23/03/2026
Ipag share tano aya para di pkhasapengan.. nago di pkhalipatan o pkhisalimbago a mga kalombayan sa giya ingud tanowa Bato Intan. ❤️
TARITIB SA NEM (6) KA DATU SA MULONDO:
------------------------------------------------
بسم الله الرحمن الرحيم
Mizagipo-on ako sa ingaran o Allah a kadnan a maka limuon ago masalinggagao. Phangningko ko Allah a mamba giantano so ma-ana o salam a kalilintad ago limo na kabarakat.
Oriyan iyan na iphana biya akn so kakhapayag o lalakho ko 15 a mga Panoroganan a Ika 16 so Sultan sa Domalondong a KHITATANGONGUN so kadar o Kadatu iran ko 4 a phangampong a ranao, na goso 28 a tanan adil a gaos a dadawagan sa pa-ar a surot a mangondaya sa kakokompasa ko taritib sa dikadawayan, na samporna ko 4 a mga ingud a kiya zosolbiyaan o Bangsa sa ingud a Ranao. A giyanan so Sawer ago Madamba na Bacayawan ago Dalama.
Oriyan oto na diko miphaginalang a kaphaka odas akn ko taritib o (6) Nem Kadatu sa mulondo sa kilulumba o:
1-SULTAN SA MULONDO
ago so
2-SULTAN A CABUGATAN SA MULONDO.
A giyanan so dowa alongan sa Mulondo a dii mizinirigan ko miya kambala bala a kabesaran o GANDOWA a wata o BAYAWA, a miyagingd ko Buadi Bayawa a titindgan a kadatu o Sultan sa Buadi Bayawa.
Na datar oto a diko mipndi matag a kaphaka odas akn ko:
3-SULTAN A DARIMBANG SA MULONDO ago so
4-SULTAN MA'AMOR SA MULONDO a diyawagan sa pa-ar ko taritib a Mulondo a damarao a sawaln o tao ko lindinga ingud, a gonting a manardas so lalagyan,ka sabap ko paninindg, a salday sa ginokt na sorod sa dikhatanor.
[ a ska niyan so Omadan a paka puon o Sultan Ma'amor sa Mulondo ]
A lalaminun so Kadatu iran ko PAT KA LUKS a piya gingudan o:
A= BAE SUNDIG a Olan a damarimbang sa arkat a Mulondo, sa kapapayag iyan ko Lumbacaingud a titindgan a Kadatu o Sultan sa Lumbacaingud datar oto so Dado a titindgan a Kadatu o Sultan sa Dado.
Ika dowa ka luks so :
B= DATU AGAYAO a titindgan a Kadatu o Sultan a Dimasangcay sa Kitambugun ago so Sultan sa Kitambugun.
Ika tlo ka luks so :
C= DATU ONDARO a titindgan a Kadatu o Sultan a Diamla ago so Cali a diamla.
Ika pat ka luks so :
D= DATU LOMINOG a titindgan a Kadatu o Sultan sa Diriposn ago so Sultan a Romapnut sa Diriposn.
Na giyoto dn mambo a khikowa ko sa rokon a kaphaka odas akn ko :
5- SULTAN A DIMASANGCAY sa Buadi Insoba, ago so :
6- SULTAN MA'AMOR sa Buadi Insoba ago Buadi Abala.
a piyagingudan o DATU INSOBA, a ini pagomarg a Mulondo so kadar o bangsa niyan.
Na kagiya miniropa ko so pada adat akn ko (6) NEM A LINANG BOLAWAN SA MULONDO a siran so:
1- SULTAN SA MULONDO
2- SULTAN A CABUGATAN SA MULONDO
3- SULTAN A DARIMBANG SA MULONDO
4- SULTAN MA'AMOR SA MULONDO
5- SULTAN A DIMASANGCAY KO BUADI INSOBA
6- SULTAN MA'AMOR KO BUADI INSOBA AGO BUADI ABALA.
Na phaka dansaln ko so taritib a Mulondo ko LIMA KA AGAMA sa Bagowaingud a kalalaminan sa Kadatu o 7 a Sultan a diindao dayaan o Sultan sa Bagowaingud.
Ago so Rayabalay a bibilikan ko kadatu o Sultan sa Ulo a Masiu a pd a paramanis a municipality a Mulondo ka matao makimbala na panday maki zongda.
Na guso Pindolonan a piyagingudan o tlo (3) a magari ari a siran so :
1- DATU SA PALAO
2- DATU SA CAMPONG
3- PANDI
A bubknan sa Kadatu o Sultan sa Pindolonan.
Na guso Linindingan a piyagingdan e
1-MALA agosi
2-CAMPONG
3-Babae ran si DIPANGARONGAN
A ndada o daya-an a kadatu o
1- SULTAN SA LININDINGAN
2- MAMA SA PALAO
PANANAROON O NEM (6) KA DATU SA MULONDO:
------------------------------------------------------
"OMNANG A MULONDO A NEM 6 A LINANG BOLAWAN,
TALADAY A PIZIGI A ASAL A KHAKAIRAN,
PITHIMBANGAN A KADAR A DAGODOB NA MAGANDING
KA BIKNAN I MANEZANG A MIYANGOAO MILILANG KO POTRE PILIMBASING A BOLNTAY DA MADOWA NA TAMBINGORAY DAMANGUN SA MALA A DOMAGANDAR.
BATOWINTAN SA MONA A DIBALOY A MONTIYA NA ORAY A PINDOLANGAN A PANINGGALAN SA RANAO,
MADATAR A BANGONAN, NA MARAORAO A TANGKAL,
BIYANAY A KAKASI A TABIAT A MALAMI A PO-ON A DOMAGANDAR,
NA RIZA A PARAMANIS A SAROG A PAKALMA A LUMBA A DOMAGANDAR,
KA OLOWAN A MAGANDING NA SUNDIG A MAORINTANG."
By Alim Mas'ud Omadan Sultan
______________________________
