26/07/2026
“Apat ka tuig sang administrasyon ni Marcos Jr., palpak!” Ini ang sabat sang pumuluyo sa rehimen nga nagdala lamang sang pag-antos kag pagpamigos.
Palpak si Marcos Jr. sa paghatag sang makabuluhi nga sweldo kag ubra. Sa tunga sang krisis kag pagsaka sang presyo sang mga balaklunon, gapatinir sa 550 ang minimum wage nga tuman kalayo sa 1,300 nga kinahanglanon. Sa subong 700,000 ka pilipino ang nadulaan ubra, 2.5 million ang wala ubra, kag madamo pa gid ang may ubra pero mas manubo pa sa minimum ang sweldo.
Palpak si Marcos Jr. sa pagsolbar sang problema sa agrikultura. Ang mga mangunguma gapatinir sa gihapon na wala sang kaugalingon nga duta. Samtang nagadamo ang kaso sang land-use conversion, nagataas ang presyo sang inputs, kag ginakulang sila sang subsidyo halin sa gobyerno. Amo man ang mga mangingisda nga ginakawatan sang palangabuhian sa pagsulod sang commercial vessels. Ginapabay-an ni Marcos Jr. ang mga nagapakaon sang pungsod.
Palpak si Marcos Jr. sa patag sang edukasyon. Gapatinir nga manubo ang budget para sa edukasyon, ini nagaresulta sa kakulangan sang manunudlo, pasilidad, kag mga classroom. Ini man nagaresulta sa manubo nga sweldo sa mga manunudlo kag dugang nagapanubo man sa kalidad sang edukasyon. Sa subong nagatindog lamang 70.6% ang functional literacy sa Panay, resulta sang palpak na K to 12. Ini man nga K to 12 ang naging dugang agunto para sa mga estudyante, manunudlo, kag ginhikanan, wala nahatag ang promisa sini nga ubra kag kalidad nga edukasyon. Masubo ang kwarta nga tani para sa edukasyon ginhatag ni Marcos Jr. sa AFP kag ginbulsa pa paagi sa korapsyon. Amo man ni nga AFP ang responsable para sa mga kaso sang redtagging kag human rights violations pareho sang pagserbaylans sa campuses.
Palpak man si Marcos Jr. sa paghatag serbisyo sosyal. Sa subong ginahimo negosyo ang tubig, kuryente, kag biskan ikaayong lawas sang pumuluyo. Tungod nga pribado ang tubig kag kuryente gapinagusto pasaka presyo na ini nga mga korporasyon kag negosyante, pareho sang MPIW nga sa tatlo ka bulan kaduha na magpasaka presyo biskan hindi manami ang serbisyo. Asta ang aton nga mga merkado ginprivatize na kag nagdula sang palamugnan para sa aton vendors kag mga bolantero.
Tanan ini nagapamatuod nga wala nasabat ni Marcos Jr. ang krisis sa ubra, lupa, kag serbisyo sosyal. Gani, nagapadayon ang paghimakas sang pumuluyo. Nagadamo ang naga intra sa progresibo nga mga organisasyon kag nagahandum nga baguhon ang katilingban.
Imbes nga pamatian ang panawagan kag mga demanda sang pumuluyo, ilabi na sa pagpasabat sang mga korap kag makawat nga mga politiko kag opisyal sang gobyerno, pasismo kag pagpamigos ang ginasabat sang administrasyon ni Marcos Jr. Madamo nga mga pamatan-on kag pumuluyo ang nangin biktima sang redtagging kag pagpamahog. Ang iban gina ubra-ubrahan sang kaso ukon mas malala ginapatay para sila pahipuson. Sa mga ginhiwat nga mga forum kag protest kung sa diin ginapabutyag sang pumuluyo ang matuod nila nga kahimtangan, nangin biktima ini sila sang surveillance kag harassment, isa ini ka klaro nga itsura sang pagpamahog kag paghipos sa mga kritiko sang gobyerno kag pumuluyo.
Sa pagsumada, palpak ang apat ka tuig nga administrasyon ni Marcos Jr. Naging paantos kag mapangpigos ang pagdumala. Wala na sang iban nga maubra ang pumuluyo kundi magbato kag manindugan para sa kamatuoran. Ipakita naton ang matuod nga kahimtangan sang pungsod sa mga dalanon sa adlaw sang SONA
Pamatan-on sang Panay, mag-intra sa People’s SONA!
📍Iloilo City
8:30AM: Forum @ UPV Little Theater
11:30AM: March to Iloilo Provincial Capitol
3PM: SONA Live Viewing @ UPV Little Theater
📍 Roxas, Capiz
3PM: March and Program (Civic Center to Capitol Rotonda)
📍Aklan
1PM: Forum and March (Crossing Banga, New Washington, Aklan)
