18/09/2026
Daghang mga tawo ang andam mohatag sa bisan unsa para lang makadungog sa Maayong Balita bisan kausa lang—o bisan usa pa ka higayon.
Apan kita, daghan na kaayog higayon nga nakadungog niini. Nakapaminaw na ta og mga wali, nakabasa sa Pulong sa Dios, nakapaminaw og mga awit sa pagsimba, nakaapil og Bible study, ug daghang higayon nga gidapit ta sa Dios nga moduol Kaniya.
Apan usahay, sayon ra kaayo nato nga ipalangan ang atong pagtubag.
Moingon ta, “Unya na lang, Ginoo.”
“Unya na lang ko mobiya ani nga sala.”
“Unya na lang ko motuman.”
“Unya na lang ko mangita Kanimo sa tibuok nakong kasingkasing.”
“Unya na lang ko seryosohon ang mga butang nga may kalabotan sa walay katapusang kinabuhi.”
Pero unsa man kung dili na moabot ang ‘unya’?
Makapahunahuna kaayo kung moabot ang panahon nga moatubang ta kang Cristo. Dili tungod kay wala ta kadungog sa kamatuoran, kondili tungod kay kadungog na ta niini pagbalik-balik, apan wala gihapon ta motubag.
Dili tungod kay kulang ta og kahibalo. Ang problema kay sige nato og ingon, “Naa pa man ugma.”
Dili tungod kay wala magsulti ang Dios. Daghan kaayo Siyag paagi nga nagsulti ug nagpahinumdom kanato. Apan sige nato og palangan ang pagtuman.
Ang matag wali nga atong madungog usa ka grasya. Ang matag higayon nga atong mabati nga gitudloan o gipahinumdoman ta sa Espiritu Santo usa ka gasa. Ug ang matag higayon nga hatagan ta sa Dios og higayon nga maghinulsol usa ka pagpamatuod sa Iyang pailob kanato.
Ang makapasubo dili kay wala ta kahibalo.
Ang mas makapasubo mao nga maanad ta sa balaang mga butang hangtod nga dili na kini makahikap sa atong kasingkasing.
Makadungog ta sa Maayong Balita, pero murag wala na lang.
Makadungog ta og pahimangno, pero magpadayon gihapon ta sa atong naandan.
Madungog nato ang pagtawag ni Jesus, pero maghunahuna ta nga naa pa man tay panahon.
Apan ang tinuod, ang matag adlaw nga gihatag sa Dios usa ka grasya. Ang matag higayon nga makamata ta usa ka panalangin. Ug ang matag adlaw usa pa ka higayon nga moduol kita Kaniya.
Moabot ang adlaw nga mahuman ang atong higayon sa pagpaminaw ug pagtubag. Moabot ang panahon sa paghukom.
Niadtong adlawa, walay magmahay tungod kay nangita sila kang Jesus, mituman dayon, o mitugyan sa ilang kinabuhi ngadto Kaniya.
Ang pagmahay mahimong gikan sa mga higayon nga gisayang, mga pahimangno nga gibalewala, ug sa kanunay nga pagpasagad sa pagtawag sa Ginoo.
Busa, kung ang Ginoo nagsulti sa imong kasingkasing karon, ayaw pagpagahi sa imong kasingkasing.
Kung gitawag ka Niya sa paghinulsol, tubaga Siya.
Kung ginadani ka Niya nga moduol, duol Kaniya.
Kung adunay sala nga kinahanglan nimong biyaan, biya-i kini karon.
Ayaw na pag-ingon og, “Unya na lang.”
Kay ang higayon nga naa ka karon usa na ka gasa gikan sa Dios.
Hinaot nga dili ta maanad sa Maayong Balita nga mura na lang kini og ordinaryong butang kanato.
Hinaot nga dili nato himoong rason ang pailob sa Dios aron sige ta og langan.
Ug labaw sa tanan, hinaot nga dili nato usikan ang mga higayon nga Iyang gihatag aron makaila, mahigugma, ug makaduol Kaniya.
Ginoo, tabangi kami nga dili maglangan. Hatagi kami og kasingkasing nga andam maminaw, andam maghinulsol, ug andam motuman. Ayaw tugoti nga maanad kami sa Imong Pulong nga dili na kini makahikap sa among kasingkasing.
Kung Ikaw nagtawag, tudlui kami nga motubag.
Kung Ikaw nagbadlong, tudlui kami nga maminaw.
Kung Ikaw nagdapit, tudlui kami nga moduol.
Ginoo, luwasa kami gikan sa binuang nga sige og ingon, “Unya na lang.” ❤️🔥🙏😭
