13/08/2026
HANGGA’T MAY PANDARAMBONG SA LUPA AT MILITARISASYON SA ABRA, MAGLULUWAL ITO NG PAGLABAN PARA SA TUNAY NA KAPAYAPAAN! PAGPUPUGAY KAY EUGENE “KA KEN” HILAUS AT SA LAHAT NG MARTIR NG KORDILYERA!
Ang Kabataan para sa Tribung Pilipino (Katribu Youth) ay naninindigan laban sa imperyalistang pandarambong sa lupang ninuno, at isinusulong ang pagtataguyod ng karapatan ng pambansang minorya sa sariling pagpapasya upang igiit ang kanilang mga karapatan. Marubdob ang aming pagsuporta sa laban ng mga Kaigorotan sa Abra para sa depensa ng kanilang lupang ninuno, sa pagtaboy sa mga mapaminsalang mga proyekto tulad ng malalaking minahan at pagsalag sa matinding atake sa kanilang karapatan tulad ng militarisasyon, pambobomba, at red-tagging.
Ang tuta ng rehimeng US na si Marcos Jr. ang numero unong instrumento sa likod ng pangangamkam ng mga mapanirang lokal at dayuhang korporasyon sa Abra. Kabilang rito ang nakaambang pagpasok ng Yamang Mineral Corp. sa Licuan-Baay, Lacub, at Malicbong na sumasakop sa 16,000-ektaryang lupang ninuno. Nariyan din ang 2,000-ektaryang military complex sa Villaviciosa at Luba na magiging himpilan ng AFP at tropang Amerikano sa mga komunidad.
Iisa ang ibig sabihin nito: mas nararamdaman ng mamamayan ng Abra ang panunupil ng estado sa kanilang mga batayang karapatan. Gamit ang Armed Forces of the Philippines (AFP), mas paparamihin pa ng rehimeng US-Marcos Jr. ang mga katutubong pinalalayas sa kanilang lupang ninuno at mga lider-katutubo na pinapatay upang sugpuin ang pakikibaka ng mga mamamayan sa Abra.
Noong 2022, pinaputukan ng baril ng AFP ang apat na sibilyang magsasaka sa Lacub na nag-iwan ng dalawang sugatan. Sa sumunod na taon, sa parehong lugar, pinaslang ng 77th IBPA si Antonio Diwayan, isang magsasaka at senior citizen. Ngayong taon, apat na magkakasunod na military operations ang kanilang ginawa na bumulabog sa pang-araw-araw na buhay at hanapbuhay ng mga komunidad. Hawig ito sa naging hakbangin ni Marcos Sr. nang supilin niya ang mga Kaigorotang lumalaban kontra sa Cellophil Resources Corp. sa pamamagitan ng pagpapatayo ng military detachments malapit sa komunidad. Mula noon hanggang ngayon, walang hustisyang nakakamit ang mamamayan ng Abra mula sa kamay ng mga militar at commander-in-chief nito.
Kaya bagaman ibinabalandra ng 5th ID ng AFP na sila ay “...open to peace” at nananawagan ng “Localized Peace Dialogue”, naninindigan tayo na hindi ang lokalisadong peace talks ang solusyon sa pambansang suliranin ng pandarambong ng lupa at militarisasyon. Ang problema ng mga katutubo at magsasaka sa Abra ay hindi hiwalay sa kronikong krisis na bumabalot sa ating bansa. Ito ay krisis na nakaugat sa pang-aagaw ng lupa ng mga malalaking dayuhan at lokal na korporasyon at ilang panginoong maylupa para sa imperyalistang interes. Ang tunay na peace talks ay nakatuon sa pagresolba ng problema sa monopolyo ng lupa at kawalan ng pambansang industriya; hindi sa pagsugpo sa mga rebolusyonaryong ipinaglalaban ang interes ng mamamayan.
Mula rito, mariing kinukundena ng Katribu Youth ang kawalang respeto ng AFP sa mga labi ng mga namartir sa Abra at pagbabaluktot nito sa International Humanitarian Law (IHL), kabilang na ang aming dating miyembro na si Eugene Hilaus. Sa halip na igalang ang labi ni Eugene at bigyan ng karampatang akses ang pamilya, serye ng intimidasyon, pagkait ng akses at pagpapabagal ng proseso ang hatid ng AFP. Ayon sa live video noong ika-5 ng Agosto, inulat ng Ilocos Human Rights Alliance (IHRA) na hinahayaang mabulok ng AFP ang labi ng mga martir ng 24 oras sa trak habang nakasilid lamang ang mga ito sa plastik at nakatali sa kahoy. Nangangamoy na ang kanilang mga bangkay ngunit patuloy pa rin ang AFP sa pag-ipit ng mga ito para ibigay sa mga kapamilya, kaibigan, at kasama ng mga namartir.
Ipinapaabot namin ang taus-pusong pakikiramay sa mga naiwang kapamilya, kaanak, kaibigan, kasama at komunidad ni Eugene. Kilala siya sa aming organisasyon bilang isang masigasig, masayahin, at matalinong kasama. Tumibay ang kanyang pagtindig para sa aming adbokasiya dahil siya mismo ay saksi ng karahasan ng estado sa ating mga pambansang minorya nang maging bahagi siya ng Lakbayan ng Pambansang Minorya.
Hindi nagpakasapat si Eugene sa pakikipaglaban sa lansangan. Sumama si Eugene sa laban ng mga katutubo hanggang sa pagtahak sa landas ng armadong pakikibaka bilang ekspresyon ng sariling pagpapasya ng mamamayan at ng pambansang minorya. Mananatiling inspirasyon si Eugene “Ka Ken” Hilaus sa mga kabataang nakikiisa sa laban ng pambansang minorya. Pagpupugay kay Eugene Hilaus at sa lahat ng rebolusyonaryong martir ng Kordilyera!
