22/06/2026
INUNGKA GO KAPAMAKATADEM sii ko siran a mababaya phowasa sa sunna.
Mapita na ika-8 a gawii sangkaya a Moharram 1448, na pda siyonat o agama so kaphowasae ron na so ika-9 (June 24 Wednesday) go ika-10 (June 25 Thursday) ko Moharram.
Pitharoo Rasulollah s.a.w:
" وصوم يوم عاشوراء يكفر سنة ماضية" كما صام صلي الله عليه وسلم يوم عاشوراء وأمر بصيامه، وقال: إذا كان عام المقبل ان شاء الله صمنا اليوم التاسع" .
وفى رواية: لئن بقيت لأصومن التاسع".
قال شيخ الألبانى صحيح.
Maana: So kaphowasae ko ika-10 ko Moharram na khaponas iyan so dosa (mga iito) ko saragon a miyaipos; go piphowasaan skanyan o Rasulollah s.a.w go inipangoyat iyan so kaphowasae ron. Go pitharo iyan: O isampayako ko phakawma a ragon na phowasaan akn so ika-9. (Pitharo i Albani a sahih a hadith).
Aya osayani ibnol Qayyim ko kitab iyan a "Zadol ma-ad" makapantag ko kaphowasae sangkaya a yawmo ashura na tigiyan:
So kaphowasae ko yawmo ashura na tlo ka martaba maana pangkatan:
Paganaya martaba (pangkatan): na tlo gawii a phowasaanon, so ika-9, 10 go 11, sabap sa inisogo o Rasulollah so kaphowasae ko oriyano ika sapolo goso onaan iyan.
Martaba a ikadowa: aya phowasaanon naso ika-9 go ika-10, sabap sa piphowasaano Rasul s.a.w so ika sapolo go inisogo iyan so kaphowasae ron, go pitharo iyan a o raotn ko phakatondog a ragon na pphowasaan iyan so ika-9.
Martaba a ika-tlo: ayabo a pphowasaanon naso ika-10, sabap sa gyotowi piphowasaan o Rasul s.a.w go ini sogo iyan.
Aya siyabot san na:
1) so khagaga niyan a giyangkanan a paganay na taralbi a mapiya.
2) so aya khagaga niyan naso ikadowa na miyakapiyapiya.
3) so ayabo a khagaga niyan naso ika-tlo na miyakakowa sa balas, a minipakawit iyan sa alongan a mawri.
Siyapn tano langono Allah ko kapzagado mga ragon, mga olanolan go mga gawii, aaameeen.
