23/08/2026
𝐀𝐠𝐨𝐬𝐭𝐨 𝟐𝟑, 𝟐𝟎𝟐𝟔 | 𝐈𝐤𝐚-𝐃𝐚𝐥𝐚𝐰𝐚𝐦𝐩𝐮'𝐭 𝐢𝐬𝐚 𝐧𝐚 𝐋𝐢𝐧𝐠𝐠𝐨 𝐬𝐚 𝐊𝐚𝐫𝐚𝐧𝐢𝐰𝐚𝐧𝐠 𝐏𝐚𝐧𝐚𝐡𝐨𝐧 (𝐀)
Maaari nating maiugnay sa ating sarili ang pahayag na ito ni Hesus “Mapalad ka, Simon na anak ni Jonas! Sapagkat ang katotohanang ito’y hindi inihayag sa iyo ng sinumang tao kundi ng aking Amang nasa langit” May mga pagkakataon sa ating buhay na na tayo ay nagmamalaki tungkol sa kung sino tayo at sa ating mga alam at tinatamasa. Ipinapaalala sa atin ni Hesus na ang lahat ng ito ay regalo at biyaya mula sa diyos, kung sino man tayo ngayon o ang ating tagumpay sa kasalukuyan ay kaloob ng diyos sa atin. Kaya naman hindi natin dapat hayaang tangayin tayo ng ating tagumpay gaano man ito kalaki.
Ang Simbahang Katoliko na mayroon tayo ngayon ay itinatag ni Hesus sa pamamagitan ni Pedro. Hindi ito ginawa ni Hesus dahil paborito Niya si Pedro o dahil palaging kasama siya sa mahahalagang pangyayari sa buhay ni Hesus. Pinili si Pedro sa simpleng dahilan na ito ay kalooban ng Diyos at hindi kalooban ni Pedro.
Kaya naman, dapat tayong manatiling mapagpakumbaba at nakatapak ang mga paa sa lupa gaano man tayo katagumpay, at katalino. Sapagkat ang lahat ng mayroon tayo ay regalo mula sa Diyos at nagmumula sa kanyang mabuting kalooban.
- Pagninilay mula kay Sis. Riena Jay Olis, Education Committee Member.
Upang mas palalimin ang repleksyon maaaring basahin ang buong Ebanghelyo mula sa Mabuting Balita ayon kay Mateo 16, 13-20:
Noong panahong iyon, dumating si Hesus sa lupain ng Cesarea ng Filipos. Tinanong niya ang kanyang mga alagad, “Sino raw ang Anak ng Tao, ayon sa mga tao?” At sumagot sila, “Ang sabi po ng ilan ay si Juan Bautista kayo. Sabi naman ng iba, si Elias kayo. At may nagsasabi pang si Jeremias kayo o isa sa mga propeta.” “Kayo naman, ano ang sabi ninyo? Sino ako?” tanong niya sa kanila. Sumagot si Simon Pedro, “Kayo po ang Kristo, ang Anak ng Diyos na buhay.” Sinabi sa kanya ni Hesus, “Mapalad ka, Simon na anak ni Jonas! Sapagkat ang katotohanang ito’y hindi inihayag sa iyo ng sinumang tao kundi ng aking Amang nasa langit. At sinasabi ko naman sa iyo, ikaw ay Pedro, at sa ibabaw ng batong ito ay itatayo ko ang aking simbahan, at hindi makapananaig sa kanya kahit ang kapangyarihan ng kamatayan. Ibibigay ko sa iyo ang mga susi ng kaharian ng langit: ang ipagbawal mo sa lupa ay ipagbabawal sa langit, at ang ipahintulot mo sa lupa ay ipahihintulot sa langit.” At mahigpit niyang tinagubilinan ang kanyang mga alagad na huwag sabihin kaninuman na siya ang Kristo.
