09/04/2026
Ang Araw ng Kagitingan ngayong Abril 9, 2026 ay may temang "Giting ng Bayani, Pamana sa Salinlahi." Ito ay tinatawag ding “Bataan Day,” kung saan ginugunita ang pagbagsak ng Bataan noong Ikalawang Digmaang Pandaigdig. Noong Abril 9, 1942, matapos ang tatlong buwang Labanan sa Bataan, isinuko ni Major General Edward King Jr. ng Estados Unidos ang humigit-kumulang 76,000 sundalo sa hukbong Hapones. Ang mga puwersang alyado ng mga Pilipino, Amerikano, at Tsinoy ay pinilit maglakad nang malayo at sa bandang huli ay isinakay nang siksikan sa mga bagon ng tren, sa tinatayang 140 kilometro patungo sa Camp O’Donnell sa Capas, Tarlac. Marami ang nasawi sa tinaguriang “Death March” dahil sa matinding uhaw, init, gutom, sakit, at pagmamalupit ng mga Hapones. Sa huli, nasa 54,000 sundalo lamang ang nakarating sa kampo nang buhay.
Pinagdiriwang natin ang Araw ng Kagitingan hindi lamang bilang isang petsa sa kasaysayan, kundi bilang isang paalala ng kung ano ang kahulugan ng tunay na tapang. Ang mga bayani ng Bataan at Corregidor ay hindi lamang nakipaglaban para sa kalayaan ng bansa. Nakipaglaban sila para sa dignidad ng bawat Pilipino para sa karapatang mabuhay nang may dangal, kalayan, at pag-asa. Ang kanilang sakripisyo ay hindi nasayang. Ito ay naging pundasyon ng ating bansa at patuloy nating dinadala ang alaala ng kanilang tapang. Ang araw na ito ay tanda ng tatag, lakas, tapang, at mga sakripisyo ng mga Pilipino para sa kanilang pagmamahal sa bansang Pilipinas.
Naniniwala kami na ang kagitingan ay hindi nagtatapos sa kasaysayan. Nabubuhay ito sa bawat tao na lumalaban para sa katarungan. Sa bawat kabataang hindi sumusuko sa kahirapan. Sa bawat pagkakataong pinipili nating kumilos para sa kapwa kaysa manatiling tahimik at walang ginagawa. Ngayon, nahaharap pa rin ang bansa sa maraming hamon gaya ng kahirapan, kawalan ng pantay na pagkakataon, at paglabag sa mga karapatan ng mamamayan. Sa gitna ng lahat ng ito, ang diwa ng kagitingan ang siyang inspirasyon upang hindi sumuko at patuloy na kumilos.
Ang UP Caballeros ay buong pusong dadalhin ang diwa ng kagitingan sa aming mga programa, serbisyo, at pakikiisa sa komunidad. Hindi kailangang may sandata. Sapat na ang tapang na magsalita, kumilos, at manindigan para sa tama. Sapagkat ang tunay na kagitingan ay nabubuhay sa bawat isa sa atin. Ang kanilang dugo ay naging lupa nating tinutuntungan. Ang ating mga hakbang ngayon ang pinakamataas na pagbibigay-pugay sa kanila. Kaisa ang UPC sa bawat Pilipinong patuloy na nakikipaglaban para sa katarungan, kalayaan, at dignidad ng bawat mamamayan.
