11/03/2026
BREAKING: Nakatanggap kanina ng isang red-tagging bomb threat ang mga organisasyon at indibidwal sa University of the Philippines Baguio. Sa harap ng tahasang pananakot na ito, mariing naninindigan ang BAHAGHARI UP Baguio: walang puwang sa pamantasan ang red-tagging, pasismo, at anumang anyo ng panunupil sa mamamayang lumalaban.
Ang UP Baguio ay hindi dapat maging lunan ng takot, pananahimik, at pagsupil. Ito ay pamantasang nararapat magsilbi sa sambayanan—isang espasyong pinayayabong ng malaya at kritikal na pag-iisip, demokratikong pakikilahok, at sama-samang pagsusulong ng katotohanan at hustisya. Kaya naman mariin naming kinokondena ang anumang banta na naglalayong sindakin ang mga estudyante, g**o, kawani, at mga organisasyong walang pagod na tumitindig para sa karapatan ng mamamayan.
Hindi simpleng paninira ang red-tagging. Isa itong marahas na kasangkapan ng estado upang busalan ang dissent, durugin ang progresibong organisasyon, at ilagay sa bingit ng panganib ang buhay ng mga inaapi at lumalaban. Kaakibat nito ang kultura ng takot na sadyang nililikha upang hadlangan ang sama-samang pagkilos, patahimikin ang mga kritiko, at gawing lehitimo ang pang-aatake sa mga nagsusulong ng katarungang panlipunan.
Bilang isang pambansa-demokratikong organisasyong nagsusulong ng karapatan at pagpapalaya ng LGBTQIA+ community, kinikilala ng BAHAGHARI UP Baguio na ang ganitong mga banta ay hindi hiwalay sa mas malawak na sistema ng pang-aapi at karahasan. Sa ilalim ng bulok na sistemang ito, ang mga bakla, lesbiyana, bisexual, transgender, q***r, intersex, at iba pang kasarian ay patuloy na itinutulak sa gilid—dinadahas, binubura, at pinagkakaitan ng dignidad. Kaya para sa amin, ang laban kontra red-tagging ay bahagi ng mas malawak na laban kontra pasismo, patriyarka, at lahat ng porma ng pang-aapi.
Sa harap ng bantang ito, mas lalo lamang tumitibay ang aming paninindigan. Patuloy naming ipagtatanggol ang akademikong kalayaan, demokratikong karapatan, at ang pamantasan bilang lunan ng kritikal, makabayan, at mapagpalayang pakikibaka. Sa bawat tangkang patahimikin kami, mas lalo naming itataas ang bandila ng paglaban, sapagkat walang bomb threat, walang red-tagging, at walang pasistang pananakot ang makapipigil sa sambayanang mulat, organisado, at handang lumaban.
