28/09/2026
MACALINTAL, NAKAPAGHAIN NA NG PETISYON SA SUPREME COURT KONTRA BSKE POSTPONEMENT
MANILA — Naisampa na ni election lawyer Romulo Macalintal sa Supreme Court ang petisyon na kumukuwestiyon sa bagong batas na nagpapaliban sa Barangay at Sangguniang Kabataan Elections (BSKE) hanggang Nobyembre 2028.
Ayon mismo kay Macalintal sa ulat ng ABS-CBN News, electronically filed niya ngayong Linggo ng gabi ang petisyon laban sa Republic Act No. 12326, o ang batas na nagtatakda ng limang taong termino para sa mga barangay at SK officials.
“Naghain na ako ng kaukulang petisyon ngayong gabi sa ilalim ng electronic filing,” ani Macalintal, ayon sa ulat ng ABS-CBN.
Sinabi niyang ang inihain ay Petition for Certiorari and Prohibition, kasama ang prayer for a temporary restraining order (TRO) upang pansamantalang mapigil ang pagpapatupad ng RA 12326.
Ang batas ay nilagdaan ni Pangulong Ferdinand Marcos Jr. at naglipat sa nakatakdang Nobyembre 2, 2026 BSKE sa Nobyembre 2028. Kasabay nito, pinalawig din nito mula apat tungo sa limang taon ang termino ng mga incumbent barangay at SK officials.
Bago ang paghahain, sinabi ni Macalintal na balak niyang dalhin sa Supreme Court ang isyu at kinuwestiyon ang constitutionality ng bagong batas, partikular ang epekto nito sa karapatan ng mga botante na pumili ng kanilang mga lokal na lider.
Samantala, sinabi rin ng NAMFREL na pinag-aaralan nito ang sariling hakbang sa Supreme Court upang kuwestiyunin ang RA 12326. Inaasahan naman ng Comelec na magkakaroon ng mga petisyong hahamon sa postponement.
Sa bisa ng bagong batas, itinigil ng Comelec ang mga preparasyon para sa 2026 BSKE, kabilang ang nakatakdang filing ng Certificates of Candidacy na dapat sana'y magsisimula sa Setyembre 28.
Ngayon, nasa Supreme Court na ang usapin: mananatili ba ang bisa ng RA 12326 at ang 2028 reset ng BSKE, o magkakaroon ng judicial review sa mga batayan at proseso ng postponement?
The Profiler | Election Watch
