21/02/2025
PNP NAGHAHANDA SA PAG-UWI NG MGA LABI NI PCOL PERGENTINO MALABED, JR.
Puspusan ang paghahanda ng Philippine National Police (PNP) sa pag-uwi ng mga labi ni Police Colonel Pergentino Malabed, Jr., ang hepe ng Supply Management Division ng Directorate for Logistics, na nasawi sa trahedya ng midair collision sa Washington, USA noong Enero 29, 2025.
Matatandaang si PCOL Malabed ay nasa opisyal na biyahe sa Amerika para sa pre-delivery inspection ng 2,675 all-purpose vests na bibilhin ng PNP. Matapos magtungo sa India para sa unang bahagi ng inspeksyon, lumipad siya patungong Amerika noong Enero 27 upang ipagpatuloy ang pagsusuri ng mga vest at mag-exit call kay PNP Police Attaché sa Washington D.C., PCOL Moises Villaceran. Ngunit sa kanyang paglipad mula Kansas patungong Washington, ang eroplanong sinasakyan niya—isang PSA Airline jet ng American Airlines na may 60 pasahero at 4 na crew members—ay nakabanggaan ng isang Sikorsky Black Hawk helicopter ng U.S. military habang papalapit sa Reagan Washington National Airport.
Ayon sa PNP, magsisimula ang official honors sa pagdating ng mga labi ni PCOL Malabed sa bansa ngayong Pebrero 20, 2025. Magkakaroon ng Foyer Honors sa Ninoy Aquino International Airport (NAIA) bago ito dalhin sa Camp Crame, Quezon City, kung saan isasagawa ang Arrival Honors kasabay ng isang relihiyosong seremonya at pagbibigay ng pagpupugay sa pamamagitan ng pagbabantay ng Vigil Guards.
Nakatakdang isagawa ang necrological services sa Multi-Purpose Center ng Camp Crame, kung saan bibigyan ng pagkilala ang dedikasyon ni PCOL Malabed sa serbisyo.
Sa Febrero 27, 2025, nakatakda ang kanyang huling hantungan sa Memorial Gardens sa Sta. Rosa City, Laguna, kung saan isasagawa ang funeral honors bilang pagbibigay ng pinakamataas na pagpupugay sa kanyang kabayanihan.
Nagpaabot ng pakikiramay si PNP Chief, PGEN Rommel Francisco D. Marbil, sa pamilya ni PCOL Malabed at kinilala ang kanyang di-matatawarang serbisyo sa PNP:
"Si PCOL Malabed ay isang huwarang opisyal na nag-alay ng kanyang buhay sa pagseserbisyo sa bayan. Ang kanyang sakripisyo ay hindi malilimutan at magsisilbing inspirasyon sa ating hanay upang ipagpatuloy ang kanyang nasimulang misyon sa pagpapalakas ng ating organisasyon."
Kasabay ng malungkot na pangyayaring ito, tiniyak ng PNP na ang pagbibigay ng kaukulang benepisyo sa pamilya ni PCOL Malabed ay alinsunod sa patakarang Bagong Pilipinas ni Pangulong Ferdinand "Bongbong" Marcos Jr. na nagsusulong ng mas maayos at mabilis na pagtugon sa pangangailangan ng mga lingkod-bayan.
Bilang miyembro ng Public Safety Mutual Benefit Fund Inc. (PSMBFI), makakatanggap ang pamilya ni PCOL Malabed ng accident death benefits na may kabuuang halagang PHP 2,698,140.84.
Sa kabila ng trahedyang ito, nananatiling matatag ang PNP sa pagpapakita ng pagkakaisa at suporta sa pamilya ng kanilang yumaong kasamahan. Ipinapakita ng mga seremonyang inihanda para kay PCOL Malabed ang pagpapahalaga sa kanyang dedikasyon sa serbisyo at ang pangako ng PNP na hindi malilimutan ang kanyang ambag sa organisasyon at sa bayan.
