04/07/2026
Hulyo 5, 2026, Linggo
Bandang alas dos ng madaling araw
Maraming iyak, sigaw, at mga panalanging pabulong ang maririnig sa gitna ng dilim. May mga magulang na unang hinahanap at inililigtas ang kanilang mga anak. May mga apo na umaalalay sa kanilang mga lolo at lola. May mga taong inuuna ang mga PWD at may karamdaman bago ang kanilang sarili. May mga pilit na nagsasalba ng mahahalagang dokumento, gamit, at mga naipundar sa mahabang panahon dahil bunga iyon ng kanilang pagsisikap at sakripisyo.
May mga nagmamadaling kumatok sa mga kapitbahay upang magbabala. May mga nagtatakbuhang may hawak na timba ng tubig. May mga nakatanaw lamang sa malayo, nanginginig at walang magawa kundi panoorin kung paano unti-unting nilalamon ng apoy ang mga tahanang minsang naging saksi sa mga pangarap, saya, at pagsubok. At higit sa lahat, may mga tahimik na panalangin at malalakas na bulong na umaabot sa Panginoon, humihiling na sana ay mapigilan na ang pagkalat ng apoy at mailigtas ang lahat.
Napakahirap masaksihan ang ganitong sitwasyon. Puro takot, taranta, at pangamba ang bumabalot sa bawat isa. Nakakatakot at nakaka-trauma ang makita ang apoy na unti-unting sumisira sa tahanang pinaghirapan at minahal. Ilang beses na itong nangyari sa aming lugar. Ilang beses na rin naming naranasan ang parehong takot at pangamba. Hanggang kailan kaya matatapos ang ganitong klase ng trauma?
Ngunit sa kabila ng lahat, nananatili ang aming taos-pusong pasasalamat. Muli kaming iniligtas ng Panginoon at hindi Niya kami pinabayaan. Muli Niya kaming binigyan ng pagkakataong manatiling ligtas at hindi tuluyang mawalan ng tahanan at pag-asa.
Maraming salamat din sa mga taong nagpakita ng tunay na diwa ng bayanihan—sa agarang bayanihan at mabilis na rumesponde sa oras ng pangangailangan. Kung hindi dahil sa inyong agarang pagkilos, maaaring mas malaki pa ang pinsala at mas marami ang naapektuhan.
Maraming salamat, Panginoon, sa walang sawang paggabay, proteksyon, at pagdinig sa aming mga panalangin. Maraming salamat sa mga taong ginagamit Mo bilang instrumento ng tulong at pag-asa sa mga panahong puno ng takot at pagsubok.
Patuloy naming ipinagdarasal ang kaligtasan, pagbangon, at kapanatagan ng lahat ng naapektuhan ng sunog sa Ibayo 2. 🙏❤️🔥
