02/03/2026
BABAE KA, HINDI BABAE LANG
Isinulat ni Lanz
Sa bawat unos na dumurog sa iyong pangalan,
hindi ka natinag—lalo kang lumaban.
Sa bawat luhang palihim mong pinahid,
may apoy na mas lalong nag-alab sa iyong dibdib.
Hindi ka hinubog ng sakit para masira—
hinubog ka nito para maging isang sandata.
Isang babaeng hindi yumuyuko at sumusuko
hindi natitinag, hindi nagpapasupil kahit kanino.
Saksi ang panahon sa iyong lakas at tapang,
kaya’t huwag na huwag mong hayaang sabihing “BABAE KA LANG.”
Ikaw ang dugong nananalaytay kay Gabriela Silang—
mapanghimagsik, makabayan, walang takot lumaban para sa karamihan.
Ngumiti ka man, hindi iyon kahinaan—
iyon ay patunay na kaya mong magningning
kahit sa gitna ng kadiliman.
Ang ganda mo’y hindi lamang sa panlabas anyo—
kundi ito’y talas ng isip, tibay ng puso.
Hindi ka prinsesang naghihintay mailigtas.
Ikaw ang reynang nagpapakita ng lakas.
Ikaw ang mandirigmang may puso,
may dangal, at may sariling tono.
Protektahan mo ang puso mong marunong magmahal,
ngunit huwag mong ibigay sa kamay na hindi marunong mag-ingat.
Hindi ka isinilang para paiyakin—
isinilang ka para igalang, itaas, at ipaglaban.
Tandaan mo—
BABAE KA.
Makapangyarihan.
Matatag.
Mapanghimagsik kung kinakailangan.
At kailanman—
HINDI KA BABAE LANG.
PAGBATI PARA SA PANDAIGDIGANG PAGDIRIWANG NG BUWAN NG KABABAIHAN! ✊
