01/06/2026
SURAT SERYE para sa bulan nin Hunyo
Namumutan kong mga Nanay asin Tatay,
Nag-aabang an bilog na nasyon sa Impeachment Trial kan Bise Presidente Sara Duterte. Kan nakaaging bulan, kan aldaw na pinadara kan Kamara an mga dokumento sa Senado, biglang nagkaigwang coup or pagribay nin presidente sa Senado hali ki Tito Sotto pasiring ki Allan Cayetano.
Bigla man nagbutwa si Bato de la Rosa tanganing makaboto, saka nagdulag huli ta yaon na an warrant of arrest hali sa ICC. An saiyang pagdulag sa hustisya natabangan kan plinanong ribok sa Senado kasabay kan drama na linusob sinda. An trese na Senador na iyo na an nasa mayoriya sangkot sa manlainlain na krimen.
An nakakamundo iyo na an mga ini binotohan kan mga tawo. Asin dawa ladlaran na an panloloko sa mga Pilipino, dakul pa man giraray an nagtutubod sainda.
Kitang mga mga nasa gayad kan banwaan may dakulang kapangyarihan na makahawas sa kasakitan bunga kan kurapsyon. An kakayahan na ini mapuon sa pagpili nin mga tunay na lider, bakong peke. Itong mga lider na talagang nag-iisip kan kapakanan kan mga Pilipino.
Mahalaga an papel kan Senado. Sinda an mga mambabatas na nag-iimbestiga kan mga kurapsyon tanganing magbugtak nin mga batas na mapara na an kurapsyon ini sa Pilipinas. Alagad, pano sinda makakaimbestiga na sinda ngani mismo an mga kurap, an mga kriminal, asin an mga nagkukupkop kan mga kriminal.
An bulan na Hunyo, bulan kan Mahal na Puso ni Jesus. Sa Hunyo 12, iyo an saiyang solemnidad. Pagirumdom ini na dapat kitang magkaigwang puso siring ki Jesus, na nagmamakulog sa kapwa asin sa banwaan. Aldaw man ini kan satong Indepedensya, an paglaya o katalingkasan ta sa kamot kan mga dayuhan. Lugod, an ano man na katalingkasan magpuon sa katalingkasan sa kasalan, katalingkasan sa pansadiring interes. Huli ta an tunay na katalingkasan yaon sa laog kan satuyang mga puso.
-----
An Surat Serye regular na kolum ni Fr. Wilmer Joseph S. Tria sa Bunabon, an opisyal na newsletter kan CCMF-Bikol.
