18/11/2024
Ang Liham ni San Clemente sa mga taga-Corinto”
Si San Irenaeus ay nagsabing nakita ni San Clemente ang mga pinagpalang Apostol at nakipag-usap sa kanila. Ang pangangaral ng mga Apostol at kanilang tradisyon ay naranasan niya at patuloy na isinabuhay. Ayon pa sa teologong si Tertullian, si San Pedro ang naggawad ng ordinasyon kay Papa Clemente.
Bilang ika-4 na Papa ng mga unang Kristiyano sa Roma, humugot siya sa karunungan ng mga Apostol upang gabayan ang mga Kristiyano sa Corinto. Isang di pagkakaunawaan sa pagitan ng mga nakatatanda at nakababatang namumuno sa Simbahan ang nanganib sumira sa kanilang kapatiran sa Corinto. Sabi ni Papa San Clemente sa kanyang liham (13), “Kaya nga, mga kapatid, tayo ay magpakumbaba, talikuran ang lahat ng kapalaluan at pagmamataas… at ang bugso ng damdamin, lalo na ng galit; at kumilos tayo ayon sa nasusulat… Maging mapagnilay sa mga salita ng Panginoong Hesus sampu ng kanyang halimbawa ng kaamuan at matiyagang pagtitiis… Sapagkat hindi tayo magkakaroon ng kaunting pinsala, bagkus ay malaking panganib, kung padalus-dalos nating ibibigay ang ating sarili sa mga hilig ng mga tao na naglalayon sa kapana-panabik na alitan at kaguluhan, upang ilayo tayo sa mabuti. Maging mabait tayo sa isa't isa ayon sa huwaran ng magiliw na awa at kagandahang-loob ng ating Lumikha.”
Ang kanyang liham ay puno ng pagpapaalala ng pagpapakumbaba, paghimok na magkaisa ang buong Simbahan sa paglilingkod sa Diyos at sa kapwa, pagmamahalan, at paghahanda sa muling pagdating ni Hesukristo.
Papa San Clemente, gabayan ninyo po ang aming bayan, ilayo kami sa panganib ng pagmamataas at alitan, at ilapit kami sa kay Hesus. Amen.
©️ CFD Angono
