26/09/2026
UP PRESIDENT ANGELO JIMENEZ, ISULONG ANG DEMOKRATIKONG PAMAMAHALA SA UP, IPAGTANGGOL ANG KARAPATAN AT KAPAKANAN NG MGA RANK AND FILE EMPLOYEES
Tatlong Tsanselor ang muling itinalaga ng Board of Regents sa katatapos nitong pulong sa UP Diliman noong Setyembre 24, 2026. Muling maninilbihan bilang mga Tsanselor ng UP Los Baรฑos si Jose Camacho, ng UP Manila si Michael Tee, at ng UP Visayas si Clement Camposano.
Sa kanilang muling panunungkulan, mahalagang tiyakin na ang pamamahala sa kani-kanilang Constituent University ay nakabatay sa demokratikong proseso, paggalang sa karapatan, at tunay na paglilingkod sa mga sektor ng Unibersidad. Kabilang dito ang pagkilala sa mahalagang ambag ng mga rank and file employees, ng mga kawani, REPS, g**o, at iba pang manggagawa, lalo ng mga kontraktuwal na kabahagi sa pagpapatakbo at pagpapaunlad ng Unibersidad ng Pilipinas bilang isang akademikong institusyon.
Ang kapakanan at kagalingan ng mga empleado ay hindi dapat maisantabi sa anumang sistema ng pamamahala. Dapat igalang at pangalagaan ng UP ang ating mga karapatan sa makatarungang pagtrato, malayang pagpapahayag, pakikilahok sa mga usaping may direktang epekto sa ating trabaho, at pagkakaroon ng karapatan na makibahagi sa proseso ng pagpili sa mga susunod na administrador. Ito ang ubod ng demokratikong pamamahala sa U.P.
Nitong nakaraang araw, nakatanggap ang ating unyon ng mga ulat hinggil sa mga insidente ng intimidasyon, pananakot, at harassment na nararanasan ng mga empleado sa ilang Constituent Universities. Ibinahagi ng mga karaniwang empleado ang kanilang mga karanasan hinggil sa pagyurak sa kanilang kalayaang magpahayag at pagmamaliit sa kanilang mga karapatan.
Nais nating ipaalala kay Pres. Angelo Jimenez na wala dapat lugar sa Unibersidad ng Pilipinas ang intimidasyon, bullying, harassment, at anumang uri ng pananakot ng mga may administratibong posisyon laban sa mga karaniwang empleado at unyonista ng pamantasan. Ang pagiging administrador ay isang pananagutan sa pamantasan at bayan. Hindi ito dapat gamitin upang supilin, takutin, o hadlangan ang mga empleyado na ipahayag ang kanilang mga hinaing, panawagan at pananaw sa mga isyu sa loob at labas ng pamantasan.
May mga ulat din hinggil sa mga papeles at dokumentong hindi umuusad o matagal ang pag-usad sa mga opisina, mabagal na pagtugon sa mga usapin kaugnay ng grievance mechanism at hindi agarang pag-aksyon sa mga apila at hinaing ng mga g**o, kawani, at REPS kaugnay ng promosyon, benepisyo, at iba pang usaping may direktang epekto sa ating trabaho at kabuhayan.
Ang mga ganitong kalagayan ay nangangailangan ng seryosong tugon mula mismo sa pamunuan ng Unibersidad. Ang isang demokratikong pamantasan ay hindi lamang nasusukat sa mga polisiya nito kundi sa paraan nang maayos na pakikitungo sa kalakhang ng mga empleadong bumubuo at nagpapatakbo sa ating institusyon.
Mahalagang maramdaman ng bawat empleado na ang kanilang mga hinaing ay naririnig at tinutugunan. Malagang makita ng mga rank and file employees na ang kanilang mga karapatan ay iginagalang, at ang kanilang mga reklamo ay inilalatag sa isang patas, epektibo, mabilis, at walang pangamba sa anumang uri ng retalyasyon ng isang administrador.
Dapat ding tiyakin na walang empleado ang matatakot magsalita, maglahad ng hinaing at magpahayag ng posisyon sa mga usapin sa loob at labas ng pamantasan. Ang malayang pagpapahayag at pakikilahok sa mga proseso ng Unibersidad ay mahalagang bahagi ng isang ligtas at demokratikong lugar ng paggawa at akademikong institusyon.
Hindi dapat maging dahilan ang naging posisyon o tindig ng isang empleado sa mga nakaraang proseso ng pagpili o pagtatalaga ng mga administrador upang siya ay gipitin. Sa halip, dapat tiyakin ni Pangulong Jimenez, bilang isang abugado at labor lawyer, na ang lahat ng empleado ay pinakikitunguhan nang may dignidad at walang diskriminasyon o pagganti dahil sa kanilang lehitimong pakikilahok sa demokratikong proseso sa pamantasan.
Ang Unibersidad ng Pilipinas ay dapat maging ligtas na espasyo para sa lahat. Ito ay marapat maging isang lugar kung saan malayang naipapahayag ang mga saloobin, malayang nagkakaroon ng palitan ng mga ideya, perspektiba, tindig, at mga pananaw. Marapat na may puwang para sa kritisismo at palitan ng ideya na walang pananakot o panggigipit, partikular sa mga karaniwang empleado. Sa ganitong paraan lamang matitiyak na tunay ngang buhay ang diwa ng demokratikong pamamahala sa UP.
Walang lugar dapat sa UP ang anumang anyo ng panlalait, pagbabanta, harassment, o hate speech laban sa mga empleado, lalo na kung nagmumula sa mga administrator. Ang panandaliang posisyon na ipinagkatiwala sa mga administrador ay dapat gamitin upang protektahan ang karapatan at kapakanan ng mga empleado, hindi upang hadlangan ang mga ito.
