WATAY Dila Fisherfolks, Farmers, and Livestock Raisers Association

24/06/2025

Worth your ❤️ reactions.

22/06/2025

Mayad nga adlaw sa tanan kapin pa sa mga myembro kang atun nga hugpong.

Para sa maabot nga General Assembly Meeting, nagsinapol ang inyo mga opisyal para maliquidate ang kwarta kang atun asosasyon kag klaro nga mapresentar sa atun nga tanan kadya nga adlaw.

Sa July 06, 2025, Domingo nga adlaw, alas-2 kang hapon, makitaay kita sa Sibay Elementary School. Kabay nga magtambong ang kada myembro kapin pa nga may pagahiwaton nga Election.

Salamat gid ma'am Anna Lissa CasuncadJacinto Jaramillo sa pagpiktyur. 🙏

31/05/2025

Happy National Fisherfolks Day! 🎉

The association will adopt this as a temporary logo until we meet this last quarter general assembly.

31/05/2025

Nagce-celebrate ng aking ika-3 na taon sa Facebook. Salamat sa inyong patuloy na suporta. Hindi ko ito mararating kung wala kayo. 🙏🤗🎉

10/05/2025

Hmmnnn....

Nakahiwat kita kang pagsinapol katong nagligad nga una nga Domingo kang Abril 2025 para sa Pangkabilugan nga Pagsinapol kang atun asosasyon.

Sa atun nga pagpakig-isturya, ginplastar kag gin sipad-sipad namun nga mga opisyal kang asosasyon ang estado pinansyal kang hugpong para sa klaro nga pag-intindi kag kun sa diin naga agto ang kwarta kag kun ano ang mga gin gastuhan.

Naisturyahan man ang iba pa nga aspeto pareho kang maabot nga eleksyon kang asosasyon sa Hulyo 2025 kag ang hugot nga panindugan kang asosasyon bilang sangka non-political group sa maabot nga May 12, 2025 Mid-term Election. Nabasi dya sa Constitution and By-laws kang hugpong kang gin tukod kag dapat gid nga tugruan kang respeto kag importansya.

Kita man ang nagbatun kang mga kritiko, pamangkot, kag pagklaro halin sa mga myembro bilang anda nga matarung. Nagakahulugan lamang dya nga sanda man ang may bahul nga pagsuporta kag pasilabut sa atun hugpong.

Sa kabilugan, mahambal ko nga manami ang dalagan kang asosasyon.

31/03/2025

Kahapon nga adlaw, Marso 30, 2025, nagkitaay ang inyo mga opisyal para mag-isturyahanay natuhoy sa estado pinansyal kag iba pa.

Gani sa maabot nga Abril 6, 2024, magahiwat kita kang pagsinapul kang tanan nga myembro kang atun asosasyon para sa una nga kwarter kang tuig.

Gina imbitar ang tanan nga myembro nga makig-imaw kag makisawsaw sa atun nga pag-isturyahanay ay may "right" gid kamo bilang myembro.

Note:

Palihog lang urualigmat kun madayon ukon indi ang pagsinapul. Mahimo maatras dependi sa sitwasyon.

20/03/2025

Mayad nga adlaw mga kamangingisda kag mga kamangunguma!

Ginapabugal ko gid ang mga tanum kang atun mga kaimaw sa atun hugpong nga sanday ante Aurura Javier kag ante Nilda Salibio sa anda mga tanum nga mga laswa.

Nakabakal ako kang Rabanus kay ante Aurura kag nakabaligya naman kang Petsay si ante Nilda kag kun inyo makita, nagapamunga dun ang ana nga
Ampalaya.

Oh, di bala?

Kun tugruan natun kang Gamay lang nga tyempo ang dya nga urubrahon, mahimo gid nga makabulig sa atun. May dapli ka na, may mabaligya ikaw pa.

26/02/2025

Mayad nga adlaw sa tanan kapin pa sa myembro kang dyang hugpong!

Kang nagligad lang nakabahin kita kang buruhaton kang atun nga mga kaubay nga gina inganyo nga magtanum kang biskan tatlo ka klase kang laswa sa palibot kang balay sa kun anu man nga pamaagi. Pero, duro sa gihapon ang mahimo nga rason kun basi indi makatanum ang iba.

1) Duro Ubra

Kun ubra lang, halos tanan kita duro man kang ubra. Ang atun tyempo ginatakaw-takaw lang natun. Tugruan ta biskan gamay lang nga tyempo man ang dya nga hirikuton natun. Indi man ang asosasyon ang mapulos kadya, kundi ikaw kag ang imo pamilya man sa gihapon.

2) Wara May Magtanum

Araw araw man tana imo ngaran!

Kun sa imo pamilya may tatlo ka myembro, makatanum kamo gid! Wara man nagakinahanglan nga tanan kamo magtanum. Tsansa mo run dya nga matudluan ang imo bata/kabataan kang ka importante kang pagpanguma kag kang laswa sa kabuhi ta. Dara dun man dyan ang ginatawag nga pagtipid ukon pagkinuriput kun kaisa man.

3) Wara Taranuman

May mga paagi kang pagpanguma nga wara nagakinahanglan kang lapad nga lupa ukon ispasyo para makatanum kang laswa. Sa mga laragway nga inyo makita, isara ka paagi dya para makatanum ikaw kang laswa. Sarang man dya magamit kung duro ang atun kasapatan. Sa YouTube duro man mga halimbawa kun paano makatanum sa atun palibot.

4) Wara Burunyag

Kay limitado ang atun nga tubig, schedule lamang, ang atun mga "binalunas" ukon/kag "hinugasan ang pwedi gid magamit bilang inug bunyag sa atun mga tanum. Mas manami pagid ay may mga nutrisyon lagi nga halin sa atun mga pagkaunon kag kinaunan nga mahimo kinahanglan kang atun tanum.

Ugyunan natun dya abi mga kaubay ko sa dya nga asosasyon.

Duro gid nga salamat!

25/02/2025

Sa bulig kang atun mga kaubay nga naghimakas nga matugruan kita kang liso it Pechay kag Labanus, mahimo kita dun makatanum kang mga nasambit nga mga laswa.

Nakatugro man kita kang mga dya sa atun mga kaimaw nga asosasyon sa Kampoy kag sa Kur.

May mga pira kita man ka myembro ang nakapangayo dun it dyang mga seeds. Ginasarigan ko nga makatanum dun ang atun mga myembro kag makabulig man kang pahagan-hagan sa gasto sa mabudlay, malisud, kag mariit nga pangabuhi nga dya.

Sa atun mga kaimaw, ginahingyo natun nga magtanum kang biskan tatlo ka klase kang laswa maluwas lang gid sa balunggay kang kamote nga duro man sa palibot natun.

Sa mga katapusan kang bulan kang Marso, bag-o magsinapul ang inyo mga opisyal, basi palang makalibot ako biskan sa napulo ka balay lamang para makita kun may natanum gid man nga mga laswa.

Indi natun pag-irason ang atun kasakuon para indi kita makatanum. Ukon ang wara kang espasyo sa atun balay kag duro pa. Isipon ta, indi lang ikaw isara sa sulod kang balay. May asawa kag kabataan ikaw pa.

Pursigihan ta nga maubra natun ang atun parte bilang sangka myembro kang asosasyon.