San Ignacio de Loyola Parish - Luzon

05/06/2022

Happy Birthday 🎉🎈🎂

Happy Birthday Fr. Orveil!

03/06/2022

Happy Birthday Msgr. Medz!

11/02/2022

Pahibalo sa tanang Devotees ni Sr. Santo Niño ug mga Parokyano gi-imbitahan kamo sa atong Second Novena Mass karon Friday, Febuary 11, 2022 sa alas 4:30 sa hapon at San Ignacio de Loyola, Luzon Parish and dalaha ang imahen ni Santo Niño kay naa blessing pagkahuman sa Misa.

08/01/2022

ENERO 9, 2022 – DOMINGO
DOMINGO SA KAPISTAHAN SA PAGBUNYAG SA ATONG GINOO
(White)

TEMA: “IKAW ANG PINANGGA KONG ANAK, NAHIMUOT AKO KANIMO PAG-AYO!”

Karong adlawa gisaulog sa Simbahan ang piyesta sa Pagbunyag sa Ginoo, nga mao usab ang katapusan sa panahon sa Pasko. Para sa kadaghanan, ang Pasko natapos niadtong Disyembre 26; apan, sa Liturhiya sa Simbahan, ang Pasko karon lang nahuman. Busa, karon, mahimo na natong hiposon ang atong Christmas tree, mga bitoon, mga suga, ug ubang dayandayan sa kapaskohan.

Gipasabot sa mga teologo ang hinungdan sa pagpabunyag ni Kristo kang Juan. Nagpabunyag siya dili tungod kay nanginahanglan siya’g kapasayloan kondili tungod kay gusto niyang makighiusa sa katawhan. He shared our humanity so that we can share his divinity. He became one like us so that we could become one like him. Si Kristo nakighiusa sa nawala nga tawo, ug sa hinayhinay, iyang gidala ang tawo balik ngadto sa pagka-anak sa Dios. Ingon niini ang kinaiya sa tinuod nga gugma – andam magpaubos aron ipataas ang hinigugma.

Ang Pagbunyag ni Hesus usa usab ka Epipaniya; ning higayona gipadayag sa kalibotan ang iyang pagka-Anak sa Dios. Human sa pagbunyag kaniya, dihay tingog nga nadungog gikan sa langit: “Ikaw mao ang pinangga kong Anak. Nalipay ako pag-ayo kanimo.” Kining mga pulong maoy naghatag kang Kristo og kasiguroan sa dakong gugma sa iyang Amahan. Naghatag usab kini kaniya’g dakong kusog ug kaisog sa pagtuman sa misyon nga gisangon kaniya. Nindot kini nga punto para sa mga ginikanan. Kon gusto kamo nga mahimong lig-on ug matarong ang inyong mga anak, ipabati kanila ang inyong dili kaduhaduhaang gugma para kanila.

Ang pagbunyag ni Juan, ginamit ang tubig, nagtumong sa paghugas sa mga sala. Apan, si Juan mismo ang nagtudlo sa talagsaong bili sa bunyag nga pagahimoon ni Kristo: “Nagbunyag ako kaninyo pinaagi sa tubig. . . magbunyag siya kaninyo pinaagi sa Espiritu Santo ug sa kalayo.” Diha kang Kristo, ang mga binunyagan dili lamang mahugasan sa sala; madawat usab nila ang dakong dungog sa pagka-anak sa Dios.
Human siya gikoronahan sa pagka Santo Papa, si Pope John XXIII giduol sa usa ka pangulo ug giingnan: “Congratulations, your Holiness. This must be the greatest day of your life!” Apan, ang Santo Papa nitubag: “No. The greatest moment of my life was my baptism, not my inauguration as pope.” Para sa maong Santo Papa, nga karon naila na nga Saint John XXIII, ang iyang pagka-sinagop nga anak sa Dios mas bililhon pa kaysa iyang pagka Santo Papa.

Adunay inilang hari sa Francia nga ginganlag Louis. Matag tuig saulogon niya ang kasumaran sa iyang bunyag, dili ang adlaw sa iyang natawhan. Sa dihang gipangutana kon ngano, siya nitubag: “Para kanako, mas bilihon ang akong pagkahimugso sa Gingharian sa Dios kaysa akong pagkahimugso sa kalibutan.” Adunay punto ang maong hari, nga karon giila sa Simbahan nga Saint Louis IX. Ang bunyag bililhon kaayo tungod kay kini maghimo kanatong anak sa Dios ug manununod sa Gingharian sa Langit.

Ning kapistahan sa Pagbunyag sa Ginoo, gidasig kita nga mohatag og dakong bili sa atong pagkabinunyagan. Ang bunyag maoy pinakadakong grasya nga atong nadawat tungod kay pinaagi niini kita usab nahimong mga pinanggang anak sa Dios. Ang pagka anak sa Dios mas bililhon pa kaayo kaysa tanang matang sa titulo nga ikahatag ning kalibotan.
Diha sa bunyag, nakaambit kita dili lamang sa dignidad ni Kristo kondili sa iya usab nga misyon. Ang gugma sa Langitnong Amahan maoy nagdasig kang Kristo sa pagbuhat sa iyang misyon ning kalibotan. Hinaot nga kita usab, isip mga sinagop nga mga anak sa Dios, madasig sa pagpakaylap sa Maayong Balita ni Kristo ngadto sa tanang katawhan.

Human ning maong Piyesta, mosugod kita ning gitawag sa Simbahan og “Ordinaryong Panahon”. Ang Ordinaryong Panahon bililhon gihapon tungod kay diha sa ordinaryo ug inadlaw-adlaw natong kinabuhi kita gitawag nga mosunod sa mga lakang ni Kristo. Adunay mga tawo nga manggihatagon lamang kon Pasko. Kon dili Pasko, laog kaayo ug dili makamaong malooy sa isigkatawo. Ang uban maghinulsol lamang kon Kwaresma. Human sa Kwaresma pwerteng salbahisa. Dili kini sakto. Ang tinood nga Kristiyano buotan ug kasaligan bisan sa panahon nga ordinaryo.
Pamalandongan nato kini:

1. Sa bunyag nahimo kitang mga sinagop nga anak sa Dios. Giunsa man nato paghatag og bili kining maong kamatuoran?

(Bishop Abet Uy of Tagbilaran)

PASIUNA

Karon domigoha mao ang pagsaulog sa piyesta sa pagbunyag sa Ginoo. Si Jesus miduyog sa katawhan diha sa ilang pagpaabot og kaluwasan, ug naghalad sa iyang kaugalingon aron matuman kini. Mao kini ang gikahimut-an sa Dios. Nahibalo ba kita magpaubos alang sa kaayohan sa uban?
Ang bunyag sa tubig ug sa Espiritu Santo. Ang tubig makalinis sa tawo, apan ang Espiritu Santo mao ang mahimong giya sa kinabuhi sa binunyagan. Nagsige ba kitag pangayog pasaylo sa Dios? O, nahibalo ba usab kita magpatultol sa Balaang Espiritu.

KINUTLO GIKAN SA BASAHON NI PROPETA ISAIAS (Is. 42:1-4, 6-7)

Ang Ginoo miingon, "Tan-awa ang akong alagad, nga akong gitabangan, akong pinili, ug gikahimut-an nako pag-ayo; gihatagan ko siya ug gahum, hatagan niyag hustisya ang kanasuran. Dili siya mosinggit ni motuwaw ni maghimo siyag masabang pakigpulong sa kadalanan; maluluy-on siya sa mga huyang, ug matinabangon sa mga timawa; ipatuman gayod niya ang hustisya. Dili gayod siya molunga ni maluya hangtud nga mapatunhay niya ang hustisya dinhi sa kalibutan; ug ang kapuloan magpaabot sa iyang balaod."
Ako, ang Ginoo, nagtawag kanimo aron labanan mo ang katarong, pinaagi kanimo maghimo akog kasabutan uban sa tanang katawhan ug himoon ko ikawng kahayag sa kanasuran, aron pagpabuka sa mata sa mga buta ug pagpagawas sa mga binilanggo sa mangitngit nga bilanggoan.

ANG PULONG SA GINOO.
SALAMAT SA DIOS

SALMO RESPONSORYO
Ps. 29:1-2, 3-4, 3:9-10

Bendisyonan sa Ginoo og kalinaw ang iyang lungsod.

Hatagi ang Ginoo, kamong mga anak sa Dios, hatagi ang Ginoo sa himaya ug pagdayeg. Hatagi ang Ginoo sa himaya nga angay sa iyang ngalan; simbaha ang Ginoo diha sa balaan nga saput.
Bendisyonan sa Ginoo og kalinaw ang iyang lungsod.

Ang tingog sa Ginoo, anaa sa ibabaw sa katubigan, ang Ginoo, ibabaw sa halapad nga katubigan. Ang tingog sa Ginoo gamhanan; harianon ang tingog sa Ginoo.
Bendisyonan sa Ginoo og kalinaw ang iyang lungsod.

Nagadalugdog ang Dios sa himaya, ug diha sa iyang templo ang tanan nagaingon, "Himaya!" Ang Ginoo naglingkod sa trono ibabaw sa baha; ang Ginoo naglingkod sa trono nga hari sa kahangturan.
Bendisyonan sa Ginoo og kalinaw ang iyang lungsod.

KINUTLO GIKAN SA MGA BUHAT SA MGA APOSTOLES (Acts 10:34-38)

Si Pedro miingon, " karon naila kona ang Dios walay pinalabi. Ang mahadlokon kaniya ug ang nagabuhat sa matarong iyang dawaton sa walay pagsapayan sa bulok sa iyang panit. Nasayod kamo nga gipadala niya ngadto sa katawhan sa Israel ang mensahe sa Maayong Balita sa pakigdait pinaagi kang JesuCristo nga mao ang Ginoo sa tanan.
Nasayod kamo niadtong dakong hitabo sa yuta sa Israel; nagsugod kini sa Galilea human sa pagwali ni Juan mahitungod sa bunyag.
Nasayod kamo mahitungod kang Jesus nga Nazaretnon nga gibuboan sa Dios sa gahum sa Espiritu Santo. Miadto siya sa tanang dapit ug giayo niya ang tanan nga giyawaan, kay ang Dios diha man kaniya.

ANG PULONG SA GINOO.
SALAMAT SA DIOS

T. Aleluya. (Mk. 9:7)
Naabli ang mga langit ug ang tingog sa Amahan nadungog. Kini mao ang akong pinanggang Anak, pamatia ninyo siya.
T. Aleluya.

ANG PAGBASA GIKAN SA EBANGHELYO SUMALA NI SAN LUCAS (Lk. 3:15 -16, 21-22)

Misugod pagtubo ang paglaum sa mga tawo, ug nalibog sila kon kinsa gayod si Juan; naghunahuna sila nga tingali siya mao ang Mesiyas. Busa miingon si Juan kanilang tanan, “Nagbunyag ako kaninyo pinaagi sa tubig, apan may moabot nga labaw pa kaayo kanako. Dili gani ako angay bisan sa pagbadbad sa higot sa iyang sandalyas. Magbunyag siya kaninyo pinaagi sa Espiritu Santo ug sa kalayo.”
Tapos kabunyagi ang tanang mga tawo, gibunyagan usab si Jesus. Samtang nag-ampo siya naabli ang Iangit, ug mikunsad kaniya ang Espiritu Santo sa dagway sa usa ka salampati. Unya nabati ang usa ka tingog gikan sa Langit nga nag-ingon, “Ikaw mao ang pinangga kong Anak. Nalipay ako pag-ayo kanimo.”
ANG EBANGHELYO SA GINOO.
DAYGON IKAW, O CRISTO.

The Creed is said.

KATILINGBANONG PAG-AMPO

P: Diha sa pagbunyag kang Jesus Siya napuno sa Espiritu ug nahimo Siyang lig-on sa pag-atubang sa Iyang misyon. Sa atong bunyag usab kita nahiusa sa Amahan, Anak ug Espiritu Santo ug tungod niani nalig-on kita diha sa paghimo sa atong kaakuhan ilabi na ang pag-ampo alang sa panginahanglan sa tanang katawhan. Busa sangpiton nato ang Amahan ug ingnon: AMAHAN, PAMATI-A KAMI NGA MIDANGOP KANIMO.

a) Alang sa mga tinugyanan sa atong Simbahan — ang atong Santo Papa, mga Obispo, mga kaparian ug mga relihiyoso, nga mahingpit sila ug magmatinud-anon sa ilang pagsalig sa Dios ug sa usa’g usa. Mag-ampo kita sa Ginoo.

b) Alang sa tanang namunoan sa atong nasud, nga maningkamot sila pagpatigbabaw sa kahiusahan, kalinaw ug kaangayan alang sa kalamboan natong tanan. Mag-ampo kita sa Ginoo.

c) Alang sa atong mga kaigsuonan nga wala makasinati sa kahamugaway sa panginabuhi, nga ibubo sa Dios ang Iyang panalangin ngadto kanila aron matubag ang ilang inadlaw adlaw nga panginahanglan sa kinabuhi. Mag-ampo kita sa Ginoo.

d) Alang sa mga ginikanan, nga unta ilang danihon ang ilang mga anak sa pagpuyo nga mapaubsanon ug sa pagkinabuhi sa katarung ug gugma subay sa mga panig-ingnan ni Cristo. Mag-ampo kita sa Ginoo.

e) Alang kanatong tanan nga kanunay’ng nakadungog sa mensahe sa Dios, nga motuhop unta kini sa atong tagsatagsa ka kasingkasing aron ato kining mapuy-an ug mapaambit ngadto sa uban, ilabina dinhi sa atong katilingban. Mag-ampo kita sa Ginoo.

P: Amahang Langitnon, Imong gipadala kanamo ang Imong Anak aron Siya makatudlo kanamo sa dalan sa kaluwasan. Pinaagi Kaniya kami nagahangyo nga dunggon ug tubagon Mo ang among mga pag-ampo karon ug hangtud sa kahangturan. Amen.

01/01/2022

ENERO 2, 2022– DOMINGO
SOLEMNIDAD SA EPIPANIYA SA ATONG GINOO
(White) Pro Negritis

Sa iyang sulat nga “Novo Millenio Inuente” ( #54), ang Santo Papa, San Juan Pablo II mipahayag nga si Cristo mao ang adlaw kansang kahayag kinahanglan nga atong ipadan-ag sa uban. Ang Simbahan mao ang bulan nga nagdepende sa adlaw o kahayag ni Cristo sama nga kita nagdepende kang Cristo nga mao ang atong kahayag. Kining mga pulonga haum kaayo sa atong kapistahan karon nga mao ang Domingo sa Epipaniya, ang adlaw diin gipadayag si Cristo ngadto sa kalibutan. Kini ang eksena nga gisaysay kanato sa Ebanghelyo karun, diin ang tulo ka hari nga gikan sa sidlakan, mibisita sa Diosnong Bata didto sa Belen. Ang pagpadayag kang Jesus ngadto sa mga Gentil usa lamang ka timaan sa kahalapad o malukpanon nga buhat sa pangluwas sa atong Ginoo, ang kaluwasan dili lamang sa Israel kondili sa tibuok kalibutan.

Sama sa gisulat sa atong Santo Papa, kita usab gihagit niining Solemnidad sa Epipaniya sa pagpadan-ag sa kahayag ni Cristo ngadto sa uban ilabina sa atong kapanahonan karun. Unsaon man nato kini pagbuhat? Niining bag-ong tuig, kita giawhag sa paghatag og kamahinungdanon sa pag-ila kinsa gayud si Cristo sa atong kinabuhi, nakaila ba gayud kita Kaniya? Kasagaran man gud, ilabina sa atong kasinatian sa mga Gagmay’ng Kristohanong Katilingban, si Cristo gipakasama nato nga usa ka estatuwa diha sa atong panimalay og kapilya nga dekorasyon lamang ug wala gani nato tagda. Anaa unta kita’y mga Bibliya, apan gihimo lamang nato kini nga dekorasyon. Aron masinati si Jesus, makaila kita Kaniya ug mapuy-an nato ang Iyang Pulong sa atong kinabuhi, gikinahanglan nga moabli, mobasa, maminaw ug mamalandong kita sa Bibliya sa adlaw-adlaw (kung mahimo).
Mao kini ang una ug mahinungdanon natong buhaton niining bag-ong tuig, ilabina na niining unang Domingo sa tuig, ang Domingo sa Epipaniya. Atong ilhon si Jesus, puy-an ang Iyang mga Pulong ug ipadan-ag kini ngadto sa uban. Sama kang Jesus, kita usab kahayag sa uban, ilabi na kay nadawat nato ang bag-ong kinabuhi diha sa bunyag.
Ang ikaduha nga atong buhaton, mao ang pagpaningkamot nga makausab kita sa atong kinabuhi pinaagi sa paghimo og mga lakang nga makapangayo kita og pasaylo sa atong mga kasal-anan, makighiuli Kaniya ug kanila nga atong nasad-an ug madasigong mopadayag sa atong pagtoo, paglaum ug gugma ngadto Kaniya ug sa atong mga kaigsoonan. Oo, ang bag-ong tuig magmabungahon kon hatagan nato og bili kini kay sa mga panagna nga atong madunggan gikan sa mga manalagna. Magmabungahon usab ang atong bag-ong tuig kon dili kita mahaylo sa mga pagtental sa mga modernong himan sa kalibutan, sa konsumerismo, sa hedonismo ug sa materyalismo. Magpaduol kita kang Cristo aron mabuntog nato ang mga hadla ug tentasyon nga ilang dala.
Busa, paninguhaon nato nga mahimo kitang tinuod nga kahayag nga modan-ag ngadto sa uban. Atong himoon ang atong kaugalingon nga parol nga midan-ag sa tulo ka hari ug nagtultol kanila sa nahimutangan sa Diosnong Bata. Hinaut unta nga kining parola dili mapalong ug magpabilin nga nagsiga aron mohayag sa kangitngit sa kalibutan.
Giya alang sa pagpamalandong
Giunsa man nako paggamit ang kahayag ni Cristo ngadto sa uban luyo sa mga panghitabo karon sa atong katilingban? Nakatabang ba kini sa pagpadan-ag sa ilang kinabuhi?

PASIUNA

Ang Epipanya mao ang pagpaila kang Jesus nga atong Hari og Manluluwas dili lang sa mga Judio apan sa tanang katawhan. Niining maong kapistahan, gipahinumduman kita nga gihiguma sa Dios ang tanang nasud ug tanang kultura sa tibuok kalibutan. Nagkig-uban Siya kanato sa daghang paagi nga wala nato damha - pinaagi sa atong mga inspirasyon, mga panghitabo, ug diha sa Iyang Balaang Pulong. Hagit kanato karon nga masabtan ang mensahe sa Ginoo ug nga ato kining tubagon nga puno sa pagtoo, pagsalig, ug kaisog sama gibuhat sa mga Mago.

Unang Pagbasa Isa 60:1-6
Atong madungog sa unang pagbasa karon nga mipadayag si propeta Isaias sa himayaong umaabot nga gidalit sa Dios para sa Jerusalem.

ANG PAGBASA GIKAN SA BASAHON NI PROPETA ISAIAS (Is. 60:1-6)

Bangon, Jerusalem, ug sidlak kay miabot na ang imong kahayag, ug ang himaya sa GINOO misidlak na kanimo. Tabonan sa kangitngit ang kalibutan; ang katawhan tikyopan sa kangiob; apan ang GINOO mosidlak kanimo, ug makita diha kanimo ang iyang himaya. Ang kanasuran moduol sa imong kahayag, ug ang mga hari moduol sa lamdag sa imong kahayag.
Tan-awa ang imong palibot; makita mo nga nagtigom na sila ug moduol kanimo; gikan sa layong dapit mangabot ang imong mga anak lalaki ug kugoson ang imong mga anak babaye.
Malipay ka gayod inigkakita mo niini; mokusog pagpitik ang imong kasingkasing tungod sa kahinam, kay ang bahandi sa dagat mahianha man kanimo; ang bahandi sa kanasuran maimo man. Malukop ka sa daghang kamelyo sa Midia ug sa Epa; ang tanan nga gikan sa Seba magdalag bulawan ug insenso ug mag-awit silag mga pagdayeg alang sa GINOO.
ANG PULONG SA GINOO.
SALAMAT SA DIOS.

SALMO RESPONSORYO
(Ps. 72:1-2, 7-8, 10-11, 12-13)

T. Ginoo, ang tanang nasod sa yuta nagsimba kanimo.

O Dios, togahi ang hari sa imong panghukom, ug sa imong katarong, ang anak sa hari; Magmando siya nga matarong sa imong lungsod ug hukman niya ang mga nag-antos.

T. Ginoo, ang tanang nasod sa yuta nagsimba kanimo.

Ang katarong molambo sa iyang mga adlaw ug ang halawom nga kalinaw hangtud nga mawala nay buwan. Magmando unta siya gikan sa dagat ngadto sa dagat, ug gikan sa Suba ngadto sa kinatumyan sa yuta.

T. Ginoo, ang tanang nasod sa yuta nagsimba kanimo.

Ang mga hari sa Tarsis ug ang mga Pulo magdala og mga gasa; ang mga hari sa Arabia ug Seba magdala og mga halad. Ang tanang mga hari magsimba kaniya, ang tanang mga nasod mag-alagad kaniya.

T. Ginoo, ang tanang nasod sa yuta nagsimba kanimo.

Kay magluwas siya sa kabus kon magsangpit siya, ug sa nag-antos diha nga walay motabang kaniya. Maluoy siya sa ubos ug sa kabus; luwason niya ang mga kinabuhi sa kabus.

T. Ginoo, ang tanang nasod sa yuta nagsimba kanimo.

Ikaduhang Pagbasa Eph 3:2-3.5-6
Si San Pablo nagpahinumdum kanato karon nga sa pag-abot ni JesuCristo nahanaw na ang butang nga nakapahimulag sa mga Judio ug Hentil. Giimbita sila nga sa maghiusa sa pagmugna ug isa ka pundok sa “ Katawhan sa Dios” pinangulohan ni Jesus ang Manluluwas sa tanan.

ANG PAGBASA GIKAN SA SULAT NI SAN PABLO NGADTO SA TAGA-EFESO (Eph. 3:2-3, 5-6)

Sa walay duha-duha nakadungog kamo nga ang Dios, pinaagi sa iyang grasya, naghatag kanako niining buhata alang sa inyong kaayohan. Gibutyag ug gipadayag sa Dios kanako ang iyang tinago nga laraw sumala sa gisulat ko na kaninyo sa daklit. Kaniadto wala kini ibutyag ngadto sa mga tawo, apan karon gipadayag na kini sa Dios pinaagi sa Espiritu ngadto sa iyang balaang mga apostoles ug mga propeta. Ang tinago mao nga pinaagi sa Ebanghelyo ang mga dili Judio, sama sa mga Judio, makadawat usab sa mga panalangin sa Dios. Mga bahin sila sa usa lamang ka lawas, ug makaambit sa saad sa Dios pinaagi kang Cristo Jesus.
ANG PULONG SA GINOO.
SALAMAT SA DIOS.

ALELUYA (Mt. 2:2)
T. Aleluya.
Nakakita kami sa iyang bitoon didto sa silangan, ug nanganhi kami aron pagsimba sa Ginoo.
T. Aleluya.

ANG PAGBASA GIKAN SA EBANGHELYO SUMALA NI SAN MATEO (Mt. 2:1-12)

Si Jesus natawo sa Iungsod sa Bethlehem, sa yuta sa Judea, sa panahon ni Haring Herodes. Unya may pipila ka mga tawo nga maalamon bahin sa mga bitoon nangabot sa Jerusalem gikan sa sidlakan ug nangutana: “Hain man ang bata nga natawo nga maoy mahimong hari sa mga Judio? Nakita namo ang iyang bitoon sa pagsubang niini didto sa sidlakan, ug moanhi kami aron pagsimba kaniya.”
Sa pagkabati ni Hari Herodes niini, wala siya mahimutang ingon man ang tibuok Jerusalem. Gitigom niya ang mga pangulong pari ug ang mga magtutudlo sa Balaod ug gipangutana niya sila. “Asa man matawo ang Mesiyas?”
Sila mitubag, “Sa lungsod sa Bethlehem sa Judea, mao kini ang gisulat sa propeta: ‘Ikaw, Bethlehem, sa yuta sa Juda, Dili ka iwit sa mga dagkong lungsod sa Juda; Kay maggikan kanimo ang usa ka pangulo nga maoy magmando sa akong katawhan, ang Israel.”’
Busa gipatawag ni Herodes ang mga dumuduong nga gikan sa sidlakan alang sa usa ka tigom nga tinago ug iyang nasayran gikan kanila ang untop nga takna sa pagsubang sa bitoon. Unya iyang gipaadto sila sa Bethlehem ug giingnan, “Lakaw kamo ug pangitaa ninyo pag-ayo ang bata, ug sa makaplagan na ninyo siya, pahibaloa ako aron moadto ako ug mosimba usab kaniya.”
Unya nanlakaw sila. Samtang nagpanaw sila, nakita nila ang bitoon - ang mao gihapong bitoon nga nakita nila didto sa sidlakan - ug nag-una kini kanila hangtud nga miabot kini ug mihunong tungod gayod sa nahimutangan sa bata. Nalipay sila pag-ayo sa pagkakita nila sa bitoon! Unya misulod sila sa balay ug ilang nakita ang bata uban sa iyang inahan nga si Maria. Nanluhod sila ug misimba kaniya; unya giablihan nila ang gisudlan sa ilang mga gasa ug mihalad sila kaniyag bulawan, insenso, ug mira. Pinaagi sa damgo gipahimatngonan sila sa Dios sa dili pagbalik ngadto kang Herodes; busa namauli sila agi sa laing dalan.
ANG EBANGHELYO SA GINOO.
DAYGON IKAW, O CRISTO.
The Creed is said.

KATILINGBANONG PAG-AMPO

P: Mag-ampo kita sa Dios Amahan nga maangkon nato ang kahayag nga gipadayag ni JesuCristo ngadto sa Iyang katawhan. Ug sa matag pangaliya moingon kita: GINOO, IPADAN-AG KANAMO ANG KAHAYAG NI CRISTO.

a. Nga ang kahayag ni Cristo modan-ag sa mga pangulo sa simbahan, ang Santo Papa, mga obispo ug kaparian nga magmadasigon silang mosangyaw sa Ebanghelyo ilabina niadtong wala moila nga si Cristo mao ang matuod nga kahayag. Mag-ampo kita sa Ginoo.

b. Nga ang kahayag ni Cristo molamdag sa mga lideres sa atong panggamhanan kansang katawhan nga ilang gialagaran nagpaabot sa matuod nga kaangayan, kalinaw ug kahiusahan. Mag-ampo kita sa Ginoo.

c. Nga ang kahayag ni Cristo modan-ag sa tanan nga mitugyan sa ilang kaugalingon sa pag-alagad ilabina diha sa matag pangulo sa GKK magpabilin unta silang lig-on sa pagbuhat sa ilang kaakuhan. Mag- ampo kita sa Ginoo.

d. Nga ang kahayag ni Cristo mosidlak sa matag kasingkasing sa atong mga kaigsuonan nga nag-antus sa kawad-on aron dili sila kawad-an sa paglaum ug kadasig sa pagpakabuhi niniing kalibutana. Mag-ampo kita sa Ginoo.

e. Nga ang kahayag ni Cristo kanunay magsiga sa matag usa kanato aron kita sa kanunay magmainiton nga moalagad sa Dios ug sa atong isigkatawo. Mag-ampo kita sa Ginoo.

P: Mahigugmaong Amahan, dungga ang pag-ampo sa imong katawhan ug giyahi ang among mga panghunahuna nga sa kanunay magsunod kami sa imong kabubut-on ug sa gihapon ang imong ngalan among pagadaygon pinaagi ni Cristo ang matuod nga kahayag ug Ginoo. Amen

Source:

Balitang Hari
January 6, 2018 ·

21/08/2021

AGOSTO 22, 2021-DOMINGO
IKAKAWHAAG-USA NGA DOMINGO SULOD SA TUIG

Unsa may atong reaksyon kon makadungog kita og pagtulon-an nga lisud sabton ug lisud buhaton?

Human si Jesus magsulti mahitungod sa iyang lawas ug dugo nga ihatag para sa mga tawo isip kalan-on ug ilimnon, daghan sa iyang mga tinun-an ang miingon: “Lisod kaayo ang maong pagtulon-an. Kinsay makadawat ani?” Ug tungod niini, daghan kanila mihunong sa pagsunod kang Jesus.

Aduna pay mga nahiunang pagtulon-an si Jesus nga dili sayon sundon. Pananglitan: “Kon dunay mosagpa kanimo sa tuong aping, ipasagpa pud ang wala”; “Pasayloa ang tawo nga makasala kanimo sulod sa kapitoan ka pito ka higayon”; “Higugmaa ang imong mga kaaway”; ug “Ibaligya ang imong kabtangan ug ihatag sa mga kabos”. Pila man kanato ang midumili sa pagsunod kang Cristo tungod ning mga pagtulun-an.

Apan, bisan daghan ang nibiya kang Jesus, diha gihapoy nagpabilin nga mitoo kaniya. Sa iyang kabahin si Pedro namulong: “Ginoo, kinsa may lain namong kapaingnan? Naa kanimo ang mga pulong sa kinabuhing dayon.”

Karong panahona, si Jesus nagpadayon sa buhat sa pagpanudlo pinaagi sa iyang Simbahan. Daghang mga tawo ang nalamdagan ug nagiyahan tungod sa mga pagtulon-an nga gisangyaw sa mga obispo, mga pari, mga relihiyoso, ug mga magtutudlo sa pagtoo. Apan, dili nato malilong nga adunay mga pagtulon-an sa Simbahan nga dili “popular” o lisud dawaton sa ubang mga tawo, apil na niini ang mahitungod sa artificial contraception, premarital s*x, divorce, same-s*x union, ug uban pa. Ang pangutana mao kini: Kon maglisud kita og sabut sa usa ka pagtulon-an sa Simbahan, unsa may angay natong buhaton? Dili ba lang nato tagdon ang pagtulon-an ug isipon nga kinaraan? Mangluod ba kita ug mohunong sa pagsimba? Mobalhin ba kita og relihiyon? O kaha, maningkamot kita sa pagsabut sa pagtulon-an pinaagi sa pagtoon ug pagpatudlo sa mga tawong adunay dagkong kahibalo?

Para sa usa ka matinud-anong sakop sa Simbahan, ang naulahing sugyot maoy labing maayo. Sa dili pa nato sawayon o balewalaon ang usa ka pagtulon-an, maningkamot una kita sa pagsabot niini. Magbasa kita og mga libro ug mangayo sa opinyon sa mga respetadong tawo sa Simbahan sama pananglit sa mga pari ug relihiyoso nga may edukasyon sa teolohiya. Pinaagi sa pagtoon ug sa pagpaminaw og tambag, ang usa ka tawo malamdagan ug makahimo sa angay’ng buhaton.

Usa ka babaye ang masuk-anong miingon sa pari: “Padre, gilainan ko nga naminaw sa atong pagbasa nga sinulat ni San Pablo. Hunahunaa ra gud nga giingnan ming mga babaye nga magpaubos ug magmasinugtanon sa among bana kay kono ang bana maoy ulo sa pamilya sama nga si Cristo maoy ulo sa Simbahan. Kalain gud ani! Mao ni ang makapadako sa ulo sa mga bana!”

Unya ang pari mikuha sa basahon ug kalmado nga mipasabut: “Day, ato una nga tiwason sa pagbasa ang gisulat ni San Pablo. Siya miingon: ‘Ug kamong mga bana, higugmaa ang inyong asawa sama sa paghigugma ni Cristo sa iyang simbahan’. Nadungog ba nimo ni Day?”

“Oo, padre”, mitubag ang babaye.

“Unya, kahibalo baka giunsa paghigugma sa Dios ang iyang Simbahan?” nangutana ang pari.

Abtik nga mitubag ang babaye: “Oo, padre. Garabe nga paghigugma. Gihalad gud niya ang Iyang kinabuhi para sa Simbahan.”

Ug ang pari miingon: “Mao kana ang gisugo ni San Pablo sa tanang mga bana. Angay nila alagaran ug pakamatyan ang ilang asawa. Karon, nasuko ka pa ba ni San Pablo?”

Mipahiyum ang babaye ug miingon, “Dili na padre oy.”

Pamalandong gikan ni Msgr. Abet Uy

PASIUNA

Mga igsoon:
Adunay daghang mga higayon diha sa atong kinabuhi nga kinahanglan kitang mohatag sa atong desisyon. Apan adunay labing importante sa tanan, nga mao kini: Unsa ang lugar sa Dios sa atong kinabuhi? Gihatagan ba nato Siya'g luna? O mipili ba kita'g laing dios-dios aron himoon natong agalon?
Karon gipapili kita ni Jesus: sa pagpabilin uban Kaniya o sa pagpahilayo Kaniya.
Unsay atong itubag Kaniya?

Unang Pagbasa (Jos. 24: 1-2, 15-17)
Ang Simbahan mipili sa Ginoo. Ang katawhan sa Dios nahibalo nga utang nila ang ilang kagawasan ug ang ilang nasud sa makaluwas nga gugma sa Dios. Gipili sa mga Hebreo ang pagsunod sa Dios ug sa pag-alagad Kaniya.

ANG PAGBASA GIKAN SA BASAHON NI JOSUE (Jos. 24:1-2, 15-17, 18)

Gitigum ni Josue ang tanang banay sa Israel didto sa Siquem. Gitawag niya ang mga pangulo, ang mga kadagkoan, ang mga maghuhukom, ug ang mga opisyal sa Israel, ug nanuol sila sa atubangan sa Dios. Giingnan ni Josue ang tanang katawhan, “Mao kini ang giingon sa Dios sa Israel, ‘Kaniadto ang mga katigulangan ninyo nagpuyo sa tabok sa Suba sa Eufrates, ug nagsimba sa laing mga dios. Usa kanila mao si Tera, amahan ni Abraham ug ni Nahor.”’
“Kon dili kamo andam pag-alagad sa GINOO, pagpili karong adlawa kon kinsay alagaran ninyo, ang mga dios ba nga gialagaran sa inyong mga ka¬tigulangan didto sa Mesopotamia, o ang mga dios ba sa mga Amorihanon dinhi sa yuta nga gipuy-an ninyo karon. Apan alang kanako ug sa akong pamilya, mag¬-alagad kami sa GINOO.”
Ang mga tawo mitubag, “Dili gayod kami mobiya sa GINOO ni moalagad sa Iaing mga dios! Ang GINOO nga atong Dios nagluwas sa atong mga katigulangan ug kanako sa kaulipnan sa Ehipto, ug nakita nato ang dagkong mga butang nga gibuhat niya. Gilikay kita niya sa kadautan bisan diin kita paingon taliwala sa tanang kanasuran nga atong giagian. Sa atong pagdasdas, giabog sa GINOO ang katawhan, ang mga Amorihanon nga nagpuyo sa kayutaan. Busa mag-alagad usab kami sa GINOO, kay siya amo man ang Dios.”

ANG PULONG SA GINOO.
SALAMAT SA DIOS.

SALMO RESPONSORYO
(Ps. 34:2-3, 16-17, 18-19, 20-21, 22-23)

T. Tagamtama ug tan-awa ang kaayo sa Ginoo.

Daygon ko ang Ginoo sa tanang panahon; ang Iyang pagdayeg maania kanunay sa akong ba-ba. Pahimayaa ang akong kalag diha sa Ginoo; ang mapaubsanon makadungog kanako ug malipay.

T. Tagamtama ug tan-awa ang kaayo sa Ginoo.

Ang Ginoo nagatan-aw sa matarong, ug nagapatalinghog sa ilang mga singgit. Ang Ginoo nagasudya sa mga nagabuhat og dautan, aron dili na sila hinumdoman sa yuta.

T. Tagamtama ug tan-awa ang kaayo sa Ginoo.

Sa pagsangpit sa matarong, namati kanila ang Ginoo, ug sa tanan nilang mga kasakit giluwas niya sila. Ang Ginoo haduol sa gisulay nga tawo; ug sila nga naguol sa espiritu Iyang giluwas.

T. Tagamtama ug tan-awa ang kaayo sa Ginoo.

Daghan ang mga kaguol sa tawo nga matarong, apan niining tanan ang Ginoo nagapalingkawas kaniya; Nagabantay siya sa tanan niyang kabukogan; ug walay usa kanila nga mabali.

T. Tagamtama ug tan-awa ang kaayo sa Ginoo.

Ang dautang mga buhat nagapatay sa dautang tawo, ug ang mga kaaway sa matarong nagabayad sa ilang kalapasan. Apan ang Ginoo nagaluwas sa kinabuhi sa iyang mga sulugoon; ug walay mahulog sa kalapasan kanila nga nagadangop kaniya.

T. Tagamtama ug tan-awa ang kaayo sa Ginoo.

Ikaduhang Pagbasa (Ef. 5: 21-32)
Ang kasabutan sa kaminyoon. Diha sa kaminyoon gipili sa magtiayon ang paghigugma ug pagkamatinud-anon sa usa'g-usa ug sa paghatag sa ilang kaugalingon ngadto sa usa'g-usa sama sa paghatag ni Kristo sa Iyang kaugalingon ngadto sa Simbahan.

ANG PAGBASA GIKAN SA SULAT NI SAN PABLO NGADTO SA TAGA-EFESO (Eph. 5:21-32)

Tungod kang Cristo pagtinahuray kamo. Mga asawa, tahora ug sunda ninyo ang inyong bana sama nga nagtahud ug nagsunod kamo sa Ginoo. Kay ang bana mao ang ulo sa iyang asawa ingon nga si Cristo maoy ulo sa simbaban; ug si Cristo mismo mao ang Manluluwas sa simbahan nga mao ang iyang lawas. Busa kina¬hanglan motahud ug mosunod ang mga asawa sa ilang bana ingon nga ang simbahan nagtahud ug nagsunod kang Cristo. Mga bana, higugmaa ang inyong asawa ingon nga gihigugma ni Cristo ang simbahan ug gitugyan ang iyang kinabuhi alang niini. Gihimo niya kini aron paghalad sa simbahan ngadto sa Dios pinaagi sa iyang pulong, human niya kini hugasi sa tubig. Sa ingon niini, gitugyan niya ang simbahan alang kaniya mismo diha sa bug-os niyang kaanyag, putli ug walay ikasaway, walay buling o kunot, o bisan unsang apan. Kinahanglan nga ang mga bana mahigugma sa ilang asawa ingon nga nahigugma sila sa ilang kaugalingong lawas. Ang bana nga nahi¬gugma sa iyang asawa nahigugma usab sa iyang kaugalingon. Walay nasilag sa kaugalingon niyang lawas; hinonoa, pakan-on niya kini ug atimanon sama sa gibuhat ni Cristo sa simbahan, kay mga bahin man kita sa iyang lawas. Sumala sa giingon sa Kasulatan, “Tungod niini ang Ialaki mobiya sa iyang amahan ug inahan ug motipon sa iyang asawa, ug silang duha mahimong usa.” May dakong kamatuoran kining bahina sa Kasulatan, ug sa akong hunahuna nagpasabot kini kang Cristo ug sa simbahan.

ANG PULONG SA GINOO.
SALAMAT SA DIOS.

ALELUYA (Jn. 6:63c, 68c)
T. Aleluya.
Anaa kanimo ang mga pulong nga naghatag ug kinabuhing walay katapusan.
T. Aleluya.

ANG PAGBASA SA EBANGHELYO SUMALA NI SAN JUAN (Jn. 6:60-69)

Daghan sa iyang mga tinun-an nakadungog niini ug miingon, “Lisod kaayong dawaton kining pagtulon-ana. Kinsa bay makasabut niini?” Bisa’g walay nagsulti kaniya, nahi¬balo si Jesus nga nagbagulbol ang iyang mga tinun-an bahin niini; busa giingnan niya sila, “Nakapabugnaw ba kini sa inyong pagtuo kanako? Pananglit makita ninyo ang Anak sa Tawo nga mokayab balik sa iyang gigikanan, mabugnaw ba lang gihapon kamo? Ang naghatag og kinabuhi mao ang Espiritu; dili kini mahimo sa tawo. Ang mga pulong nga akong gisulti kaninyo Espiritu ug kinabuhi; apan pipila kaninyo wala manuo.” (Nahibalo si Jesus sukad pa sa sinugdan kinsay dili motuo, ug kinsay magbudhi kaniya.) Ug midugang siya sa pag-ingon, “Mao man gani nga gisultihan ko kamo nga walay makaari kanako gawas kon itugot kini sa Amahan.” Tungod niini daghan sa iyang mga tinun-an mibiya ug wala na gayod mokuyog kaniya. Busa miingon si Jesus sa napulog-duha ka tinun-an, ‘Ug kamo, mobiya ba usab kamo kanako?” Si Simon Pedro mitubag kaniya, “Ginoo, kinsa may among kapaingnan? Anaa kanimo ang mga pulong nga naghatag og kinabuhing walay kata¬pusan. Nagtuo kami ug nasayod nga ikaw mao ang Balaan nga Dios.”
ANG EBANGHELYO SA GINOO.
DAYGON IKAW, O CRISTO.

The Creed is said.

KATILINGBANONG PAG-AMPO

P: Mga igsuon mag-ampo kita ngadto sa atong Langitnong Amahan, nga maoy tuburan sa kaluoy ug panabang. Uban sa atong matuohon ug masaligong kasingkasing atong ipadangat Kaniya ang tanan natong panginahanglan nga mahasubay unta kini sa Iyang kabubut-on. Masaligon kitang moingon: GINOO, DUNGGA ANG IMONG KATAWHAN.

a.) Sa nagdumala sa atong Simbahan, Santo Papa Francisco mga kaobispohan, kaparian, mga layko nga sa ilang pagtahan sa kinabuhi diha sa pagserbisyo, ila untang makita ang tinuod nga kalig-on diha kang Cristo. Mag-ampo kita sa Ginoo.

b.) Sa mga nangulo sa atong panggamhanan, ila untang masinati ang tinuod nga pagserbisyo nga gipakita ni Cristo, ug mamahimo nilang sumbanan diha sa ilang pag-alagad sa tanang katawhan. Mag-ampo kita sa Ginoo.

c.) Sa mga igsuon nato nga anaa sa kahimtang sa sakit, kalisud sa kinabuhi, ug nawad-an sa paglaum, ila untang mahinumduman si Cristo ang tinuod natong kalig-on ug madawat nila ang ilang mga kasakitan ug mahiusa diha ni Cristo. Mag-ampo kita sa Ginoo.

d.) Sa atong lokal nga panggamhanan ilabi na sa mga Pangulo, masinati unta nila si Cristo nga maoy matuod nga maggiya kanila sa ilang mga plano sa pagmugna og proyekto nga makaayo sa atong siyudad. Mag-ampo kita sa Ginoo.

e.) Sa atong katilingban, mamahimo unta natong sumbanan ang pag-alagad ni Cristo ilabina sa atong pag-atubang sa kamatuoran sa atong pamilya ug mga silingan. Mag-ampo kita sa Ginoo.

P: Makagagahum ug tunhay’ng buhi nga Dios, sa Imong walay kinutubang gugma, dungga ang mga pag-ampo sa Imong katawhan. Kini among gilauman nga madawat pinaagi ni Cristo among Ginoo. Amen.

Source:
Balitang Hari
August 15, 2015 ·