19/05/2026
New deadline for Likhaan Journal
DEADLINE EXTENDED!
New Deadline: May 30, 2026
Panawagan para sa mga Naging Fellow ng UP National Writers Workshop
Magsumite sa Likhaan Journal: Espesyal na Isyu para sa Ika-65 siklo ng UPNWW
Kinilala at kinikilala ang UP National Writers Workshop sa pagtukoy, pagtipon, at paglinang ng mga pausbong na tinig sa panitikan at malikhaing pagsulat simula pa noong 1965. Nagsikap at patuloy na nagsisikap ang palihang ito, sa pag-oorganisa ng Likhaan: UP Institute of Creative Writing, na paglimian, baklasin, at hulmahin ang dinamikong hubog ng pambansang panitikan. Itinatampok ng UPNWW ang pagsisikap na ito mula sa mga pagbabago ng workshop venue mula sa Diliman patungo sa iba pang UP campus, sa paanyaya para sa mga fellow at panelist na nagsusulat sa iba’t ibang wika sa Pilipinas, sa pagkakaroon ng mga libreng panayam at iba pang extension component, hanggang sa pag-aalok ng mga oportunidad para sa paglilimbag (sa anyo ng Likhaan Journal, at ng book length projects na Philippine Writers Series at Philippine Translator Series).
Isinasagawa ang palihang ito sa gitna ng palagiang hamon at limitasyon sa pagpopondo—ang dalawa kada isang taon na palihan ay naging isa kada isang taon na lamang, nabawasan ang haba ng palihan at dami ng kalahok, madalas na nalimitahan sa Luzon ang posibleng pagdausan ng palihan, at iba pang mga kaugnay na kuwento. Gayon din, laging may pagtatasa sa kaangkupan ng palihang ito sa mga mahalagang yugto ng kasaysayan ng bansa. Makabuluhang danas ang mga pagbabagong isinagawa ng UP ICW at ng UPNWW sa panahon ng COVID-19 pandemic, halmbawa, kung saan bukod sa iniayon ang palihan sa limitasyon at potensyal ng online na moda ng palihan ay nakapagluwal din nitong serye ng espesyal na isyu ng Likhaan Journal, na patungkol at nag-iimbestiga sa danas ng pandemya (na pinamagatang Dx Machina: Literature in the Time of COVID-19).
Naging modelo at inspirasyon ang UPNWW para sa pagsasagawa ng palihan ng iba pang mga kaibigang institusyon sa palihan at malikhaing pagsulat. Sa pagyabong nitong entry-level writing workshops, nagpanibagong-hubog din ang UPNWW at itinuon ang disenyo nito sa mga manunulat na pasok sa kategorya ng “advanced” o “mid-career.” At habang patuloy ding tinitimbang at pinipino ang mga uri ng manunulat at piyesang pumapasok sa kategoryang ito—kasama sa pagmumuni sa kaangkupan ng mismong mga tatak na binanggit—naging bahagi na ng bagong format na ito ang pagbabahagi ng “poetics paper” mula sa mga kalahok na workshop fellow. Tinatangkang katawanin sa bahaginang ito ang pagtugon sa mga tanong na “what do you write, how, and why?”
Kaya, kasabay ng ika-65 siklo ng UPNWW, inaanyayahan ang mga naging workshop fellow na magsumite sa espesyal na isyu nitong Likhaan Journal. Ang saklaw ng isyung ito ay mga repleksyon, pagtatala, paghamon at pagmumungkahi, sa lugar at ambag ng malikhaing pagsulat sa harap ng maraming dambuhalang pagbabago sa mga pananaw sa sining, at sa mismong kalagayan ng daigdig.
Para sa pagsusumite ng mga piyesa at karagdagang impormasyon, pumunta lamang sa https://forms.gle/KjGJeBWLBjFGDaN99.
Ang patnugot sa espesyal na isyung ito ay si Vladimeir B. Gonzales
***
Bukas ang isyung ito sa mga piyesa mula sa UPNWW alumni, na umiinog sa mga tauhan, institusyon, at usaping umuugnay sa paglulugar ng panitikan at sining—kasama ng mga ahensyang may direktang kaugnayan sa pagluwal ng mga malikhaing akda—sa mga malakihang kumplikasyon ng daigdig. Maaaring makapagsumite ng mga piyesang nakikipag-usap, nagtatalakay, o/at nagtatanghal sa sumusunod:
1. Pagpapatron sa pagsusulat
2. Pagsusulat sa panahon ng malakihang krisis sa daigdig—pandemya, henosidyo sa Gaza, pakikidigma ng US-Israel sa Iran, atbp.
3. Danas sa mga palihan, kumpetisyon, kumperensiya, o pagtitipong may kaugnayan sa malikhaing pagsulat.
4. Pagsusulat sa panahon ng red-tagging, political prisoners, enforced disappearances at summary executions.
5. Ang papel ng manunulat sa pagbuo ng daigdig.
6. Mga pagbabago sa moda ng komunikasyon at paglikha, at ang pag-angkop ng malikhaing pagsulat dito.
7. Pagtatawid sa iba’t ibang genre; mga bagong-usbong na genre.
Anuman ang maging baryasyon, hinihirayang mapag-uusapan sa mga piyesa ang tanong na: sa gitna ng maraming hamon, ligalig at balakid, bakit, tungkol saan, at paano tayo dapat magsulat?
Narito naman ang iba pang mga teknikal na detalye sa pagsusumite:
1. Maaaring magpasa ng sumusunod na akda sa Ingles at Filipino:
-Maikling kuwentong may 12 hanggang 20 pahina (4,000 - 7,500 salita) double-spaced, Times New Roman, font size 12. Maaaring magpasa ng kinolektang mas maiiksing piyesa.
-Dulang may Isang Yugto, na may katulad na dami ng pahina at salita sa maikling kuwento.
-Mga sanaysay at baryasyon nito , na may katulad na dami ng pahina at salita sa maikling kuwento.
-Koleksyon ng apat hanggang pitong tula, na kukuhaan ng issue editor ng mula tatlo hanggang limang piyesa sa pinal na bersyon ng journal. Maaaring magpasa rin ng isang mahabang tula.
-Sipi mula sa komiks o graphic novel, na maaaring ilimbag sa 10 pahina, 6” x 9,” black and white. Mangyaring maglahok ng buod nitong isusumiteng mga sipi.
-Hybrid forms, o baryasyon ng mga naisulat sa itaas, na limitado sa paglilimbag sa 6’ x 9’ na papel.
2. Prayoridad ang hindi pa nalilimbag na piyesa, pero maaaring magpadala ng piyesang nailimbag na basta pasok sa temang ibinigay. Hihilingin ang paglakip ng liham na nakalagay kung orihinal at hindi pa nalilimbag ang isinumite, o nailimbag na pero may permisong muli itong mailimbag sa journal. Hihiniling din ang pagpapadala ng bionote na hindi lalampas sa dalawang maiksing talata.
3. May Google form na pagsusumitehan kada genre. Isang piyesa lamang kada genre ang tatanggapin.
4. Ipasa ang mga piyesa sa https://forms.gle/KjGJeBWLBjFGDaN99, at kailangang tugunan ang kaukulang bahagi at format ng file.
5. Titigil ang submission portal sa pagtanggap ng mga piyesa pagdating ng 15 Mayo 2026.
May kaukulang honorarium at mabibigyan din ng kopya ng journal ang mapipiling manunulat, bagaman nakatali ito sa mga kahingian ng isang opisinang panggobyerno. Dahil dito, sinumang magsusumite ay inaasahang mayroon na o kayang magbukas ng Landbank Account, may Philhealth account, at Philippine-based Taxpayer Identification Number (TIN). Ang pagsusumite sa isyung ito ay itatrato ng patnugutan bilang pagsang-ayon ng manunulat sa mga kahingiang ito.
Ipinapabatid ding maaaring irebisa ng patnugutan ang matatanggap na materyales upang umangkop sa pinal na disenyo ng journal. Maaari ring manghingi ang patnugutan ng mga non-refereed na piyesang makakatulong sa kabuuang hulma ng proyekto.
Para sa mga paglilinaw, maaaring magpadala ng liham sa [email protected]
