18/10/2026
SEPARASYON SAN ESTADO NAN SIMBAHAN.
Manongod didi an homiliya ni Padre Gamil niyan na Domingo hali sa Mateo 22:15-21. Inunabi niya an probisyon sa Konstitusyon san Pilipinas -- Artikulo 2, Seksiyon 6 -- para tagan duon an batas na nagmamando sa separasyon san estado nan simbahan.
An "Basta Irosanon" may pwede ikahatag man na pagiromdom manongod didi.
Sa Akta Republika 9520 (Philippine Cooperative Code of 2008), Artikulo 27 (2), diri tinutugutan an sin-o man na elihido na opisyal san gobyerno na kumuha katungdanan o maging opisyal o direktor san kooperatiba. Sayo ini na praktikal na paagi para maseguro na diri maimpluwensiyahan san estado, lalo na san mga politiko, an mga desisyon o mga palakaw san mga kooperatiba.
Wara man partikular na batas an simbahan na nagbabawal sa mga politiko na mag-asumer katungdanan sa mga organisasyon sadi. Alagad may mga Arkodiyoseses nan Komperensiya san mga Obispo na nagluluwas mga polisiya na nagpoprohiber sa mga aktibo na opisyal san gobyerno, lalo na sa mga politiko, na mag-ingkod sa mga konseho san Simbahan, mga ministeryo sadi, o maski na ngani ada (lalo na) an pag-hermano o hermana.
Inhihimo ini para mapreserbar an awtonomiya san Simbahan, maiwasan an pagkakasiriway san mga tawo nan mga komunidad sa sayo na parokya, nan pagsulong san mga pang-irarom na intereses na diri nauuyon sa pagtubod nan insusulong san Simbahan.
May KULTO na masasabi ta mas ugali na nira maki-aram nan diktahan an kanira nasasakupan kon nano an kanira hihimuon o pipilion lalo na kon panahon san eleksiyon. Maw-ot san kadaghanan na nagi-isip na paratubod na diri ini mangyari sa ato Simbahan dahilan san kapabayaan, pasayun-sayon, o diri pinag-isipan sin mayad na mga desisyon san mga nanunungdanan.
