12/03/2025
Noong Pebrero 21, 2025 nakipagpulong ang All UP Academic Employees Union Mindanao at UP Mindanao University Student Council kay UP President Angelo Jimenez. Ito ay bunga ng kahilingan ng mga sektor sa pangulo na maglaan ito ng panahon sa pagharap sa Unyon at USC sa pagbisita nito sa Davao para sa pagdiriwang ng ika-30 na anibersaryo ng UP Mindanao. Inilatag ng mga sektor ang ilang mga kampanya mula sa UP Mindanao at ang mga katanungan na may kinalaman sa kapakanan ng kaguruan at mga manggagawa ng pamantasan, kapakanan ng mga mag-aaral, akademikong kalayaan, at ang mga plano ng administrasyong Jimenez-Murao sa UP Mindanao. Narito ang ilang mga napag-usapan:
1. Hinggil sa Proseso ng Pagpili ng ika-7 na UP Mindanao Chancellor
Matatandaan na nagkaisa ang sektor ng mga mag-aaral at kaguruan sa panawagang DO BETTER UPMIN nitong katatapos lamang na UP Mindanao Chancellor Selection, katambal ng panawagang ito ang pagpapakita ng kawalan ng kumpiyansa sa administrasyong Murao dahil na rin sa patong-patong na pagtataksil at hindi pakikinig nito sa mga sektor ng pamantasan sa una nitong termino. Nilinaw ng mga sektor kay PAAJ kung bakit tila hindi dininig ng Lupon ng mga Rehente ang panawagan ng mga sektor, imbes na magbigay ng detaliyado at makatarungang tugon, sinabi lamang ng pangulo na “mahirap na desisyon” ang nangyari. Idinagdag din ng pangulo na mahalagang si Murao ang tsanselor upang mapanatili ang “maayos” na pamamahala sa pamantasan at upang masig**o ang pagpapatuloy ‘di umano ng mga programang nasimulan nito. Bukod sa mga ito, wala ng detalye pang ibinigay si PAAJ at iniiwasan ang mga tanong na pumupunto sa pagkakatalaga ng mga tsanselor na pinapaburan ng administrasyon nito tulad na lamang sa mga nangyari sa UP Diliman at UP Baguio.
2. Hinggil sa Planong R25K (Road To 5K)
Naging pangunahing programa ng Administrasyong Jimenez para sa UP Mindanao ang pagpapalawak at pagpaparami ng mga mag-aaral sa unibersidad, mula sa kasalukuyang humigit kumulang 1500 na mga mag-aaral nais na palobohin ito sa 5000 sa 2029. Mula 2023, inilatag na ng mga sektor ang kalituhan at katanungan nito hinggil sa nasabing plano, kasama rito ang usapin ng mga item para sa kaguruan at mga manggagawa, mga silid-aralan at pang-akademikong espasyo, at iba pang mga alalahanin. Hindi rin klaro sa simula pa lamang kung ano ang lohika at katuwiran ng biglaang nais na palobohin ang populasyon ng mga mag-aaral lalo’t walang ginawang maayos na pag-aaral tungkol dito.
Muling ibinalik ng mga sektor noong Pebrero 21 ang mga dati nitong katanungan at tulad ng inaasahan, wala pa ring maayos na sagot si PAAJ. Wala pa rin daw items para sa kaguruan at mga manggagawa ng unibersidad, kinakailangan ‘di umano na paramihin muna ang mga mag-aaral sa pamamagitan ng pagbubukas ng mga bagong akademikong programa/kurso upang magamit bilang patunay sa pangangailangan nito. Sa usapin naman ng mga silid-aralan at pang-akademikong espasyo, gagamit muna ‘di umano ng mga “modular classrooms” para rito. Aminado ang pangulo na maaaring hindi matupad ang R25K sa loob ng kaniyang termino.
Napag-alaman ng Unyon na mayroong 19 na item ang ibinigay sa UP Mindanao para sa kaguruan, ngunit walang detalye tungkol dito na ibinigay ang Administrasyong Murao. Sa kasalukuyan hindi alam ng Unyon kung saan mapupunta ang mga nasabing item. Matatandaan na inilatag na ng Unyon noon pa man ang problema sa item lalo na sa mga departamentong nagtuturo sa kalakhan ng mga kursong GE. Para naman sa USC, ang planong “modular classroom” ay isang band-aid na solusyon lamang sa problema ng mga mag-aaral sa espasyo, pagsasayang ‘di umano ito ng rekurso at budget. Sa mga naging sagot ng pangulo, hayag na makikita ang kawalan nito ng paggagap sa problemang kinakaharap ng mga sektor.
3. Hinggil sa 11th RCDG
Matagal nang hinaing ng mga sektor ng UP Mindanao ang presensya ng 11th RCDG sa pamantasan, ilang tsanselor na rin ang dumaan ngunit hanggang ngayon ay narito pa rin ang kampo ng militar. Nakikiisa si PAAJ sa panawagang dapat na paalisin ang 11th RCDG sa loob ng UP Mindanao. Ayon sa pangulo, hindi maganda para sa isang akademikong institusyon na mayroong presensya ng militar sa loob nito. Aminado rin siya na magagamit ng UP ang espasyo ng RCDG sa pagpapalawak ng UPMin. Dagdag pa, may mga nasimulan na ‘di umanong pag-uusap hinggil sa paglipat ng 11th RCDG at ipagpapatuloy raw ito, nagkaroon lamang ‘di umano ng mga pagkaantala dahil sa burukrasya at politika. Inaasahan ng mga sektor na masisimulan ang paglipat ngayong taon, panahon ito upang ipakita ni PAAJ at Murao ang pagiging seryoso sa planong ito at hindi lamang magtatapos sa mga salita.
4. Hinggil sa 11 Point Student Demands
Sa nakaraang UP Mindanao Chancellor Selection, naging bitbit ng mga mag-aaral ang 11 Point Student Demands upang i-rehistro ang kanilang mga panawagan sa susunod na tsanselor ng pamantasan. Laman nito ang mga demanda na para sa kanila ay nagaganap ang danas ng mga mag-aaral, manininda, at komunidad ng UP Mindanao sa kalakhan. Ipinangako ni PAAJ na kakausapin si Tsanselor Murao na harapin nito ang mga sektor at buksan ang opisina nito sa mga diyalogo at talakayan lalo na sa mga hinaing ng mga sektor. Ipinangako ng pangulo na igagalang nito ang aktibismo sa loob ng pamantasan at paalalahanan ang Administrasyong Murao na kilalanin ang papel ng militansiya sa loob ng unibersidad. Gayunpaman, nanindigan ang pangulo na dapat paalisin sa loob ng pamantasan ang mga komunidad at settlers, taliwas ito sa ipinaglalaban ng mga sektor. Inamin ng pangulo na wala itong konteksto sa sitwasyon ng mga settler sa UP Mindanao. Magpapatuloy ang mga sektor sa pakikiisa sa mga settlers sa kanilang laban para sa lupa sa loob ng unibersidad.
Mabilis lamang ang nangyaring pag-uusap, natapos ito sa loob ng isang oras. Dahil dito limitado ang mga nailatag na mga katanungan. Gayunpaman, isang tagumpay ito para sa mga sektor. Hayag na naipakita sa pag-uusap ang kawalan ng kaalaman ng pangulo sa reyalidad ng UP Mindanao kahit na ibinibida nito ang UP Mindanao bilang ang kampus na isa sa nais niyang tutukan. Naipakita ng mga sektor ang pagkakaisa ng mga ito sa pagbabantay sa Administrasyong Murao at ang pagtangan nito sa tungkuling maging aktibo sa pagsusulong ng mga panawagang may kinalaman sa karapatan at kapakanan ng kaguruan, mga manggagawa, at mga mag-aaral. Magpapatuloy ang panawagang DO BETTER UP MINDANAO.
