18/04/2026
https://www.facebook.com/share/1DzuFR4pXG/
DCPO TEU, MAS STRIKTONG IPATUMAN ANG MUFFLER ORDINANCE SA SYUDAD.
Nanganti si PLTCOL Christian Antonio Garcia, hepe sa Davao City Police Office - Traffic Enforcement Unit kon DCPO-TEU, nga mas istriktuhon ang pagpatuman sa ordinansa batok sa saba nga muffler sugod karong bulan sa Hunyo.
Tumong niini nga mabalanse ang kagustuhan sa mga motorista ug ang kaayuhan sa publiko, lakip na ang pagkontrola sa kasaba sa kadalanan.
Subling giklaro sa opisyal nga gitugotan ang paggamit sa modified o aftermarket mufflers—apan kinahanglan kini mosunod sa standard sa Land Transportation Office o LTO, labi na sa gitakdang maximum noise limit nga 99 decibels.
Samtang gitugotan ang ubang modification, klaro nga gidili gihapon ang mga illegal mufflers sama sa “kalkal,” “bora-bora,” open pipe, ug drag pipe, ingon man ang ubang klase nga dili compliant sa balaud.
Sa gisugyot nga silot, ang mga madakpang motorsiklo adunay multa nga P2,500 sa unang paglapas, uban ang pagkumpiska sa muffler ug pag-impound sa sakyanan hangtud matuman ang saktong regulasyon.
Samtang ang ubang motor vehicles mahimong multahan og mas dako nga kantidad nga P5,000 sa unang offense.
Apil usab sa silot ang mga establisyemento o shops nga wala’y permit, posibleng multahan og P5,000 ug mahimo pang bawi-on ang ilang business permit o atubangon ang legal nga aksyon.
Sakop sa maong ordinansa dili lang motorsiklo ug scooter, kundili apil ang tricycle, passenger cars, jeepney, taxi, UV Express, bus, ug bisan light ug heavy trucks nga nagdagan sulod sa siyudad.
Sumala sa mga opisyal, giplastar ug mas giplantsa ang maong ordinansa human sa public consultations diin daghang riders ug residente ang nagpahayag og suporta alang sa mas klaro ug patas nga regulasyon.
Kahindumduman, naaprubahan ang maong ordinansa sa nakalabay’ng Bulan sa Marso diin ginapaabot na lamang ang pirma sa mayor.
Samtang naga-purchase na karon ang mga law enforcement agencies ug decibel meters aron masiguro ang husto ug patas nga pagpatuman sa ordinansa.
Via || iDol Choy Bungot
