09/04/2026
𝗟𝗔𝗧𝗛𝗔𝗟𝗔𝗜𝗡 | 𝗠𝗔𝗦𝗔: 𝗠𝘂𝗹𝗮 𝘀𝗮 𝗧𝗮𝗵𝗶𝗺𝗶𝗸 𝗻𝗮 𝗔𝗻𝘁𝗮𝗹𝗮, 𝗦𝗶𝘀𝗶𝗯𝗼𝗹 𝗮𝗻𝗴 𝗗𝗶𝘄𝗮
Noong taong 2016, ang Malayang Samahan ng Agham Panlipunan (MASA) ay naitatag sa pamumuno nina Chairman Keiven Encarnacion pati na rin ang kanilang tagapayo na si Randolf Warren Gregorio T. Mayo. Ang MASA ay isang organisasyong naglalayong makabuo ng matatag at malayang samahan sa mga mag-aaral ng Bachelor of Arts in Social Sciences (BASS) upang makapagbigay ng espasyo sa bawat mag-aaral nang sa gayon ay mas umusbong ang kanilang kakayahan at kasanayan sa larangan ng agham at lipunan. Layunin din nito ang makabuo ng isang inklusibo, buo, at matibay na komunidad para sa mga mag-aaral ng BASS gayong bilang lamang ang mga mag-aaral sa nasabing programa. Gayundin, tunguhin din nito ang pagbibigay ng tulong pang-akademiko at propesyonal sa pamamagitan at tulong ng mga alumni, at mga workshop na kanilang isinasagawa.
Hindi lamang ang mga kinatawan ng MASA ang nangarap para sa maliwanag at maunlad na kinabukasan ng organisasyon. Kasama rin nila ang mga mag-aaral na may naglalagablab na pagmamahal at natatanging interes sa lipunan sa muling pag-usbong ng organisasyon. Maraming pangarap at aktibidad ang nabuo, gayundin ang pagkakaisa at samahan ng mga kinatawan at buong miyembro ng MASA sa mga panahong nagdaan.
𝘼𝙣𝙜 𝙢𝙞𝙩𝙨𝙖 𝙣𝙜 𝙗𝙖𝙜𝙤𝙣𝙜 𝙖𝙡𝙖𝙗
Sa paglipas ng taon kasabay ng pag-usbong ng samahan ng organisasyon, ang apoy ng MASA ay huminto sa pagniningas at unti-unting naglaho noong taong 2023. Ngunit matapos ang tatlong taong paghinto, muling nagbabalik ang MASA upang buhayin ang layunin nito. Sa muling pag-ugong ng pangalang ito, bitbit ng organisasyon ang pangakong ipagpapatuloy ang legasiya ng pagkakaisa at pagbibigay ng ligtas na espasyo para sa mga mag-aaral ng BASS. Sa ngayon ay patuloy pa rin sa pagsulong at pagbuo ng matibay na pundasyon para sa mga miyembro at kinatawan ng organisasyon sa unti-unting pakikisama at pakikilahok sa iba't ibang organisasyong naglalayong isabuhay at isapuso ang bawat Sustainable Development Goals (SDG) sa patuloy na pag unlad.
Unti-unti ring ipinakita ng MASA ang kanilang presensiya sa iba't ibang mga gawain sa loob at labas ng pamantasan. Bagamat sa kasalukuyan ay nasa ilalim sila ng reactivation at monitoring process ng Office of Student Affairs-Student Organization Unit (OSA-SOU), hindi ito naging hadlang sa organisasyon upang makilahok at makiisa sa paggawa ng mga inisyatibo katuwang ang iba pang mga organisasyon.
“During the revitalization mula January hanggang ngayon, mas nag-focus kami sa pagpapakilala at pagsasabuhay sa pamamagitan ng pagkikipag-collaborate sa council at ibang organization, and we ensure that the activities they organize align with these SDG’s: SDG 4 - Quality Education, SDG 5 - Gender Equality, SDG 8 - Decent Work and Economic Growth,” saad ni Alyssa Ann Raine Cargado, Interim Chairman ng MASA.
𝙎𝙖 𝙢𝙪𝙡𝙞𝙣𝙜 𝙥𝙖𝙜𝙨𝙞𝙠𝙡𝙖𝙗 𝙣𝙜 𝙙𝙞𝙬𝙖
Umiikot ang tuon ng organisasyon sa mga adbokasiya at layunin na nakaangkla sa SDG. Kabilang dito ang pagtulong ng MASA sa iba’t-ibang organisasyon sa pagsulong ng kalidad na edukasyon at karapatan sa pamamagitan ng pagbabahagi ng mga impormatibong kaalaman tulad na lamang ng “Panel Discussion: Is Caring an Art?” ng College of Arts and Social Sciences Student Government (CASS-SG), dalawang beses na Guesting ng MASA sa Radyo CLSU na pinangunahan ng Urirat, at ang “Lecture Series #01: Transnational Motherhood” sa pakikipagtulungan sa Department of Social Sciences. Ang mga naturang aktibidad at programang ito ay naging posible dahil na rin sa tulong ng MASA.
Aktibo rin ang MASA sa pamamaraan ng pagbibigay ng tulong at pakikibahagi sa mga usaping pangkababaihan at seguridad tulad ng Women's Rights and Digital Safety Forum na inorganisa ng Buhay at Kalikasan ng Sierra Madre (BUKAL), Access Network, Pambansang Koalisyon ng Kababaihan sa Kanayunan (PKK), sa Plaza Adriano. Sa aspeto naman ng malayang pagpepelikula, Tumulong din ang MASA sa pagtatalakay ng mga usaping sumesentro ang mga kababaihan tulad na lamang ng Films for Her: Framing her struggle, screening her strength ng Department of Social Sciences, at ang programang sumusulong sa sustainability upang magkaroon ng pangalawang buhay ang mga tela at kasuotan, ito ang Women support Women: Clothing Donation Drive & Ukay-Ukay for a Cause ng Social Sciences Student Council (SSSC), katuwang ang MASA.
Nanguna rin sila sa pagpapayabong ng sining na nanglalayong panatilihing buhay ang diwa ng paglikha sa pamamagitan ng ang Mural Painting Workshop & Open Mic sa pangunguna at pakikipagtulungan sa BUKAL, Access Network, PKK, sa Plaza Adriano. Nakiisa rin ang MASA pagtataguyod ng mga programang tumatalakay sa mental health at isa sa mga naging proyekto nila ay ang sa Mental Health and Wellness Workshop na inorganisa ng BUKAL, at Access Network.
Hindi rin nagpahuli ang MASA sa pagtulong sa mga leadership seminars, pati na rin ang awareness seminars na naglalayong patalasin ang kanilang kakayahan sa pamamagitan ng epektibo at mahusay na pamumuno tulad ng BAGANI: Rising Leaders Development Program ng Development Academy of the Philippines (DAP), pati na rin ang Leadership Training na pinangunahan ng SSSC, kasama ang Bugkos Kabataan PH, Pole of Empowerment ng SSSC. Upang mapuksa ang karahasan sa loob at labas ng pamantasan, tumulong din sila sa mga programa tulad ng Legal Awareness Seminar: Anti-Hazing and Safe Spaces Act na pinangunahan ng Office of Student Affairs (OSA). Nag-organisa rin ang MASA ng Team Building na may layong pagtibayin ang samahan ng bawat miyembro.
Ayon kay Alyssa Ann Raine Cargado, Interim Chairman ng MASA, hindi lamang simpleng muling pagkabuhay mula sa tatlong taong pamamahinga ang kanilang adhikain. Binigyang-diin niya na ang layunin ng organisasyon ay hindi nakakulong sa apat na pader ng silid-aralan, kundi ang mas palawakin at ipakilala ang MASA sa buong unibersidad.
𝘼𝙣𝙜 𝙖𝙥𝙤𝙮 𝙣𝙖 𝙥𝙖𝙩𝙪𝙡𝙤𝙮 𝙣𝙖 𝙢𝙖𝙜𝙣𝙞𝙣𝙞𝙣𝙜𝙖𝙨
Hindi lamang simpleng pagbabalik ang dahilan ng muling pag-usbong ng MASA, kundi may isa pang mas malalim na layunin—ang pagbuhay sa minsanang nawalang organisasyon na ngayon ay may mas malinaw na direksyon at pundasyon, mas matibay na paninindigan, at mas nag-aalab na dedikasyon sa pamumuno’t paglilingkod. Ang bawat misyon nito ay nakaugat sa pangangailangan ng mga mag-aaral ng BASS, kasabay ng pagbibigay ng mas malinaw na gabay sa kanilang tatahaking landas at pagpapatatag ng isang samahang matibay na hindi matitinag ng anomang pagsubok o unos.
“If we’re going to talk about the long term, for the upcoming school year, gusto naming makabuo ng cohesive and inclusive community that bridges diverse backgrounds within the Social Sciences students. Mainly to equip the students with critical thinking and analytical skills through providing academic and professional support by conducting workshops, seminars, events, programs to navigate ourselves in our future careers,” ayon kay Cargado.
Sa muling pagsasabuhay ng MASA, muling nabibigyang-buhay ang isang organisasyong nagsisilbing gabay at sandigan ng mga mag-aaral sa larangan ng Agham Panlipunan. Ito ay isang hakbang tungo sa mas matatag na paghahanda para sa kanilang hinaharap na propesyon habang patuloy na inaayon ang misyon nito sa pangangailangan ng departamento at upang magsilbing boses sa mga mag-aaral ng agham at panlipunan.
At sa muling pagkabuhay ng diwa ng MASA, taban nila ang punla ng kanilang mga adhikain, at sa mga susunod na mga panahon, ito ay yayabong. Isang patunay na ang MASA ay isang instrumento upang magbahagi ng ligtas na espasyo, at magbigay ng representasyon sa mga mag-aaral ng agham-lipunan. Sa kabila ng gabok na sumubok sa katatagan nito, sapat na ang munting kislap upang muling magningas. Nagpahinga lamang ang baga, hindi namatay—at sa isang ihip ng tadhana, muli itong mag-aalab. Ito ang bagong simula, ang pagbabalik ng apoy ng MASA.
Isinilutan ni Alyssa Bernadette Mendoza at Alyssa Marie Mendoza
Inianyo ni Dana Sta. Ines
Mga larawan mula sa Malayang Samahan ng Agham Panlipunan
