12/05/2026
“Salot, sumpa, palpak, malandi. Mga salitang minsang ipinukol sa akin ng mga taong inaasahan kong magiging sandigan ko, tulad ng mabibigat na alon na paulit-ulit na humahampas sa aking pagkatao. Sinabihan akong salot nang malaman sa simbahan na bakla ako, lalo na bilang anak ng dalawang pastor. Tinawag akong sumpa nang malaman ng aking mga magulang na ako ay PLHIV. Para bang ang pagkatao ko ay naging sukatan ng hiya at kasalanan, at tila unti-unting nilulunod ng paghusga.
Bawat desisyon sa buhay ay tinuring na “palpak” ng lipunan. Dahil sa pagiging bakla, sa pagka-delay ko sa kolehiyo, at sa pag-alis ko sa simbahan, para sa ilan ay wala na akong mararating. At kahit sa sarili kong komunidad, hindi rin ligtas. Tinawag akong malandi dahil sa dami ng naka-date at naka-sex ko, at iyon din ang ginawang paliwanag ng ilan kung bakit ako nagka-HIV. Sa bawat bansag, tila mas lalo akong hinihila pababa ng malalalim na agos ng stigma at diskriminasyon.
Ngunit sa paglipas ng panahon, natutunan kong hindi ako ang mga salitang ibinato sa akin. Hindi ako salot, dahil ang pagkatao ko ay hindi banta sa sinuman. Hindi ako sumpa, dahil ang pagkakaroon ng HIV ay hindi sukatan ng halaga ko bilang tao. Hindi ako palpak, dahil ang buhay ay hindi karera na kailangang sumabay sa takbo ng iba. At hindi ako malandi dahil lamang sa pagpili kong magmahal, maghanap ng koneksyon, at tuklasin ang sarili kong pagnanasa at pagkatao.
Sa kabila ng lahat, patuloy kong pinipiling mabuhay nang totoo. Tulad ng alon na patuloy na bumabalik sa pampang, pinipili kong bumangon mula sa mga salitang minsang nagtangkang lunurin ako. Hindi ako kwento ng kahihiyan. Ako ay patunay na kahit ilang beses tangayin ng unos, posible pa ring maghilom, magpatuloy, at mahalin ang sarili.”
—Shom Mabaquiao
Proud PLHIV, Q***r Psychology Scholar, Bakla
Kung saan umaagos ang kalayaan, doon tayo magkikita.
Pride Night 2026 | May 30 | Circuit Makati 🌊🏳️🌈
📸 ,
🖼️
🎨
👩 .artistry
