16/06/2026
RIGHT TO INFORMATION ACT, APRUBADO NA SA KAMARA AT SENADO
Isang malaking tagumpay para sa transparency at pananagutan sa pamahalaan ang pagkakapasa sa ikatlo at pinal na pagbasa ng Right to Information (RTI) Act sa parehong Kamara de Representantes at Senado.
Sa Kamara, ang House Bill No. 9397 ay isang pinagsamang panukala mula sa iba't ibang mambabatas, kabilang ang House Bill No. 2897 na inihain ng pitong kongresista ng Partido Liberal—Mamamayang Liberal Party-list Rep. Leila de Lima, Caloocan 2nd District Rep. Edgar "Egay" Erice, Albay 1st District Rep. Krisel Lagman, Dinagat Islands Rep. Kaka Bag-ao, Zamboanga del Norte 3rd District Rep. Adrian Amatong, Muntinlupa Rep. Jaime Fresnedi, at Oriental Mindoro Rep. Alfonso Umali Jr.
Sa Senado naman, kabilang si Senador Francis "Kiko" Pangilinan bilang co-author ng bersyon ng panukala na naaprubahan na rin sa ikatlo at pinal na pagbasa.
Layunin ng Right to Information Act na tiyakin ang karapatan ng bawat Pilipino na magkaroon ng access sa mga impormasyon at dokumentong hawak ng pamahalaan, maliban sa mga itinuturing na sensitibo ayon sa batas. Sa pamamagitan nito, mapapalakas ang transparency, pananagutan, at pakikilahok ng mamamayan sa demokratikong proseso.
Dahil kapwa aprubado na ng dalawang kapulungan ng Kongreso, inaasahan na lamang ang pagpupulong ng bicameral conference committee upang pagtibayin ang pinal na bersyon ng panukala bago ito isumite para sa paglagda ng pangulo bilang ganap na batas.
Matagal nang isinusulong ng Partido Liberal ang pagpasa ng isang batas sa karapatan sa impormasyon bilang mahalagang sandigan ng mabuting pamamahala at aktibong mamamayan.
Ang Right to Information ay hindi lamang tungkol sa pagbubukas ng mga rekord ng gobyerno—ito ay pagkilala na ang impormasyon ay pag-aari ng taumbayan, at ang katotohanan ay mahalagang pundasyon ng demokrasya.
