23/09/2025
MALAMPUSON ang gipahigayon nga forum nag ulohang "Kita na sab karun; The youth carrying on the legacy of the martyrs and living legends of Martial Law" sa miaging Setyembre 21, 2025 sa Theodore Buttenbruch Hall, sulod sa University of San Carlos, Cebu City. Ang maong kalihukan gipangunahan sa mga membro sa Youth for Nationalism and Democracy - Cebu, Cebu Normal University - Polikratos, ang Carolinian Political Science Society - University of San Carlos, JMJA, ug ubang pang mga youth organizations. Gipaluyohan usab ang maong aktibidad sa Task Force Detainees of the Philippines.
Ang maong forum giablihan ni Fr. Jose Bagadiong Jr., SVD, Island Representative sa TFDP para sa Visayas ug Fr. Francisco Estepa, SVD, University President- USC.
Mihatag ug maundanon nga mensahe ang bantugang abugado ug martial law survivor nga si Atty. Democrito Barcenas. Gipaambit ni Atty. Barcenas ang iyang personal nga kasinatian panahon sa martial law ug mihatag ug hagit sa mga batan-on sa ilang mahinungdanon nga papel sa pagbatok sa tiranya, pagbarug kontra kurapsyon, ug sa uban pang mga hagit nga giatubang sa atoang katilingban karun.
Gipadayag usab sa kabatan-onan ang ilang mga tingog pinaagi sa mga panel of reactors gikan sa nagkadaiyang organization sa kabantan-onan ug kababayen-an. Aktibo usab nga misalmot ang mga kabatan-onan sa open forum ug sa Interactive Exhibit.
Midalit usab ug pasundayag ang Sining Dillab Cultural Group ug ang Legacia pinaagi maundanon ug puno sa kahulogan nga pag awit ug pag sayaw.
