06/07/2026
📢🏳️⚧️
MAKE BATANGAS STATE UNIVERSITY - THE NATIONAL ENGINEERING UNIVERSITY INCLUSIVE. REVISE THE DRESSCODE POLICY NOW!
Mariing kinukundena ng Bahaghari Batangas ang mga lipas at luma nang patakaran ng Batangas State University ukol sa Proper Uniform at Dress Code na pumapatay sa kalayaan at karapatan ng mga estudyante—lalo na sa mga miyembro ng LGBTQIA+ community—na maipahayag ang kanilang tunay na katauhan at identidad.
Nakikiisa kami kay Ms. Jira at sa lahat ng LGBTQIA+ students na nakakaranas ng diskriminasyon sa loob ng paaralan, isang lugar na dapat nagbibigay ng seguridad at pagkakataon matuto nang malaya at walang opresyon.
Pinagmamalaki ng Batangas State University ang pagiging "inclusive" nito, kasama dito ang pagsulong sa UN's Sustainable Development Goal (SDG) 5 o ang Gender Equality. Netong 2025, niranggong 68th ang Batangas State University para sa Gender Equality sa bilang ng iba't ibang mga Higher Education Institution.
Ngunit hanggang ngayon, bulag-bulagang tinatanggalan ng dignidad, karapatan at kalayaan ng administrasyon ng Batangas State University ang kanilang mga estudyante. Kinukuhanan ng ID at pinapapunta sa Guidance office dahil sa tinatawag nilang pagtutol sa Student Manual. Mas malala pa, hinaharang ang mga estudyante sa gate at hindi pinapayagang makapasok sa loob ng eskwelahan, dahil lamang sa pagdadamit at pagsuot nila ng uniporme na gender-affirming o nagpapakilala sa kanilang tunay na kasarian.
Matagal nang panawagan ng mga estudyante ng Batangas State University ang pag rebisa sa sinaunang polisiya nito na hanggang ngayon ay nagiging dahilan ng hindi pantay na pagtrato at diskriminasyon sa mga estudyante na parte ng LGBTQIA+ community.
Makailan lamang netong Hunyo, nakiisa ang Batangas State University sa selebrasyon ng Pride Month at ipinagmamalaki pa ng GAD Office neto ang pagtaguyod sa pagkakapantay-pantay. Ngunit ang tunay na adbokasiya ng karapatan at pagkakapantay-pantay ay hindi isang bagay na maaari nating piliin lamang kung kalian ito maginhawa o uso.
Bilang isang SUC at simbolo ng pag-unlad ng probinsya ng Batangas, ang Batangas State University ay isang institusyon na nagrerepresenta sa kalidad at kakayanan ng mga Batangueño. Subalit, ito pa ang nangunguna sa paglabag ng Batangas City Gender-Fair Ordinance, na pinatupad ng Sangguniang Panlungsod ng Batangas (City Ordinance No. 12 s. 2016), pati na rin ang Ordinance Prohibiting Discrimination on Sexual Orientation, Gender Identity and Gender Expression for LGBT, na siya namang pinatupad ng Sangguniang Panlalawigan ng Batangas (Provincial Ordinance No. 005) . Sa ilalim ng parehas na ordinansa, ang diskriminasyon ay nangangahulugang pag-bukod, pag-tanggi, pag-limita o pag-pili batay sa SOGIE na nakakasira sa kanilang karapatang pantao at kalayaang mag-aral.
Hindi dapat maranasan ng estudyante ang opresyon sa isang ligtas na espasyo tulad ng paaralan na dapat ay maturing nila bilang pangalawang tahanan. Hindi inklusibo ang pagpilit at pagpapatupad sa bulok na sistema.
REVISE THE DRESS CODE AND STUDENT MANUAL!
Ang pagpili sa pagitan ng kalayaan at edukasyon ang pamatay sa tunay na pag-unlad.
