21/08/2026
Ang Ginapaabot sang mga Manunudlo: Solusyon sa Problema, Indi Pamasol kag Pang-akusa
Indi nagakadapat nga gamiton ang kapaltahan sang pipila ka manunudlo sa isa ka insidente bilang basihan sa paghusga sa kabilogan sang propesyon. Ang mga isyu may kaangtanan sa seguridad sang mga estudyante sa sulod sang buluthuan nagakinahanglan sang nagakaigo, patas, kag sistematiko nga pagtamod—indi sang pamasol kag pang-akusa.
Apisar nga wala gintumod ni USEC. Claire Castro ang kabilogan sang mga manunudlo, importante gihapon nga mangin mahalungon sa mga tinaga nga ginapahayag ang isa ka opisyal sang gobyerno. Ang mga pahayag nga mahimo ma-interpretar sa social media bilang pagpas-an sang responsibilidad sa mga manunudlo mahimo makaapekto sa kredibilidad, dignidad, kag pagsalig sang komunidad sa mga manunudlo.
Ang seguridad sang estudyante indi lamang responsibilidad sang isa ka manunudlo. Isa ini ka kolektibo nga responsibilidad sang eskwelahan, sang komunidad, kag labi na sang mga ahensya sang gobyerno nga may mandato sa pagpatuman kag pagsiguro sang mga polisiya para sa child protection kag school safety.
Ang katalagman nga gina-atubang sang estudyante isa man ka katalagman nga gina-atubang sang mga manunudlo. Kada adlaw, ang mga manunudlo nagabantay, nagatudlo, nagapangapin, kag nagahatag sang ila pinakamaayo agud maproteksyunan ang mga kabataan sa sulod kag bisan sa gwa sang eskwelahan
Bilang Presidential Spokesperson, daku ang responsibilidad sa pagpili sang mga tinaga. Ang mga pahayag sang gobyerno dapat mangin bahin sang solusyon—nagahatag sang direksyon, suporta, kag klaro nga aksyon—indi sang dugang nga problema, pagbasol, ukon pang-akusa.
Ang ginapaabot sang mga manunudlo indi pagpamasol sa sayop. Ang ila ginapangayo amo ang patas nga pagpangusisa, suporta, accountability, kag konkreto nga solusyon agud mangin mas luwas ang tagsa ka buluthuan.
Kay kon luwas ang estudyante, luwas man ang manunudlo. Kag kon luwas ang eskwelahan, mas maayo ang palibot para sa pagkat-on kag pag-amuma sang kabataan.
Solusyon ang kinahanglan. Indi pamasol. Indi pangakusa.
