11/06/2026
Sa bawat pagtatapos ay may mga alaalang nagiging bahagi ng kung sino tayo. Mga tawanan sa pagitan ng mga gawain, mga pagsubok na sabay-sabay nating hinarap, at mga sandaling nagbigay-kulay sa ating paglalakbay bilang isang pamilya sa Departamento ng mga Wika. Ito ang mga kuwentong muling binalikan at pinahalagahan sa isang araw na inilaan upang parangalan ang mga alaala at taong naging mahalagang bahagi ng ating samahan.
Sa temang “Timeless: Honoring Memories Beyond Time,” nagtipon-tipon ang mga mag-aaral, g**o, at panauhin noong ika-1 ng Hunyo 2026 sa Balon Bayambang Event Center upang ipagdiwang ang isang mahalagang yugto ng paglalakbay ng mga magtatapos. Bilang bahagi ng programa, nagsagawa ang Kapisanang Sulo ng Diwa (KSD) at English Communicators Circle (ECC) ng isang testimonial program para sa mga mag-aaral ng ikaapat na taon bilang pagpupugay sa kanilang mga naging ambag, karanasan, at alaalang iniwan sa Departamento ng mga Wika.
Sa ngalan ng Kapisanang Sulo ng Diwa, taos-puso naming binabati ang mga mag-aaral ng ikaapat na taon. Maraming salamat sa mga alaalang inyong iniwan, sa mga aral na inyong ibinahagi, at sa mga kuwentong naging bahagi ng kasaysayan ng ating organisasyon at departamento. Kayo ay naging inspirasyon, kaibigan, at katuwang sa paglikha ng mga alaalang mananatili sa aming puso.
Habang kayo’y patuloy na nangangarap at lumilipad tungo sa bagong yugto ng inyong buhay, dalangin naming matagpuan ninyo ang tagumpay na sa inyo’y naghihintay. Ang oras ay lilipas at ang mga landas ay maaaring mag-iba, ngunit ang mga alaalang nabuo natin ay mananatiling buhay, mga alaalang hindi kayang burahin ng panahon at patuloy na magpapaalala ng mga panahong minsan tayong nagkasama.
Binabati namin kayo, mga kawika! Nawa’y bitbit ninyo ang mga alaalang ito saan man kayo dalhin ng inyong mga pangarap, at nawa’y manatili silang walang kupas tulad ng bakas na iniwan ninyo sa aming mga puso.
