Breast Friends MOMs of Barangay Nicolas

26/07/2026

DOH: Simulan ang Sariling Gulayan para sa Masustansyang Pagkain ng Pamilya!

Ang pagkakaroon ng sariling gulayan ay isang simpleng hakbang upang magkaroon ng dagdag na mapagkukunan ng sariwa at masustansyang pagkain sa bahay.

Kahit maliit ang espasyo, maaaring magsimula ng pagtatanim at unti-unting makabuo ng sariling gulayan para sa pamilya.

Tingnan ang mga simpleng tips upang makapagsimula!

26/07/2026

𝗣𝗥𝗘𝗦𝗦 𝗥𝗘𝗟𝗘𝗔𝗦𝗘

𝗡𝗡𝗖: 𝗔𝗕𝗢𝗧-𝗞𝗔𝗬𝗔𝗡𝗚 𝗣𝗔𝗚𝗞𝗔𝗜𝗡 𝗔𝗧 𝗡𝗨𝗧𝗥𝗜𝗦𝗬𝗢𝗡 𝗠𝗔𝗞𝗨𝗞𝗨𝗛𝗔 𝗦𝗔 𝗦𝗔𝗕𝗔𝗬𝗔𝗡𝗚 𝗞𝗜𝗟𝗢𝗦 𝗡𝗚 𝗜𝗕𝗔'𝗧 𝗜𝗕𝗔𝗡𝗚 𝗦𝗘𝗞𝗧𝗢𝗥
23 July 2026

Nananawagan ang National Nutrition Council (NNC) para sa mas matatag na sistema ng pagkain, tuloy-tuloy na pagtutulungan ng iba’t ibang sektor, at mga hakbang upang maprotektahan ang kakayahang bumili, upang matiyak na ang bawat pamilyang Pilipino ay may akses sa ligtas at masustansyang pagkain.

Ayon sa Food and Agriculture Organization ng United Nations, tumaas ng 25% ang gastos para sa masustansyang pagkain sa buong mundo mula 2021 hanggang 2024 (dating katumbas ay 195 pesos, naging 242). Sa Pilipinas, nananatiling malaking hamon ang pagiging abot-kaya ng masustansyang pagkain. Batay sa 2023 National Nutrition Survey na isinagawa ng Department of Science and Technology-Food and Research Institute, bumibili ng pagkain ang pamilyang Pilipino mula sa mga sari-sari store (73%), palengke o pampublikong pamilihan (58%), at talipapa (49%). Karaniwan ay limitado ang badyet ng pamilya para sa pagkain, na nagkakahalaga ng mula isang daan hanggang limang daang piso lamang kada pamimili.

"Apektado ang mga pamilya ng presyo ng pagkain. Hindi na lamang ito usapin ng gastusin kundi ng nutrisyon at kalusugan ng mamamayan, lalo na ng mga bata at iba pang bulnerableng sektor. Utos ni Pangulong Ferdinand Marcos Jr. na palakasan ang seguridad sa pagkain,” ani Dr. Albert Domingo, Undersecretary of Health at Executive Director ng NNC.

Isinusulong ng NNC sa pamamagitan ng Philippine Plan of Action for Nutrition (PPAN) 2023-2028 ang mga programang makakatulong sa nutrisyon at seguridad sa pagkain. Binigyang-diin ng NNC ang kahalagahan ng pakikipagtulungan ng pamahalaan, pribadong sektor, at mga komunidad. Kabilang dito ang pagtataguyod ng mga school and community gardens, at kampanya tungo sa pagkonsumo ng mga lokal, masustansya at climate-resilient na pagkain tulad ng monggo, malunggay, itlog, sardinas at mga root crops.

Kaugnay ng pagdiriwang ng 2026 Nutrition Month na may temang, “Nutrisyon at Kalikasan, Ating Pangalagaan!”, hinihikayat ng NNC ang lahat ng sektor na sama-samang magsagawa ng konkretong hakbang upang mas maging sapat, abot-kaya at masustansya ang pagkain para sa bawat pamilyang pilipino.

“Sa pamamagitan ng pagtutulungan, maisusulong natin ang mga layunin ng PPAN at matitiyak na ang bawat Pilipino ay may akses sa sapat at masustansyang pagkain ngayon at sa hinaharap. Sapagkat sa PPAN: sama-sama tayo sa nutrisyong sapat para sa lahat," dagdag ni Usec. Domingo. # # #

RELEASING AUTHORITY:

Dr. Albert Domingo
Undersecretary of Health and Executive Director IV
National Nutrition Council

(c/o Dr. Emmanuel Jay D. Dimal
Nutrition Officer V and Chief
Nutrition Information and Education Division
[email protected])

26/07/2026

Bilang bahagi ng patuloy na kampanya ng Department of Health (DOH) upang maprotektahan ang kalusugan ng mga bata, isasagawa ang Measles-Rubella Supplemental Immunization Activity (MR SIA) kasabay ng Vitamin A Supplementation mula Agosto 10 hanggang 28, 2026 para sa mga batang may edad 6–59 buwan.
Layunin ng gawaing ito na mabigyan ng karagdagang proteksyon ang mga bata laban sa tigdas at rubella sa pamamagitan ng pagbibigay ng MR vaccine, gayundin ang pagpapalakas ng kanilang resistensya at pagpapanatili ng mabuting kalusugan sa pamamagitan ng pagbibigay ng Vitamin A. Isinagawa ang pagbabakuna at pamamahagi ng Vitamin A sa mga itinakdang vaccination sites.

26/07/2026

Bilang bahagi ng pagdiriwang ng Nutrition Month 2026, matagumpay na isinagawa ang Buntis at Breastfeeding Congress noong Hulyo 17, 2026. Dinaluhan ito ng 7 buntis at 11 nagpapasusong ina mula sa ibat ibang Sitio ng Barangay Nicolas.
Sa nasabing programa, binigyang-diin ni Ms. Alma Camazo, RND ang napakahalagang papel ng wastong nutrisyon sa kalusugan ng mga buntis at mga nagpapasusong ina. Ipinaliwanag niya na ang sapat at balanseng pagkain ay mahalaga upang matugunan ang pangangailangan sa nutrisyon ng ina at ng sanggol, makatulong sa ligtas na pagbubuntis, suportahan ang tamang paglaki at pag-unlad ng bata, at mapanatili ang sapat na produksyon ng gatas ng ina.
Nagbigay naman ng impormasyon si Ms. Jovelyn Ganait, RN sa kahalagahan ng regular na prenatal at postnatal check-up, pag-inom ng mga iniresetang bitamina at iron supplements, at pagpapatuloy ng eksklusibong pagpapasuso sa unang anim na buwan ng sanggol.
Bukod sa usaping nutrisyon, nagkaroon din ng Information, Education, and Communication (IEC) tungkol sa mga napapanahong isyung pangkalusugan tulad ng HIV Awareness (Mx. Regie Cabaruan) at Dengue Prevention (Ms. Riza Castillo & Marilyn Salcedo). Tinalakay ang mga tamang impormasyon tungkol sa HIV, kabilang ang mga paraan ng pag-iwas, kahalagahan ng maagang pagsusuri (testing), at paglaban sa diskriminasyon sa mga taong may HIV. Samantala, sa usapin ng dengue, ipinaalala ang kahalagahan ng pagpapanatiling malinis ang kapaligiran, pagsunod sa 4T Kontra Dengue (Taob,Taktak,Tuyo,Takip), upang maiwasan ang pagdami ng lamok at maprotektahan ang pamilya laban sa sakit.

09/07/2026

Republic Act No. 11148 (Kalusugan at Nutrisyon ng Mag-Nanay Act)
Ang Republic Act No. 11148 o Kalusugan at Nutrisyon ng Mag-Nanay Act ay isang batas na naglalayong tiyakin ang tamang kalusugan at nutrisyon ng mga buntis, nagpapasusong ina, at mga batang mula sa sinapupunan hanggang dalawang (2) taong gulang. Kilala rin ito bilang First 1,000 Days Law.

Layunin ng Batas
● Mapabuti ang kalusugan at nutrisyon ng mga buntis, nagpapasusong ina, at mga sanggol.
● Maiwasan ang malnutrisyon, stunting, at kakulangan sa mahahalagang bitamina at mineral.
● Matiyak na ang bawat ina at bata ay may access sa dekalidad na serbisyong pangkalusugan.
● Maisulong ang eksklusibong pagpapasuso sa unang anim (6) na buwan at patuloy na pagpapasuso kasabay ng wastong complementary feeding hanggang dalawang (2) taong gulang o higit pa.
● Palakasin ang koordinasyon ng DOH, LGUs, at iba pang ahensya sa pagpapatupad ng mga programa para sa kalusugan at nutrisyon.

30/06/2026

Ang temang “Nutrisyon at Kalikasan, Ating Pangalagaan!” ay nagbibigay-diin na ang mabuting nutrisyon at pangangalaga sa kalikasan ay magkaugnay. Ang pagkakaroon ng malinis na hangin, sapat na tubig, matabang lupa, at ligtas na kapaligiran ay mahalaga upang makapagprodyus ng masustansiya at sapat na pagkain para sa bawat Pilipino. Kapag inalagaan natin ang ating kalikasan, natitiyak natin ang tuloy-tuloy na suplay ng masustansiyang pagkain para sa kasalukuyan at sa mga susunod pang henerasyon.

Hinihikayat din ng temang ito ang bawat isa na makiisa sa mga gawaing nagtataguyod ng wastong nutrisyon at pangangalaga sa kapaligiran, tulad ng pagkain ng masustansiya at lokal na pagkain, pagtatanim ng gulay, pagbabawas ng food waste, tamang pamamahala ng basura, at pangangalaga sa likas na yaman. Sa sama-samang pagkilos ng pamilya, komunidad, at iba’t ibang sektor ng lipunan, makakamit ang isang malusog na mamamayan at isang ligtas at masaganang kapaligiran para sa lahat.

30/06/2026

26/06/2026

Ang Garantisadong Pambata Everyday ay isang programa ng Department of Health na naglalayong matiyak na ang lahat ng batang edad 0–59 buwan ay patuloy na nakakatanggap ng mahahalagang serbisyong pangkalusugan sa buong taon.
Isa sa mga pangunahing serbisyo nito ay ang Vitamin A supplementation.
Ang pagbibigay ng Vitamin A ay mahalaga upang mapanatiling malusog ang paningin ng bata, mapalakas ang kanilang resistensya laban sa impeksyon, at masuportahan ang tamang paglaki at pag-unlad. Nakatutulong din ito sa pag-iwas sa kakulangan sa Vitamin A na maaaring magdulot ng problema sa paningin, paghina ng resistensya, at iba pang komplikasyon sa kalusugan.
Sa pagsasagawa ng programang ito, ang mga batang may edad
6–11 buwan ay binibigyan ng 100,000 IU na Vitamin A capsule (isang beses), habang ang mga batang
12–59 buwan ay binibigyan ng 200,000 IU na Vitamin A capsule tuwing anim na buwan, ayon sa pamantayan ng DOH. Kasabay nito, binibigyan din ng tamang kaalaman ang mga magulang at tagapag-alaga tungkol sa kahalagahan ng wastong nutrisyon, regular na pagpapasuri sa health center, at pagsunod sa iskedyul ng iba pang serbisyong pangkalusugan upang matiyak ang malusog na paglaki at pag-unlad ng kanilang mga anak.