16/06/2026
STATEMENT
Noong Hunyo 13, nakaranas ng panghaharas ng militar, intimidasyon, at sapilitang interogasyon si Angel Lopez habang nasa community immersion sa Nueva Vizcaya.
Habang nasa isang aktibidad kasama ang komunidad, sinundo si Angel ng kanyang pamilya na may kasamang mga nakasibilyang militar. Habang nasa sasakyan kasama ang apat na intelligence agents bilang convoy, dinala siya sa isang kainan kung saan isinagawa ang interogasyon. Siya at ilang boluntaryo sa komunidad ay kinunan din ng litrato at pinrofile.
Ang sapilitang pagsama at interogasyon kay Angel ay malinaw na anyo ng panghaharas at intimidasyon. Sa kabuuan ng interogasyon, siya ay dumanas ng red-tagging at walang basehang mga akusasyon. Ginamit ang bulnerabilidad ng pamilya ni Angel upang patuloy na pilitang siyang umanoy sumuko. Bagamat ligtas na nakauwi si Angel ay nagpapatuloy ang intimidasyon at pagrered-tag sa kaniya.
Sa kasalukuyan, kinakaharap ng Nueva Vizcaya ang sunud-sunod na paglabag sa karapatan ng mamamayan at sa kalikasan nito. Noong nakaraang taon, iniulat ang pagpasok ng Woggle Corporation, isang British-owned company, sa Dupax del Norte para sa eksplorasyon ng ginto. Mariin itong tinutulan ng mga komunidad, na naglatag ng barikadang bayan upang hadlangan ang operasyon at ang pagwasak sa kabundukan. Matatandaang noong Pebrero 2026, nagdeploy ang reaksyunaryong gobyerno ng humigit-kumulang 300 kapulisan upang buwagin ang barikada at arestuhin ang pitong indibidwal—anim ay kababaihan at karamihan ay mga senior citizen.
Sa mga sumunod na panahon, sinampahan din ng mga kaso ang ilang environmental defenders na lumahok sa pagbabarikada, sa kabila ng kanilang mapayapang pagtatanggol sa lupang ninuno at kalikasan. May mga ulat din ng pagkalat ng mga operatiba ng intelihensiya sa mga barikada, na nagdulot ng pangamba at patuloy na paniniktik sa hanay ng mga nagtatanggol sa komunidad.
Hindi lamang sa Dupax del Norte umiigting ang banta. Sa Kasibu, Nueva Vizcaya, naroon ang North Luzon Mineral Resources Corporation kung saan muling nagsusulputan ang mga panibagong barikada bilang tugon sa nakaambang operasyon ng pagmimina. Hanggang sa kasalukuyan, may mga ulat ng intimidasyon at pananakot sa mga nagbabarikada sa Kasibu, kasabay ng presensya ng militar sa ilang barangay na lalong nagpapalala sa tensyon sa lugar.
Bilang mga inhinyero ng bayan, lantad ang pangangailangan para sa isang agham na nagsisilbi sa mamamayan. Hindi dapat ginagamit ang kaalaman at kakayahan ng mga estudyante at propesyunal upang patuloy na wasakin ang kalikasan at agawan ng kabuhayan ang mga komunidad.
Si Angel ay isang estudyante sa Kolehiyo ng Inhinyeriya kung saan nagsilbi siyang chairperson ng UP Diliman Engineering Student Council nakaraang taon, at kasalukuyang councilor-elect ng UP Diliman University Student Council ngayon. Siya rin ay miyembro ng Agham Youth UP Diliman, na bahagi ng mas malawak na alyansang pangkalikasan na Youth Adovcates for Climate Action Philippines (YACAP). Nagtungo siya sa Nueva Vizcaya upang lumahok sa community immersion at tumulong sa paglulunsad ng environmental investigative mission sa mga lugar na lubhang apektado ng mapanirang pagmimina.
Bilang estudyanteng inhinyero, pinili ni Angel na gamitin ang kanyang talino at kakayahan upang magsilbi sa masang dumaranas ng matinding pandarambong mula sa malalaking korporasyon. Dahil sa mga proyektong ito, patuloy na ginagamit ang militar ng estado upang supilin ang mamamayang lumalaban para sa kanilang karapatan. Mangahas rin na nagsasalita si Angel sa mga isyung lapat sa sikmura ng mga mamayan, kabilang ang mga sunod sunod na korapsyon sa flood control projects at tumitinding krisis pan-ekonomiya. Lantad ang walang habas na pasismo ng estado, lalo na laban sa mga kabataang kumikilos para sa makamasang agham at sa pagtatanggol ng kalikasan.
Mariing kinukundena ng Agham Youth ang sapilitang interogasyon at panghaharas na isinagawa ng militar laban kay Angel, na nakikipamuhay sa mga komunidad na apektado ng mapanirang pagmimina. Tinututulan din ng Agham Youth ang paulit-ulit na paglabag ng reaksyunaryong gobyerno sa karapatang pantao ng mga kabataang aktibista na sumusuporta sa laban ng mga inaaping mamamayan.
Ang tuloy-tuloy na militarisasyon sa kanayunan, red-tagging, at panghaharas laban sa hanay ng mga kabataang estudyante at tagapagtanggol ng kalikasan ay hindi dapat palampasin. Nananawagan ang mga kabataang siyentista ng pananagutan sa lahat ng anyo ng paglabag sa karapatang pantao sa bansa.
End Environmental Plunder! Uphold International Humanitarian Law! Militar sa Kanayunan, Palayasin!
