Katribu Youth

17/09/2026

𝐋𝐮𝐩𝐚𝐧𝐠 𝐧𝐢𝐧𝐮𝐧𝐨, 𝐝𝐞𝐩𝐞𝐧𝐬𝐚𝐡𝐚𝐧! 𝐏𝐚𝐧𝐝𝐚𝐫𝐚𝐦𝐛𝐨𝐧𝐠, 𝐤𝐨𝐫𝐚𝐩𝐬𝐲𝐨𝐧, 𝐚𝐭 𝐩𝐚𝐬𝐢𝐬𝐦𝐨, 𝐥𝐚𝐛𝐚𝐧𝐚𝐧!

Sa September 21, 2026, tutungo sa Liwasang Bonifacio at Mendiola ang mga Katutubo, Moro, at mga advocates upang ilahad ang mga panawagan laban sa pang-aagaw sa lupang ninuno, pagkawasak ng kabuhayan at kalikasan, korapsyon, at mga paglabag sa karapatang pantao.

Para sa mga Katutubo at Moro, ang korapsyon at pandarambong ay hindi hiwalay sa patuloy na pagkamkam sa mga lupain at likas-yaman. Sa likod ng mga proyektong pagmimina, enerhiya, at Pax Silica, nagtutulungan silang mga pasista at kurakot para sa tuluyang pagpapayaman ng kanilang mga bulsa. Kailangan nilang managot sa lahat ng krimen laban sa taumbayan!

Dadalhin natin sa lansangan ang mga panawagan para sa tunay na pagkilala at proteksyon sa karapatan ng mga Katutubo at Moro, para sa pananagutan, at para sa kaunlarang nakabatay sa ating kapasyahan.

13/09/2026

May terorismo ng estado sa Cagayan Valley kaya may aktibismo! Aktibista, hindi terorista!

Ngayong linggo, nakiisa ang Kabataan para sa Tribung Pilipino (Katribu Youth) sa isang kilos-protesta upang kundenahin ang gawa-gawang mga kaso laban sa mga progresibong organisador sa Cagayan Valley. Sa gitna ng patuloy na panunupil, ginagamit ang Terrorism Financing Prevention and Suppression Act (TFPSA) at iba pang batas bilang sandata upang kriminalisahin ang lehitimong pag-oorganisa, pagtatanggol sa lupa at kabuhayan, at paglaban para sa karapatan ng mamamayan. Hindi terorismo ang pakikiisa sa pakikibaka ng mga katutubo at magsasaka sa rehiyon, gayundin sa ibang mga sektor.

Sa halip na sagutin ng gobyerno ang mga panawagan at kampanya, layon nitong patahimikin ang lahat ng aktibistang nagsasalita hinggil sa mapaminsalang pagmimina, pagpapalayas sa mga katutubo. Militarisasyon ang sagot na siyang numero unong tagapangasiwa ng pagbubusal at panghaharas ng mga aktibista, katulad na lamang ng kaso laban sa Cagayan 11.

Lalo lamang nitong ipinapakita kung nasaang panig ang ating gubyerno. Dahil ang Cagayan 11 ay binubuo nila Agnes Mesina, Walter Villegas, Jhames Paredes, at Nelson Escalante na siyang mga kabataang lider, organisador, at aktibistang matagal nang nakikibaka para sa karapatan ng mamamayan, kalikasan, at komunidad sa Cagayan Valley. Mula sa paglaban sa mapaminsalang pagmimina sa Didipio at Dupax del Norte, pagtatanggol sa Sierra Madre at mga komunidad ng Cagayan at Isabela, hanggang sa pagtutol sa Anti-Terrorism Law, patuloy nilang ginagamit ang kanilang boses at organisasyon upang ipaglaban ang demokratikong karapatan ng kabataan at mamamayan. Ang kanilang paninindigan ay hindi krimen, ito ay lehitimong pakikibaka laban sa pang-aabuso, pagkawasak ng kalikasan, at mga patakarang nagpapahirap sa taumbayan.

Ayon sa Karapatan, nakapagtala sila ng 259 na biktima ng Anti-Terrorism Act at Terrorism Financing Prevention and Suppression Act, na karamihan ay mga aktibista, magsasaka, organisador ng mga unyon, at mga human rights worker. Para sa kanila, malinaw na ginagamit ang dalawang batas laban sa terorismo upang tutukan, gipitin, at patahimikin ang mga kumokontra at nagpapahayag ng pagtutol.

Malinaw ang tindig ng Katribu Youth na hindi krimen ang ipaglaban ang lupang ninuno. Ibasura ang Terror Law at TFPSA!

28/08/2026

KUNDENAHIN ANG ILIGAL NA PAG-ARESTO SA 12 KATUTUBO’T MAGSASAKA SA BARIKADA NG KASIBU!

Mariing kinukundena ng Kabataan para sa Tribung Pilipino (Katribu Youth) ang iligal na pag-aresto sa 13 residente ng Kasibu, Nueva Vizcaya na nagbabarikada laban sa panghihimasok ng North Luzon Mineral Resources Corp. (NLMRC). Isa itong patunay sa sabwatan ng estado at ng malalaking kumpanya ng minahan upang supilin ang lehitimong panawagan ng mga mamamayan na protektahan ang lupa, kabuhayan, buhay, at karapatan.

Hindi ito ang unang arestuhan na naganap sa barikada. Matatandaan noong ika-19 ng Agosto, tatlong (3) katutubo ang inaresto sa Brgy. Paquet dahil sa masugid nilang pagharang sa NLMRC na mag-akyat ng sasakayang pangmina at krudo sa tabing ng anila’y “farm-to-market road” o “government property” sa lugar. Batid ng mga residente ang mapaminsalang kasaysayan ng kumpanya sa kanilang lupang sakahan na nagdulot ng malalaking sinkhole at mga kemikal sa kanilang lupa.

Napakahalaga ng kalikasan at lupang ninuno para sa mga mamamayan ng Kasibu. Matatagpuan dito ang Caraballo Mountain Range at mga lambak na sinusuplayan nito ng tubig. Karugtong nito ang Sierra Madre at matatagpuan dito ang maraming matatandang kagubatan na tinitirhan ng mga endemic species sa Luzon. Dagdag pa rito, marami sa naninirahan sa Barangay Pao at Paquet ang vegetable farmer; umaani ng luya, sibuyas, at dalandan. Importante sa agrikultura ng Kasibu ang masustansyang lupa na walang bakas ng polusyon mula sa pagmimina.

Ang pag-aresto sa 12 kabahagi sa barikada ay patunay lamang ng mapanupil na taktika ng NLMRC na gamitin ang kamay ng batas upang supilin ang pagtutol ng mga residenteng maaapektuhan ng kanilang pagmimina. Kadugsong ito ng mga dating pagsampa ng kaso laban sa mga abogado at paglusob ng kapulisan sa mga kampuhan.

Sa kabila ng mga atake, patuloy ang pakikibaka ng mga mamamayan ng Kasibu! Sa nagdaang buwan, tuluy-tuloy ang pagtaguyod nila ng kanilang pagbabarikada na nagresulta sa 3 buwan na paralisasyon ng mga operasyon ng mina. Ipinapakita nito na sa kolektibong pagkilos, maipagtatagumpayan ang bawat laban at barikada.

Kaya sa aming kapwa kabataan, tumindig kasama ang mga residente ng Kasibu! Palayain ang 12 katutubo’t magsasaka na iligal na inaresto! Palayasin ang militar sa kanayunan!

21/08/2026

LUPANG NINUNO SA KATUTUBO, HINDI SA PAX SILICA!

Lumahok ang Kabataan para sa Tribung Pilipino (Katribu Youth), kasama ang iba't ibang progresibong organisasyon ng mga kabataan, sa isang iglap protesta sa harap ng opisina ng Bases Conversion and Development Authority upang tutulan ang Pax Silica Initiative na umaapak sa karapatan ng mga katutubo sa lupang ninuno at sariling pagpapasiya. Ginawa ito para ibunyag ang mga kasinungalinan ni Joshua Bingcang, Chief Executive Officer ng BCDA, na nasa Manila Hotel upang ipagmalaki ang umano’y “kaunlaran” na dala ng Pax Silica.

Ipinalalaganap ng BCDA na walang katutubong mapapaalis sa kanilang lupain dahil wala umanong titulo ang mga Ayta sa lupang kanilang gagamitin. Ngunit, hindi maikukulong sa papel ang batayan ng lupang ninuno. Bago pa man magkaroon ng base ang mga Amerikano at ng mismong BCDA, higit na pinayayaman na ng mga katutubong Ayta ang lupa sa Capas, Tarlac para sa kanilang araw-araw na pamumuhay. Mismong mga Ayta mula Sitio Sapang Kawayan ang nagpahayag ng pagtutol sa Pax Silica dahil banta ito sa kanilang kabuhayan, sagradong lugar, at mga halaman at hayop na mahalaga sa kanilang panggagamot at pagkain. Sa kabila nito, may ilang katutubong Ayta ang nakakuha ng liham mula sa BCDA na kailangan na nilang umalis sa kanilang mga bahay at lupa bago matapos ang Disyembre.

Makatwiran ang hinaing ng mga kabataan sa BCDA sa lantaran nitong pagsisinungaling at pagnananakaw sa mga katutubo. Ngunit, habang mapayapang nagproprograma ang mga kabataan sa harap ng BCDA ay hinarangan, pinagtutulak, at pilit pinatitigil ng mga pribadong kapulisan ng BGC ang mga lumahok dito. Sa halip na magsilbi sa mamamayan, patuloy na binubusalan ang mga kabataang ipinaglalaban ang interes at karapatan ng mga batayang sektor ng lipunan.

Kinukundena ng Katribu Youth ang panggigipit ng kapulisan sa aming programa. Naniniwala kami na hindi dahilan ang pagiging private property ng gusali para supilin ang pagpapahayag ng hinaing ng mga mamamayan. Taliwas ito sa pahayag ni Bingcang na "standard practice" ng BCDA ang pakikinig sa mga komunidad at mga sumusuporta sa kanilang laban. Malinaw na ang "standard practice" nila ay panlilinlang at pagsisinungaling upang makuha ang lupang ninuno mula sa mga katutubong Ayta. Naniniwala kami na ang tunay na kaunlaran ay hindi makikita sa mga proyektong tulad ng New Clark City at Pax Silica kundi sa pagkilala, paggalang, at pagtatanggol sa karapatan ng mga katutubo sa kanilang lupang ninuno.

Kaya naman marapat singilin ang BCDA sa mapanlinlang nitong gawi. Dapat din singilin si Marcos Jr., ang tuta ng Imperyalismong US, sa pagpasok sa mga inisyatibang higit na pumapabor sa interes ng mga dayuhan kaysa sa sarili niyang kababayan. Makakaasa ang administrasyon ni Marcos Jr. na kung patuloy silang magpapakatuta sa Estados Unidos at magbibingi-bingihan sa hinaing ng mamamayan, dadagundong ang lansangan sa sama-samang pagsigaw at pagkilos ng sambayanan upang pigilan at labanan ang Pax Silica Initiative at itaguyod ang karapatan ng mga katutubong Ayta sa kanilang lupang ninuno!

REJECT PAX SILICA!
LUPANG NINUNO, DEPENSAHAN, IPAGLABAN!

📸: College Editors Guild of the Philippines

19/08/2026

17/08/2026

BCDA, TAGABENTA NG LUPA NG MGA AYTA!

Ano nga ba ang papel ng Bases Conversion Development Authority (BCDA) sa pagpapalayas ng mga Ayta sa kanilang lupang ninuno? Mula sa dating mga base militar ng US, pumusisyon ang BCDA noong 1992 na layong magtayo ng iba’t ibang porma ng land use conversion sa lupang ninuno ng mga Ayta.

Sa halip na ibalik sa mga Ayta ang lupa, nakita itong pagkakataon ng BCDA upang humuthot ng yaman sa likas na yaman at minerales ng mga Ayta para maghakot ng dayuhan at lokal na pamumuhunan.

Sa ating kampanya tutol sa Pax Silica, mainam na alamin natin ang mapanlinlang na kasaysayan ng BCDA sa isang educational discussion ngayong araw:

📅 August 17 (Mon) 7:00-8:00 PM
📍 Google Meet

Dumalo at magpadalo! Makiisa sa pakikibaka ng mga Ayta laban sa imperyalistang pandarambong! Mag-message lamang sa aming page para makasali sa talakayan!

13/08/2026

HANGGA’T MAY PANDARAMBONG SA LUPA AT MILITARISASYON SA ABRA, MAGLULUWAL ITO NG PAGLABAN PARA SA TUNAY NA KAPAYAPAAN! PAGPUPUGAY KAY EUGENE “KA KEN” HILAUS AT SA LAHAT NG MARTIR NG KORDILYERA!

Ang Kabataan para sa Tribung Pilipino (Katribu Youth) ay naninindigan laban sa imperyalistang pandarambong sa lupang ninuno, at isinusulong ang pagtataguyod ng karapatan ng pambansang minorya sa sariling pagpapasya upang igiit ang kanilang mga karapatan. Marubdob ang aming pagsuporta sa laban ng mga Kaigorotan sa Abra para sa depensa ng kanilang lupang ninuno, sa pagtaboy sa mga mapaminsalang mga proyekto tulad ng malalaking minahan at pagsalag sa matinding atake sa kanilang karapatan tulad ng militarisasyon, pambobomba, at red-tagging.

Ang tuta ng rehimeng US na si Marcos Jr. ang numero unong instrumento sa likod ng pangangamkam ng mga mapanirang lokal at dayuhang korporasyon sa Abra. Kabilang rito ang nakaambang pagpasok ng Yamang Mineral Corp. sa Licuan-Baay, Lacub, at Malicbong na sumasakop sa 16,000-ektaryang lupang ninuno. Nariyan din ang 2,000-ektaryang military complex sa Villaviciosa at Luba na magiging himpilan ng AFP at tropang Amerikano sa mga komunidad.

Iisa ang ibig sabihin nito: mas nararamdaman ng mamamayan ng Abra ang panunupil ng estado sa kanilang mga batayang karapatan. Gamit ang Armed Forces of the Philippines (AFP), mas paparamihin pa ng rehimeng US-Marcos Jr. ang mga katutubong pinalalayas sa kanilang lupang ninuno at mga lider-katutubo na pinapatay upang sugpuin ang pakikibaka ng mga mamamayan sa Abra.

Noong 2022, pinaputukan ng baril ng AFP ang apat na sibilyang magsasaka sa Lacub na nag-iwan ng dalawang sugatan. Sa sumunod na taon, sa parehong lugar, pinaslang ng 77th IBPA si Antonio Diwayan, isang magsasaka at senior citizen. Ngayong taon, apat na magkakasunod na military operations ang kanilang ginawa na bumulabog sa pang-araw-araw na buhay at hanapbuhay ng mga komunidad. Hawig ito sa naging hakbangin ni Marcos Sr. nang supilin niya ang mga Kaigorotang lumalaban kontra sa Cellophil Resources Corp. sa pamamagitan ng pagpapatayo ng military detachments malapit sa komunidad. Mula noon hanggang ngayon, walang hustisyang nakakamit ang mamamayan ng Abra mula sa kamay ng mga militar at commander-in-chief nito.

Kaya bagaman ibinabalandra ng 5th ID ng AFP na sila ay “...open to peace” at nananawagan ng “Localized Peace Dialogue”, naninindigan tayo na hindi ang lokalisadong peace talks ang solusyon sa pambansang suliranin ng pandarambong ng lupa at militarisasyon. Ang problema ng mga katutubo at magsasaka sa Abra ay hindi hiwalay sa kronikong krisis na bumabalot sa ating bansa. Ito ay krisis na nakaugat sa pang-aagaw ng lupa ng mga malalaking dayuhan at lokal na korporasyon at ilang panginoong maylupa para sa imperyalistang interes. Ang tunay na peace talks ay nakatuon sa pagresolba ng problema sa monopolyo ng lupa at kawalan ng pambansang industriya; hindi sa pagsugpo sa mga rebolusyonaryong ipinaglalaban ang interes ng mamamayan.

Mula rito, mariing kinukundena ng Katribu Youth ang kawalang respeto ng AFP sa mga labi ng mga namartir sa Abra at pagbabaluktot nito sa International Humanitarian Law (IHL), kabilang na ang aming dating miyembro na si Eugene Hilaus. Sa halip na igalang ang labi ni Eugene at bigyan ng karampatang akses ang pamilya, serye ng intimidasyon, pagkait ng akses at pagpapabagal ng proseso ang hatid ng AFP. Ayon sa live video noong ika-5 ng Agosto, inulat ng Ilocos Human Rights Alliance (IHRA) na hinahayaang mabulok ng AFP ang labi ng mga martir ng 24 oras sa trak habang nakasilid lamang ang mga ito sa plastik at nakatali sa kahoy. Nangangamoy na ang kanilang mga bangkay ngunit patuloy pa rin ang AFP sa pag-ipit ng mga ito para ibigay sa mga kapamilya, kaibigan, at kasama ng mga namartir.

Ipinapaabot namin ang taus-pusong pakikiramay sa mga naiwang kapamilya, kaanak, kaibigan, kasama at komunidad ni Eugene. Kilala siya sa aming organisasyon bilang isang masigasig, masayahin, at matalinong kasama. Tumibay ang kanyang pagtindig para sa aming adbokasiya dahil siya mismo ay saksi ng karahasan ng estado sa ating mga pambansang minorya nang maging bahagi siya ng Lakbayan ng Pambansang Minorya.

Hindi nagpakasapat si Eugene sa pakikipaglaban sa lansangan. Sumama si Eugene sa laban ng mga katutubo hanggang sa pagtahak sa landas ng armadong pakikibaka bilang ekspresyon ng sariling pagpapasya ng mamamayan at ng pambansang minorya. Mananatiling inspirasyon si Eugene “Ka Ken” Hilaus sa mga kabataang nakikiisa sa laban ng pambansang minorya. Pagpupugay kay Eugene Hilaus at sa lahat ng rebolusyonaryong martir ng Kordilyera!

31/07/2026

Ang totoong SONA ay wala sa talumpati—ito'y nasa lansangan!✊

Nagmartsa ang kabataan, mga pambansang minorya, at malawak na hanay ng mamamayan upang ipahayag ang tunay na kalagayan ng bansa sa ilalim ng rehimeng US-Marcos Jr. Habang ipinagmamalaki ng administrasyon ang diumano'y "kaunlaran," patuloy namang isinusuko ni Marcos Jr. ang ating lupain, likas na yaman, at pambansang soberanya sa dikta ng imperyalistang Estados Unidos.

Kabilang sa mga pangunahing isyung inilantad sa pagkilos ang Pax Silica Initiative at ang Luzon Economic Corridor, na nagbabantang magpalawak ng pangangamkam ng lupa, militarisasyon, at mapanirang mga proyekto sa mga lupang ninuno. Nakiisa rito ang mga delegado mula Timog Katagalugan at Gitnang Luzon, kung saan direktang maaapektuhan ang mga katutubo at magsasaka sa pagkawala ng lupa, pagkasira ng kalikasan, at paglala ng krisis sa kabuhayan.

Sa halip na pakinggan ang lehitimong panawagan ng mamamayan, muling hinarap ng estado ang protesta sa pamamagitan ng panunupil. Hinarang ang mga magsasaka mulang Tarlac patungong mobilisasyon, habang 51 demonstrador ang inaresto sa Commonwealth Avenue sa gitna ng marahas na dispersal at gawa-gawang mga paratang. Bagama't nakalaya na ang mga nahuli, tuloy-tuloy pa rin ang paniningil ng mamamayan sa rehimeng US-Marcos Jr. na ginagawang krimen ang malayang pagpapahayag ng tunay na hinaing ng mamamayan.

Ang tunay na State of the Nation ay nasa pakikibaka ng mamamayan para sa lupa, kabuhayan, at karapatan!

Reject Pax Silica!
Lipang Ninuno, Depensahan, Ipaglaban!
Singilin ang rehimeng US-Marcos Jr.!

26/07/2026

⚠️ (4:00 PM, 27Jul26) Red Rainfall Warning sa buong Pilipinas. Nagbabanta ang matinding pag-ulan ng kasinungalingan, pagbaha ng mga korap sa Kongreso, at pagguho ng katotohanan at pananagutan!

Sa darating na State of the Nation Address ng rehimeng US-Marcos Jr., muli na namang babahain ni Bongbong Marcos Jr. ng kasinungalingan ang bansa upang pagtakpan ang lumalalang kahirapan, korapsyon, at paglabag sa karapatang pantao. Habang ipinagmamalaki ang umano'y "kaunlaran," lalo naman niyang isinusuko ang ating bansa sa dikta ng imperyalistang Estados Unidos.

Dapat panagutin si Marcos Jr. sa kanyang pagpapakatuta sa US—sa pagbubukas ng mga lupang ninuno ng mga katutubo at Moro sa pandarambong, militarisasyon, at mga proyektong nagsisilbi sa dayuhang interes. Habang pinagkakaitan ang mamamayan ng batayang serbisyo at tunay na pag-unlad, inuuna ng kanyang rehimen ang mga polisiyang nagpapalalim sa dayuhang kontrol at nagpapahirap sa sambayanan.

Mga kababayan at kapwa kabataan, bahain natin ang lansangan ng totoong lagay ng ating bayan! Ipaglaban natin ang ating buhay, kabuhayan, soberanya, at karapatan! Sumama sa SONA ng Pambansang Minorya! Sumama sa SONA ng BAYAN at SAMBAYANAN!

⭐ 11:00 AM | State of the National Minority Address @ Shell near Neng's Junkshop, Zuzuareggui St., Commonwealth Ave., Quezon City
⭐ 12:00 NN | SONA ng Bayan @ Wilcon, Commonwealth Ave., QC
⭐️ 02:45 PM | March at Salubungan with other organizations @ Don Antonio Footbridge
⭐️ 03:00 PM | Broad Program @ New Capitol Estates I Subd.