27/07/2026
🚨🚨🚨
BAGSAK! Ito ang malinaw na marka na ibinibigay ng All UP Academic Employees’ Union – Baguio Chapter sa ikalimang State of the Nation Address ni Ferdinand Marcos, Jr.
Isang taon matapos ang kanyang pahayag na “Mahiya naman kayo!” hinggil sa korapsyon sa mga flood control projects, nananatiling walang mataas na opisyal ang tunay na napapanagot. Sa halip, patuloy ang pagpapahirap sa mga g**o, kawani, at mamamayan sa gitna ng tumitinding krisis pang-ekonomiya, lumalalang utang, at pagtaas ng presyo ng mga batayang bilihin.
Lalong nilalantad ng bulok na sistema ang pagpapahintulot sa malawakang korapsyon, kapabayaan sa kalikasan, pagsuko sa dayuhang interes, at patuloy na pag-atake sa edukasyon at karapatan ng mamamayan.
HINDI ITO SIMPLENG PAGKUKULANG. ITO AY SISTEMATIKONG KABIGUAN. 📣
Sa usaping korapsyon at pananagutan, nananatiling multo ang hustisya para sa mga apektado ng maanomalyang flood control projects at confidential funds. Sa gitna ng pag-usad ng impeachment trial ni Sara Duterte, walang katiyakan kung tunay siyangna mapapanagot sa Senado at maparurusahan dahil saang bilyun-bilyong paglustay sa kaban ng bayan. Hanggang kailan mananatiling palabas ang mga imbestigasyon habang walang napaparusahan?
Sa kalikasan, direktang nararamdaman ang pagsira at pag-abuso ng ating likas na yaman. Tinutuloy ang pagmimina sa Mankayan, Benguet sa kabila ng pagbabarikada at pagtutol ng mga residente. Nilalason ang lupain ng mga Aeta sa pagtatambak ng tone-toneladang basura. Isinusugal ang ating lupain sa proyektong Pax Silica. Kaninong interes ang tunay na pinaglilingkuran?
Sa kabuhayan, kailan makakaahon sa utang sina Juan at Maria? Sa gitna ng tumataas na presyo ng langis, kuryente, pagkain, at iba pang batayang pangangailangan, nananatiling malayo tayo sa nakabubuhay na sahod. Nanawagan tayo ng konkretong hakbang para sa ₱1,200 family living wage, pagwawakas sa kontraktwalisasyon, at pagkakaroon ng seguridad sa trabaho.
Sa soberanya, mas inuuna ang dikta ng imperyalistang interes kaysa sa pagtatanggol sa ating teritoryo. Patuloy na isinusuko ng rehimeng Marcos ang ating soberanya sa imperyalistang US sa pamamagitan ng pagpapalawak ng mga kasunduang militar gaya ng Visiting Forces Agreement at Enhanced Defense Cooperation Act. Sa pagpapagamit ng ating teritoryo bilang lunsaran ng geopolitikal na interes ng US, inilalagay lamang ang bansa sa panganib na maging pangunahing target sa tunggalian ng US at China.
Sa edukasyon, kulang na kulang ang pondo at pasilidad, mababa ang pasahod sa ating mga g**o at kawani, at tuloy-tuloy ang pag-atake sa malayang edukasyon. Ang Reframed GE Curriculum Proposal ng CHED ay banta sa kalidad ng edukasyon, pambansang identidad, at trabaho. Ang pagbabawas sa mga batayang asignatura sa Humanidades, Kasaysayan, at Wika ay magdudulot ng malawakang dis-empleyo at retrenchment ng mga g**o, habang pinapalabnaw nito ang kritikal na pag-iisip at kamalayang panlipunan ng mga mag-aaral. Sa halip na maglingkod sa pangangailangan ng bayan, iniaayon ng CHED ang kurikulum sa komersyalisasyon at sa kagustuhan ng mga dayuhang korporasyon para sa murang lakas-paggawa.
Sa UP System, lalong nalalantad ang kawalan ng katarungan sa talamak na kontraktwalisasyon at kawalan ng benepisyo sa mga Job-Order (JO) at Contract-of-Service (COS) workers. Kulang ang plantilla items para sa g**o at kawani na nagdudulot ng walang katiyakansa seguridad ng kanilang hanapbuhay. Tuloy pa rin ang mga balakid sa malayang pag-uunyon gaya ng pagharang sa pag-avail ng Union Time Privilege (UTP) na pinagtibay sa Collective Negotiation Agreement sa pagitan ng UP at ng Unyon.
Sa halip na tugunan ang mga lehitimong hinaing ng mamamayan, mas pinaiigting pa ng rehimeng Marcos Jr. ang militarisasyon at panunupil. Patuloy ang red-tagging, harassment, surveillance, gawa-gawang kaso, at pag-atake sa mga organisasyon, unyon, at indibidwal na kritikal sa pamahalaan. Nakaamba rin ang mga panukalang batas at patakarang nagbabanta sa kalayaang akademiko at demokratikong karapatan ng mamamayan.
Dahil dito, naninindigan ang AUPAEU-Baguio Chapter na panagutin ang rehimeng Marcos Jr. sa patuloy na malalang korapsyon, kapabayaan, at pagpapahirap sa mamamayan.
1️⃣ Iginigiit namin ang sumusunod na mga kahilingan:
Panagutin ang lahat ng sangkot sa korapsyon kabilang ang mga nasa pinakamataas na posisyon ng pamahalaan;
2️⃣ Itigil ang mga proyektong mapanira sa kalikasan at ipagtanggol ang karapatan ng mga katutubong komunidad;
3️⃣ Isulong ang nakabubuhay na sahod: ₱1,200 family living wage at makabuluhang dagdag-sahod sa lahat ng sektor;
4️⃣ Wakasan ang kontraktwalisasyon at tiyakin ang regularisasyon ng mga manggagawa;
5️⃣ Kanselahin ang Pax Silica, igiit ang pambansang soberanya at itigil ang labis na pag-asa sa dayuhang kapangyarihan;
6️⃣ Dagdagan ang pondo sa edukasyon, lumikha ng sapat na plantilla items, at igalang ang akademikong kalayaan;
7️⃣ Ipatupad ang konkretong benepisyo para sa mga empleyado, kabilang ang ₱25,000 Economic Relief Grant, ₱40,000 Professional Development Grant, at patas na benepisyo para sa JO/COS workers.
Nananawagan ang Acad Union Baguio sa lahat ng g**o, kawani, estudyante, at mamamayan: magkaisa, makilahok, at palakasin ang sama-samang pagkilos laban sa korapsyon, kahirapan, at panunupil!
Hindi dapat maging normal ang bagsak na kalagayan ng bansa. Hindi dapat pumasa ang isang administrasyong pumapabor sa iilan at nagpapahirap sa nakararami.
MAKIBAKA, HUWAG MATAKOT!
