12/06/2025
NO TO BSK TERM EXTENSION!
Mariing tinututulan ng Kaya Natin! Youth ang panukalang batas na nagpapalawig ng termino ng mga Barangay at SK officials.
Sa kasalukuyan, pasado na sa Bicameral Conference Committee ang panukalang BSK Term Extension mula sa Senate Bill No. 2816 at sa House Bill No. 11287. Kapag pinirmahan ito ng Pangulo, magiging ganap na batas ito.
Ngunit malinaw ang katotohanan: ang term extension ay election postponement sa ibang pangalan—at ito ay labag sa Konstitusyon.
Ayon kay election lawyer Atty. Romulo Macalintal, ito ay “unconstitutional, deceptive, and misleading.” Sa panukalang batas, i-popostpone sa November 2026 ang susunod na BSK Election.
🗳️ KARAPATAN *NATIN* BUMOTO.
Ang panukalang ito ay tahasang lumalabag sa karapatan ng mamamayan na bumoto o ang right to suffrage.
Ang ating right to suffrage ay hindi lamang mahalaga—ito ay sagrado. Ayon nga sa Korte Suprema:
“The right of suffrage is a threshold for the preservation and enjoyment of all other rights that it ought to be considered as one of the most sacred parts of the Constitution.”
Noong 2023, sa kasong Macalintal vs. COMELEC, idineklara ng Korte Suprema na unconstitutional ang postponement ng 2022 BSK elections dahil “it unconstitutionally and arbitrarily overreaches the exercise of the rights of suffrage, liberty, and expression.” Hindi sapat ang naging dahilan ng Kongreso para sa postponement.
Sa parehong desisyon, nagtakda rin ang Korte Suprema ng mga pamantayan at dahilan kung kailan lamang maaaring ipagpaliban ang halalan, tulad ng:
- intended to guarantee the conduct of free, honest, orderly, and safe elections
- intended to safeguard the electorate’s right of suffrage
based on compelling reasons such as public emergencies
- reasonably appropriate for the purpose of advancing a sufficiently
- important, substantial, or compelling governmental reason
Ang kasulukyang dahilan ng Kongreso na i-extend lang ang termino ng BSK officials ay hindi pumapasa sa mga pamantayang ito.
📣 MANDATO *NATING* TAUMBAYAN
Kung maisasabatas ang panukalang ito, para na ring in-appoint ng Kongreso ang mga BSK officials. Isang anyo ito ng legislative appointment.
Ang mandato ng kasalukuyang mga opisyal ay hanggang Disyembre 2025 lamang, sapagkat ito ang nasa isip ng taumbayan noong inihalal nila ang mga ito.
Kapag ito’y pinahaba, hindi na ito galing sa mandato ng taumbayan kundi sa kapritso na ng mga nasa kapangyarihan.
Totoo, binibigyan ng Konstitusyon ang Kongreso ng kapangyarihang tukuyin ang haba ng termino ng mga BSK officials.
Ngunit dapat itong gawin alinsunod sa Konstitusyon.
Ayon kay Justice Caguioa sa kanyang separate opinion sa parehong kaso:
“Congress… cannot enact laws that extend the term of incumbent barangay and SK officials, for they are unconstitutional for violating both (1) the democratic underpinnings of our governmental system, wherein elective officials serve by virtue of winning an election, and (2) the separation of powers because ‘the power to appoint is essentially executive in nature.’”
🙅♂️TALO ANG KABATAAN *NATIN*
Mas malalim ang epekto ng term extension sa kabataan. Dahil ang SK elections ay para lamang sa mga may edad 15 hanggang 30, kung ie-extend ang termino, libo-libong kabataang Pilipino ang mawawalan ng pagkakataong bumoto at kumandidato bilang SK.
Ito ay malinaw na disenfranchisement sa kabataan—at labag sa kanilang right to suffrage.
🗓️ PALUSOT ANG POSTPONEMENT
Ilang dekada na rin itong nagaganap. Makikita natin ang pattern: tuwing nalalapit ang halalan, saka lamang pinapasa ang batas sa postponement.
Malinaw na ginagamit ito ng ilang pulitiko para sa pansariling interes—dahil mahalaga ang mga Barangay at SK officials sa kanilang makinarya tuwing eleksyon. hindi para sa tunay na reporma.
Ito ay para sa kapakinabangan ng iilan—hindi para sa tunay na reporma.
❌ TERM EXTENSION, HINDI SOLUSYON
Kung nais nating paigtingin ang pamamahala ng ating mga BSK officials, dapat sapat na suporta, training, at resources ang ibigay—hindi dagdag-taon sa puwesto.
DAHIL DITO, KAMI AY NANANAWAGAN:
Kay Pangulong Ferdinand Marcos Jr.: I-veto ang panukalang batas sa BSK Term Extension
Klaro ang Konstitusyon: “Sovereignty resides in the people and all government authority emanates from them.”
Ipaglaban natin ang karapatan ng bawat Pilipino na bumoto.
Kaya Natin Youth
