28/05/2026
Ang Yawi sa Tinuod nga Kaalam
Makahimo ba ka og balay nga walay plano o blueprint? O mag-assemble og eroplano nga walay instruksyon? O mag-opera sa kasingkasing nga walay kahibalo ug training?
Sigurado, ang imong tubag kay “dili.”
Kung gusto nato masabtan kung giunsa paglihok ang usa ka butang, kinahanglan moduol ta sa eksperto aron makakuha og hustong pagsabot. Sa samang paagi, kung gusto nato masabtan kung giunsa paglihok ang kalibutan ug kinabuhi, kinahanglan kita motan-aw ngadto sa Dios.
“Ang pagtahod ug pagbaton ug kahadlok sa Ginoo maoy sinugdanan sa kaalam. Ang pagbaton ug kahibalo sa Balaang Dios mao ang pagbaton ug maayong panabot.”
Mga Panultihon 9:10
Ang Dios mao ang nagbuhat sa kalibutan ug sa tanang anaa niini. Siya nasayod unsaon pagpuyo sa kinabuhi sa pinakamaayo nga paagi.
Apan kasagaran, sa atong kaugalingon o sa ubang tawo ta mangita og tubag kung kinsa kita, unsay angay nato hunahunaon, ug unsaon pagsabot sa kinabuhi. Apan ang maayong balita mao kini:
Ang kaalam dili magsugod kanato nga mga binuhat.
Ang kaalam nagsugod sa Dios nga mao ang Magbubuhat.
Interesado ba ka sa tinuod nga kaalam? Tinuod nga pagsabot? Matinud-anong kahibalo? Tan-awa ang Dios, tun-i ang Iyang mga pamaagi, ug ila-ilaha pag-ayo ang Iyang kinaiya. Susihon Siya pag-ayo ug imong makita ang imong gipangita.
Ang tinuod nga kaalam nagsugod sa pundasyon nga nakasentro sa Dios. Ang tanan gitukod ibabaw nianang bato.
Apan samtang ginabuhat nato kana, kinahanglan usab nga mangutana ta sa atong kaugalingon og matinud-anong mga pangutana: Gusto ba gyud nako magtuon gikan sa Dios, o mas gusto nako buhaton ang akong kaugalingong gusto? Gusto ba nako ang maka-Dios nga kaalam, o gusto ba nako nga ako mismo ang mahimong dios sa akong kinabuhi?
Si Satanas nahulog gikan sa langit tungod kay gusto niya og gahum nga labaw pa sa Dios. Si Adan ug Eva nasulay sa tanaman tungod kay nagduha-duha sila kung kasaligan ba gyud ang Dios. Ug sukad niadto, ang matag tawo giatubang sa usa ka pagpili: pangitaon ba ang Dios, o magkinabuhi nga wala Siya. Walay laing makahimo sa maong desisyon alang kanimo, apan—
Kung gusto ka mahimong tinuod nga maalamon, kinahanglan pilion nimo ang Dios.
Busa karon mismo, pagmatinud-anon sa imong kaugalingon: Andam ba ka isurender ang imong kaugalingong panghunahuna ug tinuoray nga motan-aw ngadto sa Dios, o mas gusto nimo sundon lang ang imong kaugalingong gusto? Kung mabati nimo nga adunay garbo nga nagpatindog og pader sulod sa imong kasingkasing, hangyoa ang Dios nga tabangan ka Niya sa pagguba niini. Bato matag bato, mahimo Niyang tukuron pag-usab ang imong pundasyon.
Pag-ampo:
Dios, sa matag higayon nga mamalandong ko kung kinsa Ka ug sa tanang Imong gibuhat, mabug-atan ako sa kahibulong ug pagdayeg. Napuno ako sa katingala sa Imong gahum ug kaluoy. Palawma ang akong kahibalo sa Imong gugma ug pagkamatinud-anon. Pun-a ako sa kaalam nga gikan lamang sa tinuod nga pag-ila Kanimo. Ikaw unta ang mahimong pundasyon sa akong kinabuhi—aron ang akong kinabuhi mahimong hulagway sa Imong kasingkasing. Sa ngalan ni Jesus, Amen.
💬Shared from the Bible app translated to Cebuano
