Aktibong pag-ingatan, pangalagaan, at itaguyod ang mga pamanang bayan (tangible heritage) at karunungang bayan (intangible heritage) ng bayan ng Bulakan, Bulacan;
2. Isulong ang edukasyon para maunawaan ang pamanang pangkultura sa pamamagitan ng pagtataguyod at pagtutustos ng mga seminar, pagpapaaral, pananaliksik, pagtatanghal at mga katulad na gawain para sa konserbasyon;
3. Pagyamanin at prot
eksiyonan ang kalagayan ng pamanang pangkultura sa pamamagitan ng kaugnay na pagsasanay, pagtatayo ng imprastruktura, at pagkakaloob ng teknikal at materyal na tulong;
4. Tulungang maisulong at mapanatiling buháy ang mga lokal na pamayanang tradisyonal sa pamamagitan ng mga programang nagsusulong ng mga karapatan at pribilehiyo ng mga mamamayan, ng kanilang mga pamanang pook at mga buháy na pamumuhay pangkultura;
5 . Makipagtulungan, o humingi ng tulong, sa mga institusyong publiko at pribado upang makamit ang mga layunin ng korporasyon;
6. Maisagawa ang alinman o lahat ng klase ng aktibidad na kakailanganin upang maayos na maisakatuparan ang mga nabanggit na layunin. Kaugnay ng nabanggit, hindi ito makapangingilak o makatatanggap ng mga investment/placement mula sa publiko, hindi rin makapag-iisyu ng mga kontrata sa investment o pamumuhunan
PROFILE:
KABESERA, Inc. Samahang Pangkalinangan ng Bulakan
Ang KABESERA, Inc. ay pagbúhay sa Samahang Pangkalinangan ng Bulakan na itinatag noong dekada 80, at pinangunahan ng mga historyan, lider sibiko, at g**o sa Bulakan, Bulacan. Kabilang dito sina Antonio Valeriano, Mariano Santos, Isaac Cruz, Jr. at Antonio Evangelista. Muling binuhay ang Samahan noong Pebrero 2018 sa pangunguna ni Alex Balagtas, noo'y kurator ng Museo ni Marcelo H. Pinagkalooban ito ng Securities and Exchange Commission ng sertipiko ng inkorporasyon bilang isang organisasyong non-profit noong 27 Hulyo 2022. Ginawang sagisag ng KABESERA, Inc. ang imahen ng lumang munisipyo ng Bulakan, Bulakan na giniba noong panahon ni Alkalde Artemio Meneses matapos maitayo ang bagong gusali ng pamahalaang-bayan noong dekada 60. Ang imahen, ipininta ni Edgar Santiago, ang isa sa nalalabing alaala ng gusali ng pamahalaang bayan bilang kapitolyong bayan ng lalawigan ng Bulacan. Mula 2018 hanggang sa panahon ng pandemya (2020-2022), ang KABESERA, Inc. ay nanguna sa taunang pagdiriwang ng Paglaya ng Bulacan (24 Hunyo) at Linggo ni Goyong (kapanganakan, 14 Nobyembre, at kamatayan, 2 Disyembre, ni Gregorio del Pilar). Si Gregorio ang itinuturing na tagapagpalaya at unang gobernador ng lalawigan. Sinimulan din ng samahan ang pagdiriwang ng kapanganakan ni propagandist at leksikograpong Pedro Serrano-Laktaw na isa ring anak ng Bulakan. Noong panahon ng pandemya, nagdaos ang samahan ng iba't ibang talakayan at pagtatanghal tungkol sa mga nabanggit na makasaysayang mga pangyayari kasama ng iba pang aktibidad na online sa pangangalaga ng pamanang bayan at pagtataguyod ng wika. Sa pagsisikap ng KABESERA, Inc. ay naitayo ang Bantayog-Wika sa Tagalog--isang programa ng Komisyon sa Wikang Filipino upang pahalagahan at buhayin ang mga katutubong wikang nanganganib maglaho. Sa muling pagbubukas ng bansa dahil sa paghupa ng pandemyang COVID, at sa pagsisimula ng pagtatayo ng isang bagong paliparang pandaigdig sa kanlurang bahagi ng munisipalidad, ipinasiya ng KABESERA, Inc. na ituon ang pansin nito sa pagtataguyod ng Bulakan bilang isang pamanang bayan. Magpapatupad ito ng apat na pangunahing proyekto para sa layuning nabanggit--mga proyektong magsasaliksik, maglalathala, magtuturo, magsasaayos, at magbibigay-buhay sa iba't ibang aspekto ng pamanang bayan. Mga Programa
Sa loob ng darating na tatlong taon (2022-2025), tututukan ng KABESERA, Inc. ang apat na pangunahing proyekto upang maging buháy na pamanang bayan ang Bulakan:
(1) Mapang Kalinangan ng Bulakan,
(2) Bulakan ni Marcelo,
(3) Programa Plaridelina, at
(4) Pamana ng Pananampalataya
Ang MAPANG KALINANGAN NG BULAKAN ay pagsasaliksik at pagsusuri ng bawat bahagi ng munisipalidad upang maimbentaryo ang mga pamanang bayan (tangible heritage) at karunungang bayan (intangile heritage). Ang imbentaryong ito ang magiging pundasyon ng landas patungo sa pagpapanumbalik ng pamanang naglaho dahil winasak ng panahon at winaldas ng tao. Ang BULAKAN NI MARCELO ay pagbabalik sa nakaraan ng Bulakan, pagdodokumento sa nakalipas nitong panahon, sa pamamagitan ng pagtungo sa mga dokumento at aklat; ng mga lumang larawan at imahen; at ng mga gunita sa tinig ng matatandang nakapag-ingat nito sa kanilang di-kumupas na alaala. Isa itong pagsasapanahon ng mga naunang saliksik at inakdang salaysay sa kasaysayan ng unang kabesera ng lalawigan. Sa PROGRAMA PLARIDELINA, babalikan ang mga akda ng pangunahing anak ng Bulakan na si Marcelo H. del Pilar, at mga supling ng akdang ito mula sa panulat ng iba pang nakaunawa sa kanya, upang maituro at maipalaganap sa mga paaralan at tahanan sa kanyang bayang sinilangan, pagkaraa'y sa buong lalawigan, at sa hinaharap ay sa buong bansa. Pag-iibayuhin at palalalimin nito ang mga aral at pagkaunawa na sinususo ng mga dumadalaw sa museong nagtatanghal ng kanyang buhay at mga kaisipan. Sa PAMANA NG PANANAMPALATAYA, isasakatuparan ang maingat na pangangalaga sa Simbahang Nuestra Señora de la Asuncion na idineklara ng Museong Pambansa na isang Mahalagang Ari-ariang Pangkalinangan (Important Cultural Property o ICP). Sasaliksikin at idodokumento ang may 444-taong kasaysayan ng simbahan, kumbento, at kamposanto; isasaayos ang mga napapabayaang bahagi ng mga antigong estruktura sa bakurang ito; at idi-digitize ang di-mapapantayang halaga ng mga dokumentong napag-ingatan at napananatiling ligtas sa paglamon ng panahon at kapabayaan. Sa sangandaan ng kasaysayan at kaunlarang nagkakahugis ngayon sa matandang kabeserang bayan ng lalawigan ng Bulacan, isang masigasig at malawak na kampanyang Balik-Bulakan ang ilulunsad upang manawagan sa mga Bulakeño sa iba't ibang panig ng bansa at parte ng mundo na tumulong at mag-ambag ng kanilang talino, kakayahan, at panahon sa kanilang tinubuang bayan. Mahigpit na makikipag-ugnayan ang KABESERA, Inc. sa lokal na pamahalaang pambayan at panlalawigan; sa pambansang pamahalaan sa pamamagitan ng mga ahensiya nito sa kultura, sining, kasaysayan at pamana; at sa San Miguel Aerocity, Inc. (SMAI) upang ang mga nabanggit na programa ay matagumpay na maisagawa. Ang kasalukuyang kasapian ng KABESERA, Inc. ay binubuo ng mga alagad ng sining, kasaysayan, at pamana, kasama ng mga g**o at iba pang propesyonal--aktibo at retirado, may-edad at kabataan--na binibigkis ng diwa ng pagmamalasakit at pagmamahal sa bayang tinubuan. Lahat sila ay naniniwala sa tagubilin ni Marcelo H. del Pilar na "Mahalin ninyo siya [Bulakan]... tumulong sa kanyang kaginhawahan, at huwag pag-ukulan ng ngiti ng pagwawalang-bahala."
2022-2023
LUPON NG MGA KATIWALA
Fortunato de la Pena
Mariefe B. Cruz
Denia M. Clacio
Ana Marie G. Felizardo
Perfecto T. Martin
Luis E. Reyes
Resurreccion G. Villanueva
PAMUNUAN
Perfecto T. Martin
Pangulo
Ana Marie G. Felizardo
Pangalawang Pangulo - Panloob
Jose Antonio M. Rodrigo
Pangalawang Pangulo - Panlabas
Gemma M. Santos
Kalihim
Resurreccion G. Villanueva
Ingatyaman
[Inihanda noong 15 Agosto 2022, Kapistahan ng Nuestra Señora de la Asuncion, patron ng bayan ng Bulakan, at Araw ng Pagkakatatag ng lalawigan ng Bulacan]
