10/10/2026
ANG SABAT SA KRISIS PANG-EKONOMIYA:
✅ PAGPASAKA SANG MINIMUM WAGE, KAG PAGPANUBO SANG PRESYO SANG BALAKLUNON!
❌ PAGPASAKA SANG SWELDO, PERO PAGPASAKA MAN SANG TUITION FEE?
Kahapon ginhiwat sang Department of Labor and Employment (DOLE) Regional Tripartite Wages and Productivity Board VI (RTWPB-VI) ang ikatatlo nga blended public hearing angut sa minimum wage adjustment sa Western Visayas. PHP550 ang minimum wage sang rehiyon subong, samtang ₱250 kada adlaw ang ginapangayo sa gin-file nga wage petition.
Sa tunga sang padayon nga pagsaka sang presyo sang pagkaon, pamasahe, kuryente, tubig, kag iban pa nga mga kinahanglanon, dapat lang gid gid magsaka man ang sweldo sang mga mamumugon! Indi husto nga ang aton mga mamumugon amo pa ang nagasalo sang krisis kag ang ila sweldo hindi makasunod sa nagasaka nga presyo sang mga balaklon. Ang pagpasaka sang minimum wage isa ka kinahanglanon nga tikang agud mabuligan ang mga mamumugon kag ila pamilya nga maatubang ang nagalala nga krisis pang-ekonomiya.
Pero hindi buot silingon nga magtaas ang sweldo, kwaon na ina nga oportunidad sang mga pribado nga eskwelahan, paagi sa pagpasaka sang tuition fee! Naglutaw ang sentimento sa public hearing nga wala maubra ang pribado nga mga eskwelahan nga ipataason ang ila nga tuition fees kung maaprubahan ang wage increase petition. Ang tuyo sang pagpataas sang sweldo amo ang pagbulig sa mga pamilya sa tunga sang krisis pang-ekonomiya. Gani, kung pataason naman ang tuition fees, wala pulos ang pagpasaka sang sweldo! Hindi dapat paghimuon rason sang mga pribado nga eskwelahan ang pagpasaka sang sweldo, kay bag-o pa nagsaka ini, nagapasaka na ang tuition fees!
Sa idalom sang bulok nga sistema, ginahimo negosyo ang aton kinamatarong, labi na ang aton pag-eskwela. Ang pag-eskwela isa ka kinamatarong sang isa ka pamatan-on, kag kinahanglan aksesable kag may kalidad ini. Pero ang gakatabo, mabug-at nga pinansyal nga responsibilidad na ini sang mga pamilya. Indi solusyon sa krisis ang pagpabaya sang mga mamumugon nga mag-antos sa kulang nga sweldo, kag ang mga estudyante kag ila pamilya nga mag-antos sa mahal nga tuition fee. Kinahanglan ang makabuluhi nga sweldo, bastante nga pondo sa edukasyon, kag konkreto nga tikang agud masabat ang krisis pang-ekonomiya.
Halin sa Anakbayan Panay, nagapanindugan kita upod sa mga pamatan-on, mamumugon, kag pumuluyo sa panawagan nga aprobahan ang ₱250 nga minimum wage increase! Indi dapat magpabilin nga gutom kag kabudlay ang kabuhi sang mga mamumugon samtang padayon nga nagasaka ang presyo sang ila mga basehan nga kinahanglanon. Sa pihak sini, ginapanawagan man naton ang mga pribado nga eskwelahan nga indi gamiton ang wage increase bilang rason sa dugang nga pagpasaka sang tuition fee kag pagpabug-at sa mga pamilya.
May daku man nga responsibilidad ang gobyerno sa pagsiguro nga ang edukasyon mangin aksesable kag abot-kaya para sa tanan. Kinahanglan dugangan ang pondo para sa edukasyon, labi na sa mga state universities and colleges (SUCs), kag hatagan sang igo nga subsidyo ang mga pribado nga eskwelahan. Indi dapat ipasa sa mga estudyante, ginikanan, kag mamumugon ang responsibilidad nga dapat ginatuman sang estado. Ang pondo nga halin sa pumuluyo, dapat gamiton para sa serbisyo publiko kag kaayuhan sang tanan, indi sa korapsyon kag interes sang mga ara sa ibabaw.
PONDO SA EDUKASYON, HINDI SA KORAPSYON!
SWELDO SANG MAMUMUGON, PATAASON! PRESYO SANG BALAKLUNON, PANUBUON!
![[ANAKBAYAN PANAY IN THE NEWS]Gintalakay sang Anakbayan Panay ang iya tindog parte sa pag-aprubar sang Smarts Kids Act o ...](https://img3.ngos1.com/361/823/1091719033618237.jpg)
![[ANAKBAYAN PANAY IN THE NEWS] Sa pagpalawig sang termino sang mga Barangay kag Sangguniang Kabataan (SK) Officials, gin...](https://img5.ngos1.com/069/435/1087624550694352.jpg)
