09/05/2026
"Ang Pagsamo ng Isang Wasak” 💔
Maganda araw Kuya PS at sa lahat, ako nga pala si Efren, 35/M, binata at taga-La Union.
Sa araw ako’y nagbubuhat ng semento, naghahalo ng graba, at nag-aasam na sana’y matapos na ang isang palapag. Ngunit paglubog ng araw, ako’y binubuhat ng alak, sinusugal ang aking sahod, at sinasamahan ng barkadang unti-unting pumapatay sa akin. Masaya ako pag kasama ko sila. Gusto ko na palaging sumapit na ang araw ng sahod, weekly ang sahuran namin.
Ngayon ako’y nakatitig sa aking wallet: zero balance na nga, may utang pa akong sampung libo kay pareng Botong.
Ang aking mga kamay na puno ng kalyo sa pagtatrabaho, ay siya ring mga kamay na pumipindot ng p**a at itim sa tong-its, inom alak at minsan sa online sabong din.
Sabi ng foreman ko, “Efren, sayang ka. Ang lakas mo, pero ang utak mo nasa bote at baraha.”
Kahapon, tumawag ang nanay ko.
Umiiyak.
“Anak, wala na tayong pambili ng gamot ng tatay mo.”
At ako?
Nasa inuman.
Sagot ko, “Ma, next sahod na lang.”
Pero alam kong hindi rin. Dahil ang next sahod, nakataya na sa sabong. May adiksyon na ako sa sugal at alak.
Ako ang panganay.
Ako ang dapat sumalo.
Pero ako ang unang bumagsak, minsan gusto ko ng mawala na lang sa mundo.
Mga kapatid, mga tagasubaybay ni Kuya PS, ako’y lumalapit sa inyo hindi para manghingi ng pera. Ako’y nanghihingi ng direksyon. Naliligaw na ako. Ang sugal, alak, at barkada ay naging asawa ko, pero binubugbog ako araw-araw.
Gusto kong bumangon. Gusto kong makabayad ng utang. Gusto kong makita ni nanay na may pag-asa pa ako. Paano ako magsisimula kung baon ako sa kahihiyan?
Napapagod na akong maging si Efren na construction worker sa umaga, at Efren na pulubi sa gabi.
Kung may isang hakbang lang na pwede kong gawin ngayong araw para makalayo sa dagok na ito, ano iyon?
Sabihin niyo sa akin. Hindi ko na kayang mag-isa. Tulungan niyo akong tulungan ang sarili ko, salamat po...
Kailangang kailangan ko talaga ng tulong sa ngayon. 🙏
- Efren
-------
Ano ang maipapayo mo kapatid?
Please don't forget to FOLLOW, Like and Share.
゚
