22/10/2025
Ang nangyari sa Rizal at Bulacan ay hindi simpleng operasyon ng seguridad, kundi isang malinaw na paglabag ng AFP-PNP sa International Humanitarian Law at sa mismong karapatan ng mga sibilyan.
Si Jordan Mopon na tumangan ng pinakamataas na antas ng pakikibaka โ rebolusyonaryong nakibaka para sa lupa ng mga magsasaka at karapatan ng mamamayan ay namartir nitong Oktubre 18. Sa halip na hayaan ang pamilyang magluksa nang payapa, ang masahol at salot na AFP-PNP ay muling ipinakita ang kawalang-respeto sa dignidad mula sa pagsisinungaling, pagbabanta, at panggigipit sa pamilya ni Jordan at sa humanitarian team na nag-iimbestiga noon sa lugar. Sa mga funeral homes, may mahigit 24 na armado mula sa AFP-PNP ang nakapuwesto, at pagdating sa burol sa Antipolo, umabot sa halos 50 ang mga tauhan ng militar na nagkalat sa paligid, nakabantay sa pasukan, at malinaw na nagsasagawa ng paniniktik. Ginagamit ng estdado ang kanilang presensya upang lumikha ng intimidasyon at takot higit sa pamilya at sa mga batang naninirahan sa komunidad.
Ang ganitong mga kilos ng militar ay malinaw na paglabag sa mga prinsipyong nakapaloob sa Article 13 ng Additional Protocol II ng Geneva Conventions, sa Customary IHL Rules 22 at 97, at sa Republic Act No. 9851 na nagbabawal sa anumang atake laban sa mga sibilyan, at sa karapatan nilang makamit ang dignidad, kahit sa kamatayan. Mula Oktubre 18 hanggang 20, ilang ulit ding hinarang sa mga checkpoint ng AFP-PNP ang pamilya at humanitarian team, dahilan upang maantala ang pagproseso ng labi at paghatid sa burol - isang malinaw na paraan ng intimidasyon at kontrol. Maging ang 1987 Konstitusyon, sa Artikulo II Seksyon 11, ay tahasang nagsasabing ang estado ay dapat magbigay ng ganap na paggalang sa karapatang pantao, isang prinsipyong malinaw na nilabag sa kaso ni Jordan. Ang makapal na presensiya ng militar sa panahon ng pagluluksa sa kaniya ay nagpapakita kung gaano kalalim ang kultura ng pananakot laban sa mga lumalaban para sa lupa at hustisya.
Ang sinapit ni Jordan Mopon ay hindi iba sa mga nakikibakang mamamayan na walang habas na minartir ng estado. Ang sinapit ni Jordan ay sumasalamin sa patuloy na pagsasamantala at pandarahas na dinaranas ng mga tagapagtanggol ng lupa, sahod, edukasyon at karapatan. Ang kanilang pakikibaka para hustisya, at karapatan ay hindi dapat tugunan ng bala, pananakot, o pambabastos sa kanilang dignidad. Sa halip, dapat itong kilalanin bilang pagpapatuloy ng laban para sa tunay na katarungang panlipunan, isang laban na ipinagpapatuloy ng mga militanteng magsasaka tulad ni Jordan.
Ngayong Buwan ng mga Pesante, bukod sa mga magsasaka at mangingisda ay pinagpupugayan ng Gabriela Southern Tagalog ang rebolusyonaryong nagbuwis ng kaniyang buhay para sa bayan. Panawagan rin sa bata, babae, sangkabaklaan at mamamayan ng Timog Katagalugan ay KUNDENAHIN ANG PAGLABAG NG AFP-PNP SA INTERNATIONAL HUMANITARIAN LAW! MILITAR SA KANAYUNAN PANAGUTIN, PALAYASIN! ABOLISH AFP-PNP!
