10/09/2026
Magandang araw, mga Kabarangay!
Nais lamang po naming magbigay-linaw tungkol sa pamamahagi ng Go Bag sa ating Barangay.
Ang pamamahagi po nito ay talagang by batch. Noong unang batch, limitado lamang po ang budget na nagmula sa financial assistance na ipinagkaloob ni Mayora, kaya’t kinailangang unahin muna ang mga lehitimong may-ari ng bahay.
Sa kasalukuyan, nagpapatuloy na po ang susunod na batch gamit naman ang pondo ng Barangay sa ilalim ng BDRRM Fund. Ongoing na rin po ang pamamahagi ng mga stub at pansamantala lamang itong nahinto kanina dahil sa malakas na ulan.
Nais din po naming linawin na wala pong pinipili ang Barangay pagdating sa anumang uri ng ayuda o programa—kakampi man o hindi. Ang serbisyo ng Barangay ay para sa lahat.
Matagal na rin pong naipabatid, kabilang sa ating mga Barangay Assembly, na ang proyektong ito ay ipatutupad nang by batch dahil hindi kayang sabay-sabay na mabigyan ang lahat sa limitadong pondo.
Nauunawaan po namin na madaling magkaroon ng agam-agam kapag may nakikitang ibang nakatanggap na at ang iba naman ay naghihintay pa. Ngunit sana po, bago natin sabihing “pinipili lamang ang binibigyan,” alamin muna natin ang buong proseso at tamang impormasyon.
Bukas po sa lahat ang proyektong ito. Hindi porke’t hindi pa nabibigyan ay hindi na mabibigyan. May proseso at may nakatakdang batch lamang po tayong sinusunod.
Maraming salamat po sa inyong pang-unawa at pakikiisa. Patuloy po tayong magtulungan para sa maayos at patas na serbisyo para sa lahat ng ating Kabarangay. 💜
