05/08/2026
๐๐ง๐๐๐๐ ๐๐ก๐ ๐ ๐๐๐๐ง๐๐ฅ๐๐ฆ๐๐ฆ๐ฌ๐ข๐ก ๐ฆ๐ ๐๐๐ฅ๐! ๐๐ฃ๐๐๐๐๐๐๐ก ๐๐ก๐ ๐๐จ๐๐๐ฌ, ๐๐จ๐ฃ๐, ๐๐ง ๐๐๐ฅ๐๐ฃ๐๐ง๐๐ก ๐ก๐ ๐ ๐๐ ๐๐ ๐๐ฌ๐๐ก!
Mariing kinokondena ng Agham Youth UP Baguio ang patuloy na karahasan at militarisasyon ng Armed Forces of the Philippines sa Abra. Mula Hulyo 19 hanggang sa panibagong engkwentro noong Agosto 4 sa Tineg at Licuan-Baay, nagdulot ang sunod-sunod na operasyong militar ng AFP ng pagdanak ng dugo, paglikas ng mga komunidad, at patuloy na panganib sa buhay ng mga sibilyan.
Ang laban ng mamamayan ng Abra ay laban para sa kanilang lupang ninuno, kabuhayan, at karapatan bilang tao. Ngunit ang isinagot ng estado ay dahas, dugo, at bala. Pinatutunayan ng sunod-sunod na paglabag sa karapatang pantao na hindi aksidente ang militarisasyong ito. Ginagamit ang dahas ng estado upang supilin ang paglaban ng mamamayan at ipataw ang huwad na "kaunlaran" at "kapayapaan" na nagsisilbi lamang sa interes ng malalaking korporasyong dumarambong sa lupang ninuno, likas na yaman, at kalikasan ng Abra.
Isa rito ang planong pagtatayo ng humigit-kumulang 2,000 ektaryang military complex na magsisilbing panibagong kampo ng militar, kapalit ng mga lupang sakahan at komunidad na pinagkukunan ng kabuhayan ng mga residente at katutubo.
Kasabay nito ang mariing pagtutol ng mamamayan sa mga mapaminsalang proyektong pagmimina, kabilang ang operasyon ng Yamang Mineral Corporation na may exploration permit na sumasaklaw sa mahigit 16,187 ektarya sa mga bayan ng Sallapadan, Licuan-Baay, Lacub, at Malibcong. Tinutulan din ng mga residente ang exploitation permit ng Golden Lake Mineral Resources Inc. dahil sa paglabag nito sa proseso ng Free, Prior, and Informed Consent (FPIC).
Sa halip na tugunan ang makatarungang panawagan ng mamamayan laban sa malawakang agresyon sa lupa, pasismo at bala ang isinagot ng estado. Bunga nito, nananatiling isa ang Abra sa mga pinakamilitarisadong lalawigan sa Cordillera, kung saan ang sunod-sunod na engkwentro ay patuloy na naglalagay sa panganib sa buhay at kaligtasan ng mga sibilyan.
Nakikiisa ang Agham Youth UP Baguio sa mamamayan ng Abra sa panawagang itigil ang militarisasyon at pasistang panunupil sa kanayunan. Mariin naming iginigiit ang agarang pagtigil sa mga operasyong militar, pananagutin ang mga responsable sa mga paglabag sa karapatang pantao, igalang ang International Humanitarian Law, at igiit ang karapatan ng mamamayan sa kanilang lupang ninuno, kabuhayan, at kaligtasan.
Hangga't may pandarambong sa lupa at pasistang panunupil, magpapatuloy ang makatarungang paglaban ng komunidad ng Abra para sa tunay na reporma sa lupa!
