19/07/2026
PAUNAWA
PARA SA LAHAT NG TELECOMMUNICATION COMPANIES AT INTERNET SERVICE PROVIDERS
Mahigpit na ipinapaalam sa lahat ng telecommunication companies, internet service providers, contractors, subcontractors, at kanilang mga tauhan na bago magsagawa ng pagkakabit, paglalatag, paglilipat, pagkukumpuni, o pagdaragdag ng anumang kable at iba pang kaugnay na kagamitan sa mga poste at lansangan na nasasakupan ng Barangay Potrero, kinakailangang kumuha muna ng mga sumusunod:
1. Permit o pahintulot mula sa Pamahalaang Barangay ng Potrero; at
2. Certificate of No Objection mula sa City Engineering Office ng Pamahalaang Lungsod ng Malabon.
Mahigpit na ipinagbabawal ang pagsasagawa ng anumang trabaho nang walang nabanggit na mga dokumento. Ang sinumang tauhan o kumpanyang mapatutunayang nagsasagawa ng instalasyon o anumang trabaho nang walang kaukulang pahintulot ay ipatitigil kaagad ang operasyon.
Inaatasan din ang lahat ng kinauukulang kumpanya at service providers na agarang ayusin ang mga magkakabuhol, nakalaylay, at hindi maayos na kable sa mga poste, sapagkat maaaring magdulot ang mga ito ng sunog, aksidente, at panganib sa publiko.
Kinakailangan ding alisin, sa pakikipag-ugnayan at koordinasyon sa kinauukulang awtoridad at may-ari ng poste, ang lahat ng hindi na ginagamit, hindi na gumagana, o abandonadong kable.
Hinihiling naman sa lahat ng residente ng Barangay Potrero na agad na ireport sa tanggapan ng barangay ang sinumang indibidwal, tauhan, contractor, o kumpanyang nagsasagawa ng pagkakabit o paglalagay ng mga kable sa kanilang lugar nang walang kaukulang pahintulot.
Layunin ng paunawang ito na mapanatili ang kaligtasan ng publiko at kaayusan ng mga kable at poste, gayundin upang maiwasan ang anumang pinsala.
Para sa agarang aksiyon at mahigpit na pagsunod.
IPINAG-UTOS NI:
KGG. SHERYL C. NOLASCO, MPA, CLGA
Punong Barangay
Barangay Potrero, Lungsod ng Malabon
