, sa Taytay, Rizal.

Matapos ang paghahanap at pangangalampag ng kanilang mga pamilya sa mga kampo ng pulis at militar, mga pagdinig sa korte, at mga protesta ng mga Katutubo at advocates, hindi pa rin sila inililitaw ng estado.

Ang pagkakait ng mga pwersa ng estado kagaya ng CIDG at Armed Forces of the Philippines (AFP) sa impormasyon at kalayaan nina Dexter at Bazoo ay patunay ng nagpapatuloy na pasismo laban sa mamamayan. Sa gitna ng mga atake at kakulangan sa serbisyo sa mga Katutubong komunidad, isinusulong nina Dexter at Bazoo ang mga karapatan at kapakanan ng mga Katutubo.

Dinudukot ang mga aktibista, sinasampahan ng mga gawa-gawang kaso ang human rights defenders, minimilitarisa at bonobomba ang mga komunidad, pinapatay ang mga lumalaban para sa ating mga karapatan. Sa ganitong kalagayan, makatwiran ang paglaban ng mamamayan. Wasto ang pakikipamuhay, pananaliksik, at pakikibaka sa mga komunidad ng mga Katutubo, magsasaka, at iba pang aping sektor, kagaya ng ginawa ng 19 indibidwal sa Toboso, Negros Occidental. Ngunit, sa pagsusumikap at pakikibaka ng mamamayan, karahasan ang tugon ng estado. Pinatay ng Armed Forces of the Philippines ang Toboso 19 na nagtataguyod ng karapatan ng mamamayan.

Matatag na tumitindig ang Tunay na Alyansa ng Bayan Alay sa Katutubo (TABAK) kasama ang mga kaanak at kaibigan nina Dexter at Bazoo. Tatlong taon na ang lumipas ngunit nananatiling walang imik at aksyon ang rehimeng Marcos Jr. at mga pwersa nito. Umiiral ang pasismo ng estado laban sa mga Katutubo, advocates, at mamamayang nakikibaka para sa lupang ninuno at sariling pagpapasya.

Nananawagan kami sa mga Indigenous Peoples’ rights advocates na suportahan at makilahok sa ating panawagan na ilitaw nang ligtas at buhay sina Dexter, Bazoo, at lahat ng Desaparecidos. Panagutin ang PNP-CIDG, AFP, at si Marcos Jr. sa paglabag nila sa karapatan ng mamamayang Pilipino. #

30/04/2026

29/04/2026

Sa ika-42 taon ng Peoples Cordillera Day, mahigpit na nakikiisa ang Tunay na Alyansa ng Bayan Alay sa Katutubo (TABAK) sa pakikibaka ng Kaigorotan para sa kanilang buhay, lupa, at kabuhayan. Muling pinagtitibay ng TABAK ang paninindigan laban sa mga dambuhala at mapanirang minahan at dam, at patuloy na paglabag sa karapatan ng mga Katutubo.

Sa Cordillera, nananatiling banta ang 118 aplikasyon ng renewable energy projects, karamihan ay hydropower dams na nagdudulot ng pagkasira ng kabuhayan, sapilitang paglikas ng mga komunidad, at pagkawala ng mga sagradong lugar. Sa pagmimina, mahigit 100 aplikasyon para sa malakihang operasyon ang nakatala, kabilang ang mga kumpanya sa Benguet na nagdulot ng matinding kontaminasyon ng tubig, pagguho ng lupa, at pagkasira ng kalikasan. Sa Mankayan, Benguet, ipinagpatuloy pa rin ang operasyon ng Crescent Mining and Development Corporation sa saklaw na higit 500 ektarya kahit paso na ang lisensya at walang Free, Prior, and Informed Consent (FPIC).

Kasabay ng mga proyektong ito ang matinding militarisasyon. Ayon sa Global Witness, nananatiling pinakamapanganib ang Pilipinas para sa mga land at environmental defenders. Isang-katlo ng lahat ng pagpatay sa mga tagapagtanggol ng kalikasan ay may kaugnayan sa pagmimina. Sa Cordillera, karaniwan ang harassment, red-tagging, at trumped-up charges laban sa mga Katutubo at advocates na tumututol sa mga mapanirang proyekto. Magtatatlong taon na ang lumipas mula nang dukutin ng CIDG sina Dexter Capuyan, isang Bontoc-Ibaloi-Kankanaey, at Bazoo de Jesus, isang Indigenous Peoples’ rights advocate. Patunay ito ng patuloy na pag-atake sa buhay at seguridad ng mga lumalaban.

Dagdag pa rito, tumitindi ang kriminalisasyon ng mga Katutubo, kabilang ang mga gawa-gawang kaso sa ilalim ng Anti-Terrorism Act at Terrorist Financing Prevention and Suppression Act of 2012. Ang mga kasong ito ay nagiging sandata ng estado upang patahimikin ang mga tumututol sa mapanirang proyekto at ang mga nagtataguyod ng karapatang pantao.

Sa kasalukuyan, mayroong 23 bilanggong pulitikal sa Cordillera, ayon sa Cordillera Human Rights Alliance. Kabilang dito ang walong Katutubo at advocates na inaresto noong Marso 11, 2026 sa Tarlac City at Quezon City, kabilang sina NDFP Peace Consultant Kennedy Bangibang, community doctor Ana Marie Rilloraza, at iba pang kilalang aktibista. Ang kanilang pagkakakulong ay malinaw na patunay ng kawalang-katarungan sa bansa kung saan ang mga korap ay malaya, habang ang mga lumalaban para sa tunay na pagbabago ay tinatrato bilang kriminal.

Nagpapatuloy ang krisis na kinakaharap ng mamamayan. Ang imperyalistang gera ng Estados Unidos sa Kanlurang Asya, lalo na sa mga bansang may langis, ay nagdulot ng matinding pagtaas ng presyo ng krudo. Para sa Pilipinas, na umaangkat ng langis, ang epekto ay direktang tumama sa kabuhayan ng mga ordinaryong mamamayan, kabilang ang mga Katutubo. Ang jeepney drivers ay nawawalan ng kita, ang mga magsasaka ay nalulugmok sa mataas na gastos sa transportasyon at farm inputs, habang nananatiling mababa ang presyo ng kanilang ani. Ang mga Katutubong komunidad, na matagal nang nakasalalay sa lupa at likas-yaman, ay lalong pinapasan ang bigat ng krisis na ito.

Ang mga datos na ito ay hindi lamang numero. Ito ay mga kwento ng mga pamilya na nawalan ng tahanan, mga kabataan na nawalan ng kinabukasan, at mga Katutubong komunidad na patuloy na lumalaban para sa kanilang karapatan sa lupang ninuno at sariling pagpapasya. Sa harap ng lahat ng ito, higit na mahalaga ang gampanin ng mga Indigenous Peoples’ rights advocates, hindi lamang bilang tagamasid kundi bilang aktibong katuwang sa pakikibaka.

Sa sama-samang paglaban ng mga Katutubo, Moro, at advocates, naipapakita na ang laban ng Cordillera ay hindi hiwalay sa laban ng sambayanang Pilipino para sa tunay na katarungan, kaunlaran, at demokrasya.

Igiit ang karapatan ng mamamayan at mga Katutubo ng Cordillera sa lupa, buhay, at kabuhayan! Tutulan ang imperyalistang gera ng Estados Unidos na lalong nagpapahirap sa mga Katutubo at mamamayan! Palayain ang mga bilanggong pulitikal! Wakasan ang terrorist designation at ibasura ang mga gawa-gawang kaso laban sa mga Katutubo at advocates!

Agbiag ti umili ti Kordilyera! Mabuhay ang sambayanang nakikibaka!

(Ang mga larawan ay kuha sa pagdiriwang ng ika-42 Peoples’ Cordillera Day sa Sitio Madange, Brgy. Dacudac, Tadian, Mountain Province, ika-24 ng Abril, 2026.)

21/04/2026

"Imbis na tugunan ng rehimeng Marcos Jr. ang krisis na lubhang nakaaapekto sa sa mga Katutubo, Moro, at sambayanang Pilipino, itinutulak pa nito ang pagtatayo ng renewable energy projects sa mga lupang ninuno. Dagdag pa rito, sa ilalim ng Pax Silica Initiative ng imperyalistang Estados Unidos, mangangamkam ng critical minerals dito sa Pilipinas upang paunlarin ang mga armas ng US. Ito raw ay para sa economoc security. Ngunit para sa mga Katutubo at Moro, ito ay malinaw na pangangamkam at pagnanakaw ng mga likas-yaman at maging ng aming mga lupang ninuno," binigyang diin ni Kim Falyao, isang Igorot at National Coordinator ng Bai Indigenous Women's Network, Abril 21, 2026.