10/09/2026
𝐒𝐢𝐦𝐛𝐚𝐡𝐚𝐧, 𝐋𝐆𝐔 𝐧𝐚𝐧𝐠𝐮𝐧𝐠𝐮𝐧𝐚 𝐬𝐚 𝐫𝐞𝐧𝐞𝐰𝐚𝐛𝐥𝐞 𝐞𝐧𝐞𝐫𝐠𝐲 𝐩𝐮𝐬𝐡 𝐬𝐚 𝐌𝐢𝐧𝐝𝐨𝐫𝐨
https://hatawtabloid.com/2026/09/09/simbahan-lgu-nangunguna-sa-renewable-energy-push-sa-mindoro/
CALAPAN CITY, Oriental Mindoro — Nagkakaisa ang Simbahang Katolika, mga lokal na pamahalaan at mga environmental group sa pagsusulong ng renewable energy sa Mindoro, habang inilulunsad ang mga proyekto sa solarization at kampanyang naglalayong bawasan ang matagal nang pagdepende ng isla sa mahal at maruming diesel power.
Sa pangunguna ng Diocese of Calapan, 19 sa 43 parokya at pasilidad nito ang gumagamit na ngayon ng solar energy—halos kalahati ng target ng diyosesis sa tatlong taong programa nito upang i-solarize ang mahahalagang institusyon at serbisyo sa mga komunidad.
Ayon kay Calapan Bishop Moises Cuevas, nakamit ang bilang sa loob lamang ng walong buwan mula nang simulan ang programa.
Sinabi niyang ilang Catholic schools ang naghahanda na rin lumipat sa solar energy bilang bahagi ng layunin ng Simbahan na magpakita ng isang konkretong modelo para sa iba pang institusyon.
Kasabay nito, inilunsad ng mga green energy advocates ang REnew Mindoro Caravan, isang kampanyang naglalayong palawakin ang access ng mga Mindoreño sa renewable energy at itulak ang solar power bilang alternatibo sa suliranin ng mataas at hindi matatag na presyo ng koryente sa isla.
Ang caravan ay isinagawa sa pakikipagtulungan ng mga simbahan at lokal na pamahalaan, na may layuning pag-ugnayin ang mga komunidad sa renewable energy providers at financing institutions.
Ayon kay Gerry Arances, executive director ng Center for Energy, Ecology, and Development (CEED), nananatiling malaking hamon ang matinding pagdepende ng Oriental Mindoro sa diesel.
Aniya, 91.43 porsiyento ng power capacity ng Oriental Mindoro ay mula sa diesel, habang ang generation rate nito ay umaabot sa P11.47 kada kilowatt-hour, kompara sa P5.74 kada kWh para sa hydropower.
Sa isa pang pagtataya, sinabi ni Arances na ang singil sa koryente sa Mindoro na gumagamit ng diesel ay umabot ngayong taon sa hanggang P18.29 kada kWh, dahilan upang maging mas mabigat ang pasanin ng mga consumers.
“Every centavo increase is yet another reason to make the switch to renewable energy,” ayon kay Arances.
Iginiit niyang hindi dapat ituring ang solar power bilang teknolohiyang malayo sa ordinaryong mamamayan.
May tinatayang peak demand na 122 megawatts ang Oriental at Occidental Mindoro, samantala, tinukoy ng Climate Analytics ang tinatayang 34,760 MW renewable energy potential sa isla.
Dahil dito, sinabi ng mga tagapagtaguyod ng REnew Mindoro na may malaking pagkakataon ang lalawigan na maging modelo ng community-centered renewable energy.
Binigyang-diin ni Bishop Cuevas na ang solarization ay hindi dapat limitado sa mga pasilidad ng Simbahan.
Aniya, maaari itong palawakin sa iba pang mga parokya, paaralan, local government units at mga kabahayan, lalo sa mga indigenous people at mga komunidad na higit na naaapektohan ng mahal at hindi maaasahang supply ng koryente.
Idinagdag niya na ang pagpapalawak ng access sa renewable energy ay may kaugnayan sa pagprotekta sa dignidad at kapakanan ng mamamayan.
Nanawagan din siya ng mas malawak na pagtutulungan ng Simbahan, paaralan, pribadong sektor, pamahalaan, mga financial institutions at mga lokal na komunidad upang maisulong ang energy transition.
Para kay Rev. Fr. Edwin Gariguez, lead convenor ng Protect Verde Island Passage, ang paglipat mula sa fossil fuels tungo sa renewable energy ay mahalagang bahagi ng pangangalaga sa kapaligiran, lalo na sa panahon ng Season of Creation.
Sinabi niyang ang Verde Island Passage ay hindi dapat ituring na isang yamang maaaring isakripisyo para sa fossil fuel development.
Sa halip, aniya, ang pagpapalawak ng distributed renewable energy gaya ng rooftop solar systems ay maaaring makatulong sa pagbibigay ng koryente sa mga komunidad nang hindi isinasakripisyo ang kaligtasan ng karagatan at kapaligiran.
Samantala, sinuportahan ng lokal na pamahalaan ng Mansalay ang REnew Mindoro Caravan bilang bahagi ng pagpapalawak ng kaalaman ng mga Mindoreño hinggil sa solar power.
Ayon kay Mansalay Vice Mayor Jose Ildefonso Maliwanag, layunin ng caravan na ipakita sa mga mamamayan na ang solar energy ay maaaring maging isang mas praktikal at mas abot-kayang alternatibo para sa kanilang pangangailangan sa koryente.
Ang magkakasunod na solarization projects at REnew Mindoro Caravan ay bahagi ng lumalawak na panawagan para sa isang energy transition sa Mindoro—mula sa fossil fuel dependence tungo sa renewable energy na mas malapit, mas malinis at mas abot-kamay ng mga komunidad. (𝙏𝙀𝘿𝘿𝙔 𝘽𝙍𝙐𝙇)
