17/11/2024
2024 𝗦𝗖𝗢𝗨𝗧𝗦 𝗝𝗔𝗠𝗕𝗢𝗥𝗘𝗘 𝗦𝗔 𝗜𝗟𝗢𝗜𝗟𝗢, 𝗣𝗔𝗚𝗔𝗣𝗔𝗦𝗔𝗞𝗨𝗣𝗔𝗡 𝗦𝗔𝗡𝗚 𝗚𝗜𝗡𝗔𝗕𝗔𝗡𝗧𝗔 6, 000 𝗞𝗔 𝗠𝗚𝗔 𝗗𝗘𝗟𝗘𝗚𝗔𝗧𝗘𝗦 𝗦𝗨𝗡𝗢 𝗦𝗔 𝗕𝗦𝗣 𝗜𝗟𝗢𝗜𝗟𝗢 𝗖𝗢𝗡𝗙𝗘𝗦𝗢𝗥 𝗖𝗢𝗨𝗡𝗖𝗜𝗟
Ginalauman ang ginabanta 6, 000 ka mga delegates nga magapasakop sa 2024 Provincial Jamboree sa Calinog, Iloilo, November 24 tubtob November 29, 2024.
Sa interview sang RMN Iloilo kay Eric Dumdumaya, Council Scout Executive sang Boy Scout of the Philippines (BSP) Iloilo - Confesor Council, ginpahayag sini nga malapit 3, 000 na ang nakapa-reserve sa karon sa nasambit nga scouting event apang 6,000 ka mga delegates ang ila gina-ekspektar nga magatambong diri.
Suno kay Dumdumaya, ang tema sang jamboree subong nga tuig amo ang pagselebrar sang kultura kag tradisyon sa bag-o nga panahon sang scouting gani ginhingadlan nila ang campsite nga Camp Hinilawod de Calinog samtang ang subcamps ginhingadlan base sa mga istorya sang Hinilawod Epic.
Paathag ni Dumdumaya, tinutuyo sini nga kilalahon ang manggaranon nga kultura sang Calinog kag magserbe man nga mensahe sa mga scouts nga dapat padayunon nila ang kinaadman sa ila tagsa ka mga lugar.
Dugang pa sang opisyal, maga-perform man sa event ang mga myembro sang Panay-Bukidnon Indigenous People sa nasambit nga banwa.
Samtang, nagpanugyan man si Dumdumaya sa mga ginikanan sang scouts nga hatagan sang tion ang ila mga kabataan nga mangin independent apang mahimo sila gihapon nga magbisita kag maglantaw sang mga aktibidades sa jamboree.
By: JTP
