06/03/2026
Paglilinaw sa Publiko Ukol sa Kasalukuyang Kalagayan ng Tau Gamma Phi
Ang Tau Gamma Phi Fraternity, o Triskelions’ Grand Fraternity, ay itinatag noong ika-4 ng Oktubre 1968 sa University of the Philippines Diliman ng anim (6) na kinikilalang Ama ng Kapatiran. Sa pinagmulan nito, ang organisasyon ay isinilang bilang isang Protest Fraternity—isang kapatirang may malinaw na paninindigan laban sa karahasan, rambulan, at anumang anyo ng pang-aabuso.
Ang pundasyon ng kapatiran ay nakabatay sa Tenets and Code of Conduct (TCoC) at pinatatatag ng mga haligi ng Malakas, Malaya, at Pagkakapatiran, na nagsisilbing gabay sa paghubog ng responsableng liderato, disiplina, at pagkakaisa sa hanay ng mga kasapi.
Sa kasalukuyan, mahalagang malinaw na maipabatid sa publiko at sa mga institusyon ng pamahalaan at sa mga myembro ng kapatiran na may umiiral na dalawang panig na nagpapahayag ng magkaibang pananaw hinggil sa direksyon at pamamahala ng kapatiran.
Sa isang panig ay ang Tau Gamma Phi National Executive Council, na patuloy na nagsusulong ng panawagang “Save the Tradition.” Gayunpaman, nararapat ding bigyang-linaw na ang naturang grupo ay hindi kinikilala bilang opisyal na kinatawan ng kapatiran ng Mother Chapter U.P Diliman at ng mga kinikilalang ama ng Kapatiran. (Founding Fathers)
Sa kabilang panig naman ay ang Tau Gamma Phi Global, na kinikilala at sinusuportahan ng Mother Chapter at ng mga founding fathers ng kapatiran. Ang panig na ito ay nagsusulong ng malinaw na direksyon tungo sa reporma at ganap na pagsunod sa umiiral na batas ng bansa, partikular ang Republic Act No. 11053 (Anti-Hazing Act of 2018).
Bilang kongkretong hakbang, kanilang ipinatutupad ang No Contact Policy (NCP) upang matiyak na ang anumang proseso ng recruitment o initiation sa loob ng kapatiran ay naaayon sa batas, ligtas, at may buong paggalang sa karapatang pantao.
***
Sa kontekstong ito, mahalagang maunawaan na ang post na ito ay hindi simpleng pagtatalo tungkol sa tradisyon. Ito ay isang mahalagang usapin ng legal na pananagutan, institusyonal na kredibilidad, at moral na direksyon ng kapatiran sa makabagong panahon.
